ರಾಯನ ದಿನಚರಿ - ಎರಡನೇ ದಿನ

ವಾರಕ್ಕೊಂದು ನಿಯಮಿತ ದಿನ ಕೆಲವು ಚಿಕ್ಕ ಕೆಲಸ ಮಾಡಬೇಕಿದ್ದರೂ ಅದು ಈತನಕ ಸಾಧ್ಯವಾಗಿರಲಿಲ್ಲ. ಇವತ್ತು ಮಾಡಿ ಹೊಸ ಪದ್ಧತಿ ಶುರು ಮಾಡಿದನು. 

ಹೆಂಡತಿಯು ಮನೆಯಲ್ಲಿ ಖಾಲಿ ಆಗಿದ್ದ ಹೊಸ ಪೇಂಟ್ ಡಬ್ಬಗಳನ್ನು ನೀರಿನಲ್ಲಿ ನೆನೆಸಿ ಇಟ್ಟಿದ್ದಳು - ಮುಂದೆ ಗಿಡಗಳನ್ನು ಅವುಗಳಲ್ಲಿ ಹಚ್ಚುವ ಸಲುವಾಗಿ. ಅವನ್ನು ಕೂತು ಪೇಂಟ್ ಕೆರೆದು ಕೊಟ್ಟನಂತೆ. 

 ಎಂ ಎಸ್ ಶ್ರೀರಾಮ ಅವರ 'ಭಾಸ್ಕರ್ ರಾಯರ ಕಥೆಗಳು - ನಡೆಯಲಾರದ ದೂರ, ಹಿಡಿಯಲಾರದ ಬಸ್' ಎಂಬ ಪುಸ್ತಕದ ಓದನ್ನುಮುಂದುವರಿಸಿ ಅದನ್ನು ಮುಗಿಸಿದನು. ಅಷ್ಟೇನೂ ಸಾಹಸಿಯಲ್ಲದ 80ರ ವೃದ್ಧನು - ಇವನ ಹೆಸರೇ ಭಾಸ್ಕರರಾಯ - ಏಕಾಏಕಿ ಇನ್ನೊಬ್ಬ ಹೆಂಗಸಿನೊಂದಿಗೆ ಕೆಲ ಕಾಲ ನಾಪತ್ತೆ ಆದ ಕತೆಯು ಧಾರಾವಾಹಿ ಆಗಿರುವುದು ಮುನ್ನುಡಿಯಿಂದ ತಿಳಿದು ಯೂಟ್ಯೂಬ್ನಲ್ಲಿಹುಡುಕಿದಾಗ ನಿತ್ಯೋತ್ಸವ ಧಾರಾವಾಹಿಯ ಮೊದಲ ಭಾಗ ಸಿಕ್ಕಿತು. ಅಯ್ಯೋ ಎಷ್ಟೊಂದು ನಿಧಾನ ! ನಾಗತಿಹಳ್ಳಿ ಚಂದ್ರಶೇಖರ್ ಅವರು ಮಾಡಿದ್ದಂತೆ . 64 ಎಪಿಸೋಡ್ ಗಳಂತೆ. ಜನಪ್ರಿಯ ಆಗಿತ್ತಂತೆ . ಯಾವ ಕಥೆಯನ್ನು ಇದು ಆಧರಿಸಿದೆಯೋ ಅದು ಇರುವುದು ಐವತ್ತೇ ಪುಟಗಳು . ಟಿವಿ ಧಾರಾವಾಹಿಯಲ್ಲಿ ಅನಂತನಾಗ್ ಮತ್ತು ವಿನಯಾ ಪ್ರಸಾದ್ ಪ್ರಮುಖ ಪಾತ್ರಗಳು .

ಆ ಪುಸ್ತಕದಲ್ಲಿ ಅದೇ ಭಾಸ್ಕರರಾಯನ ಇನ್ನೊಂದು ಕಥೆ ಚೆನ್ನಾಗಿತ್ತು. ಹೈದರಾಬಾದಿನಲ್ಲಿ ವಾಕಿಂಗ್ ಹೋದ ಇದೇ ಭಾಸ್ಕರರಾಯನು ಒಂದು ವಿಲಕ್ಷಣ ಘಟನೆಗೆ ಸಾಕ್ಷಿಯಾಗುವುದರಿಂದ ಆರಂಭವಾಗುವ ಕತೆಯು ಈ ಮೊದಲು ಹೇಳಿದ ಕತೆಯ ಹಾಗೆ ವಾಸ್ತವಿಕವೂ ತುಂಬ ರೋಚಕವೂ ಆಗಿತ್ತು. ನಿಜ ಜೀವನದ ಅನೇಕ ಪ್ರಸಿದ್ಧ ವ್ಯಕ್ತಿಗಳನ್ನು ಪಾತ್ರಗಳಾಗಿ ಮಾಡಿಕೊಂಡು ತುಂಬ ರೋಚಕವಾದ ಕತೆಗಳನ್ನು ಯಾವುದೋ ಪುಸ್ತಕದಲ್ಲಿ ಈ ಹಿಂದೆ ಓದಿದ ನೆನಪು ಅವನಿಗೆ ಆಯಿತು. ಇದೇ ಲೇಖಕರು ಬರೆದ ಪುಸ್ತಕ ಅದು ಆಗಿರಬಹುದು 

ಆಮೇಲೆ ಮಾರ್ಚಿನ ತುಷಾರ ವನ್ನು ಓದಿ ಮುಗಿಸಿದ. ಅದರಲ್ಲೂ ಅದೇ ಎಂಎಸ್ ಶ್ರೀರಾಮ್ ಅವರ ಒಂದು ಹೊಸ ಕಥೆಯಿತ್ತು ಪರವಾಗಿಲ್ಲ ಅನ್ನಿ ಒಂದು ಚೂರು ಮಯೂರ ನೋಡಿದ. ಆಮೇಲೆ ಟಿವಿ ರಿಮೋಟ್ ಅನ್ನು ಕೈಗೆ ತೆಗೆದುಕೊಂಡ. 

ಯಾವುದೋ ಚಾನೆಲ್ ನಲ್ಲಿ 6 ಗಂಟೆಗೆ ಬಿಗ್ ಬಾಸ್ ಕನ್ನಡದ ಕರ್ಟನ್ ರೇಸರ್ ಇತ್ತು. ಈ ತನಕ ಬಿಗ್ಬಾಸ್ ನೋಡಿರದ ಅವನು ಬಿಗ್ ಬಾಸ್ ಅಂದ್ರೆ ಏನು ನೋಡುವ ಅಂದುಕೊಂಡ.. ಅದೇ ಸಮಯಕ್ಕೆ ಇನ್ನೊಂದುಕಡೆ ಅವನೇ ಶ್ರೀಮನ್ನಾರಾಯಣ ಆರಂಭ ಆಗುವುದಿತ್ತು. ಹಿಂದೆ ನೋಡಿದ್ದನು. ಒಮ್ಮೆ ನೋಡಿದ್ದನ್ನು ಇನ್ನೊಮ್ಮ ನೋಡಲು ಅದು ಎಷ್ಟೇ ಚೆನ್ನಾಗಿರಲಿ, ಮನಸ್ಸು ಬರುವುದಿಲ್ಲ. ಇನ್ನೊಂದು ಚಾನೆಲ್ಲಲ್ಲಿ ಜೇಮ್ಸ್ ಬಾಂಡ್ ಸಿನಿಮಾ - ಸ್ಕೈ ಫಾಲ್ ಶುರುವಾಯಿತು.. ಅದನ್ನೇ ನೋಡುತ್ತ ನಡುನಡುವೆ ಬಿಗ್ ಬಾಸ್ ನೋಡಲಾರಂಭಿಸಿದ. 

ಕಾರಣವಿಲ್ಲದೆ ಬೇಜಾರಾಗಿ, ತಯಾರಾಗಿ ಮನೆಯಿಂದ ಹೊರಬಂದು ಹತ್ತಿರದ ಒಂದು ಸಣ್ಣ ಗಿರಿಯನ್ನು ಏರಿ ಇಳಿದು ಬಂದನು. ಹಿಂದೆಂದೋ ಡೌನ್ಲೋಡ್ ಮಾಡಿಕೊಂಡಿದ್ದ ಯಕ್ಷಗಾನದ ಹಾಡುಗಳನ್ನು ಆ ಸಮಯದಲ್ಲೇ ಕೇಳಿದನು. ಇಷ್ಟೊಂದು ಜನ ಲೋಕದಲ್ಲಿ ಇದ್ದಾರಲ್ಲ , ಎಲ್ಲವೂ ಬೇಜಾರಾದಾಗ ಏನು ಮಾಡುತ್ತಾರೆ ಎ೦ದು ವಿಚಾರ ಮಾಡುತ್ತ ಮನೆಗೆ ಮರಳಿದನು. ಸದ್ಯ ತಾನಾದರೂ ಎಷ್ಟೊಂದು ಒಳ್ಳೆಯ ಹಾಡು, ಪುಸ್ತಕಗಳನ್ನು ಸಂಗ್ರಹಿಸಿದ್ದೇನೆ, ಟೀವಿಯಲ್ಲಿ ಚಾನೆಲ್ ಗಳಿವೆ, ಯೂಟ್ಯೂಬ್ ಇವೆ. ಎಷ್ಟೆಲ್ಲ ರೇಡಿಯೋ ಸ್ಟೇಷನ್ ಇವೆ. ಸುಲಭವಾಗಿ ಬೇಜಾರು ಕಳೆದುಕೊಳ್ಳಬಹುದು ಎ೦ದು ಸಮಾಧಾನಪಟ್ಟುಕೊಂಡನು.