ರಾಯನ ವರ್ಷದ ದಿನಚರಿ

ಗೆಳೆಯ ರಾಯ ನಿವೃತ್ತನಾಗಿ ತನ್ನ ಊರು ಸೇರಿಕೊಂಡಿದ್ದ. ಅದಕ್ಕೂ ಮೊದಲು ನನಗೆ ಆಗೀಗ ಭೆಟ್ಟಿಯಾಗುತ್ತಿದ್ದನಷ್ಟೇ. ಆ ಕುರಿತು ಕೆಲ ಸಂಗತಿಗಳನ್ನು ಸುಮಾರು ಮೂರು ವರ್ಷಗಳ ಹಿಂದೆ ನಿಮ್ಮೊಂದಿಗೆ ಹಂಚಿಕೊಂಡಿದ್ದೇನೆ. ಈಗ ಬಹಳ ದಿನಗಳ ನಂತರ ನಮ್ಮ ಊರಿಗೆ ಬಂದಿದ್ದ . ನನಗೆ ಅವನ ಭೆಟ್ಟಿಯಾಯಿತು.  

ಈಚಿನ ದಿನಗಳಲ್ಲಿ ಈತ ಏನು ಮಾಡಿಕೊಂಡಿದ್ದಾನೆ ಎಂಬ ನನ್ನ ಕುತೂಹಲವನ್ನು ತಣಿಸಿದ್ದು ಹೀಗೆ - ಇವನಿಗೆ Star Maker ಮತ್ತು Smule ಎಂಬ ಮೊಬೈಲ್ ಆ್ಯಪ್ ಗಳ ಪರಿಚಯ ಆಯಿತಂತೆ. ಅವುಗಳು ಹಾಡುಗಳ ಹುಚ್ಚು ಇರುವವರಿಗೆ ನೆರವಾಗುವ ಆ್ಯಪ್ ಗಳು. ಜನಪ್ರಿಯ ಹಾಡುಗಳ ಹಿನ್ನೆಲೆ ಸಂಗೀತ ಒದಗಿಸಿ ಆ ಹಾಡಿನ ಸಾಹಿತ್ಯ ಒದಗಿಸಿ ಯಾವಾಗ ಅದರ ಸಾಲುಗಳನ್ನು ಹಾಡಬೇಕು, ಯಾವಾಗ ನಿಲ್ಲಿಸಬೇಕು ಎಂದು ಸೂಚಿಸುತ್ತವಂತೆ, ಕಮೆಂಟ್ ಗಳನ್ನು ತೋರಿಸುತ್ತವಂತೆ. (ಅವು ಬಹುಶಃ ಸುಳ್ಳು ಎಂದು ರಾಯನ ಅನಿಸಿಕೆ). ಅಲ್ಲಿ ಕೆಲವರು ಅರ್ಧಂಬರ್ಧ ಹಾಡಿ ಉಳಿದ ಭಾಗವನ್ನು ಇತರರಿಗೆ ಹಾಡಿ ಪೂರ್ಣಗೊಳಿಸಲು ಬಿಡುತ್ತಾರಂತೆ. ಅಲ್ಲಿ ಅವನಿಗೆ ತುಂಬ ಚೆನ್ನಾಗಿ ಹಾಡುವವರ ಪರಿಚಯ ಆಯಿತಂತೆ . ಅವರುಗಳು ಹಾಡಿದ ತುಂಬಾ ಹಾಡುಗಳನ್ನು ಇವನು ತನ್ನ ಸಾಧಾರಣ ದನಿಯಲ್ಲಿ ಆದರೆ ಮೂಲದಂತೆ ಹಾಡಿ ಪೂರ್ಣಗೊಳಿಸಿ ಡೌನ್ ಲೋಡ್ ಮಾಡಿ ತನ್ನ ಕೇಳುವ ಸಂತೋಷಕ್ಕೆ ಇಟ್ಟುಕೊಂಡಿದ್ದಾನಂತೆ . ಅವುಗಳನ್ನು ನನ್ನೊಂದಿಗೆ ರಾಯ ಹಂಚಿಕೊಂಡಿದ್ದಾನೆ.  

ನನಗೂ ಅವು ಇಷ್ಟವಾದವು . ಅಲ್ಲಿ ಒಬ್ಬ ಗಾಯಕಿ - ಆಕೆಯ ಹೆಸರು ಮಂಜುಳಾ ಅಶೋಕ್ ಅಂತ - ಯಂತೂ ಮೂಲ ಗಾಯಕಿಯರಿಗಿಂತ ಚೆನ್ನಾಗಿ ಹಾಡಿದ್ದಾರೆ. ಆಕೆಯ ಸುಮಾರು 50 ಹಾಡುಗಳನ್ನು ನಮ್ಮ ರಾಯ ಪೂರ್ಣಗೊಳಿಸಿದ್ದಾನೆ !

 ಅಂತೆಯೇ ಅವನು ಸುಮಾರು 300 ಹಾಡುಗಳನ್ನು ಆಕೆಯ ಮತ್ತು ಇತರ ಗಾಯಕಿಯರ ಜತೆ ಹಾಡಿಕೊಂಡಿದ್ದಾನಂತೆ. ಆ ಇತರ ಗಾಯಕಿಯರ ಹೆಸರುಗಳನ್ನೂ ಅವನು ಹೇಳಿದ. 2023ರ ಇಡೀ ವರುಷ ಇದರಲ್ಲೇ ಕಳೆದನಂತೆ. ಆದರೆ ಆ ಬಗ್ಗೆ ಸಂತೋಷ ಸಂತೃಪ್ತಿ ಇದೆಯಂತೆ. ಮನೆಯಿಂದ ಹೊರಬಿದ್ದು ವಾಕಿಂಗ್ ಹೋಗುವಾಗಲೆಲ್ಲ ಕಿವಿಗೆ ಇಯರ್ ಫೋನ್ ಹಾಕಿಕೊಂಡು ಈ ಹಾಡುಗಳನ್ನು ಕೇಳುತ್ತ ಸ್ವರ್ಗಸುಖ ಅನುಭವಿಸುತ್ತಾನಂತೆ.