ಜ್ಯೋತಿಷ್ಯ ಮತ್ತು ಫಿಸಿಕಲ್‌ ಸೈನ್ಸ್ :ಕೆಲವು ಅನಿಸಿಕೆಗಳು

"ಜಪಾನ್ - ಜ್ಯೋತಿಷ್ಯ" ಈ ಚರ್ಚೆಯಲ್ಲಿ ಜಯಂತ್ ಅವರು "ನನಗೇ ಅರ್ಥವೇ ಆಗಲಿಲ್ಲ." ಎಂದು ಬರೆದಿರುವುದೇ, ಬಹುಶಃ ಈ ‘ಜ್ಯೋತಿಷ್ಯ’ದ ಮಾತುಗಳಿಗೆಲ್ಲಾ ಸರಿಯಾದ ಪ್ರತಿಕ್ರಿಯೆಯೋ ಎನೋ! ಅಲ್ಲಿನ ಚರ್ಚೆಗೆ ಕೊಂಚ ಭಿನ್ನವಾದ ಅನಿಸಿಕೆಗಳನ್ನು ಹಂಚಿಕೊಳ್ಳಲು ಈ ಲೇಖನವನ್ನು ಹಾಕಿದ್ದೇನೆ. ಜಯಂತ್ ಅವರು ಅನ್ಯಥಾ ಭಾವಿಸುವುದಿಲ್ಲ ಎಂದುಕೊಂಡಿದ್ದೇನೆ.ಹಿಂದೆ ಒಮ್ಮೆ ಸೂರ್ಯಗ್ರಹಣದಂದು ಯಾವುದೋ ಒಂದು ಕನ್ನಡ ವಾಹಿನಿಯಲ್ಲಿ ಒಬ್ಬರು ಟೀ.ವಿ. ಜ್ಯೋತಿಷಿ ಮತ್ತು ಒಬ್ಬರು ಅಸ್ಟ್ರೋ-ಫಿಸಿಸಿಸ್ಟ್ ನಡುವೆ ಆದ ಚರ್ಚೆಯನ್ನು ಕೇಳಿದಾಗ ಅನಿಸಿದ್ದು:

ಜ್ಯೋತಿಷ್ಯ ಶಾಸ್ತ್ರವನ್ನು ಪಾಲಿಸುವವರು ತಮ್ಮ ಶಾಸ್ತ್ರಕ್ಕೆ ಮತ್ತು ಅದರ ಪ್ರಕ್ರಿಯೆಗಳಿಗೆ ನಿಷ್ಠರಾಗಿ ಏನನ್ನಾದರೂ ಹೇಳಿದರೆ, ಒಪ್ಪಲಿ ಇಲ್ಲ ಬಿಡಲಿ, ಆ ಮಾತುಗಳನ್ನು ಗೌರವಿಸಬಹುದು. ಆದರೆ ಜ್ಯೋತಿಷಿ ಮತ್ತು ಫಿಸಿಸಿಸ್ಟಗಳ ಮುಖಾಮುಖಿಯಲ್ಲಿ ನಮಗೆ ಇದುರಾಗುವ ಮೊದಲ ತೊಡಕು ಯಥಾವತ್ತಾಗಿ ಜ್ಯೋತಿಷ್ಯ ಶಾಸ್ತ್ರದ ಪರವಾಗಿ ಪ್ರಾಪಂಚಿಕ ಆಗುಹೋಗುಗಳನ್ನು ಅರ್ಥೈಸುವ ಜ್ಯೋತಿಷಿಗಳು ಯಾರು? ಯಾರು ಅಲ್ಲ? ಎನ್ನುವುದು. ನಂತರ ಮುಂದಿನ ತೊಡುಕು, ನಿಜವಾದ ಜ್ಯೋತಿಷ ಶಾಸ್ತ್ರಜ್ಞರು ಹೇಳುವುದರಲ್ಲಿ ಯಾವುದನ್ನು ಅಕ್ಷರಶಃ ಸತ್ಯವಾಗಿ ಮತ್ತು ಯಾವುದನ್ನು ಸಾಂಕೇತಿಕವಾಗಿ ತೆಗೆದುಕೊಳ್ಳಬೇಕು? ಎಂಬುದು.

ಪಾರಂಪರಿಕ ವಿದ್ಯೆಯಾದ ವೇದಾಂಗದಲ್ಲಿ ಶೀಕ್ಷ (phonetics), ವ್ಯಾಕರಣ(grammer), ನಿರುಕ್ತ (etymology), ಚಂದಸ್ಸು (prosody) ಇತ್ಯಾದಿಗಳು ಇವೆ. ಇವೆಲ್ಲಾ ವೈಜ್ಞಾನಿಕವಾದ ಶಾಸ್ತ್ರಗಳು. ಅವುಗಳಂತೆಯೇ  ವೇದಾಂಗವಾದ ಜ್ಯೋತಿಷ್ಯವೂ ಕೂಡ ಎಂದು ನಂಬಬಹುದು. ಅದರಲ್ಲಿ ಅಸ್ಟ್ರಾನೊಮಿಯ ಅಂಶಗಳು ಸಾಕಷ್ಟಿವೆ ಎಂದು ಕೇಳಿದ್ದೇನೆ. ನನಗೆ ಈ ಯಾವ ಶಾಸ್ತ್ರಗಳಲ್ಲೂ ಪ್ರವೇಶವಿಲ್ಲ.  ಆದರೆ ಯಾವುದೇ ಹದಿನಾರಾಣೆ ವೈಜ್ಞಾನಿಕ ಶಾಸ್ತ್ರವನ್ನು ಆಧರಿಸಿದ ವೃತ್ತಿಯವರಾಗಲಿ, ಪ್ರಕೃತಿಯ (ನೀವು ಆಸ್ತಿಕರಾದರೆ ಸೃಷ್ಟಿಕರ್ತನ) ಅಂತರಂಗವನ್ನು ಮತ್ತು ಅದರ ಚರ್ಯೆಯನ್ನು ಎಲ್ಲಾ ದೇಶಕ್ಕೂ ಎಲ್ಲಾ ಕಾಲಕ್ಕೂ ನಿಜವಾಗುವಂತೆ ತಿಳಿದು ತಾನು ಭವಿಷ್ಯವನ್ನು ಹೇಳಬಲ್ಲೆ ಎಂದರೆ ನನಗೆ ನಂಬುವುದು ಕಷ್ಟ. ನಿಜವಾದ ವಿಜ್ಞಾನಿ ತನ್ನ ತಿಳಿವಳಿಕೆಯ ಮಿತಿಯನ್ನು ಪ್ರಾಮಾಣಿಕವಾಗಿ ಒಪ್ಪಿಕೊಳ್ಳುತ್ತಾನೆ. ಆದರೆ ಟೀ(ಠೀ)ವಿ ‘ಜ್ಯೋತಿಷಿ’ಗಳಲ್ಲಿ ಈ ಗುಣ ಇದೆಯೋ ಇಲ್ಲವೋ ವೀಕ್ಷಕರೆ ನಿರ್ಧರಿಸಿಕೊಳ್ಳಬಹುದು.

ಆಧುನಿಕ ಕಾಲದಲ್ಲಿ ಫಿಸಿಕಲ್ ಸೈನ್ಸಸ್‌ನ ವಿಜ್ಞಾನಿಗಳ ಲೌಕಿಕ ತಿಳಿವಿನ ಮಿತಿ ಜ್ಯೋತಿಷ್ಯ ಶಾಸ್ತ್ರದವರ ತಿಳಿವಿನ ಮಿತಿಗಿಂತ ಬಹು ಮುಂದುವರೆದಿದೆ. ಅದಕ್ಕೆ ಆ ವಿಜ್ಞಾನದ ಕಳೆದ ಐದಾರು ಶತಮಾನಗಳ ಪರಂಪರೆಯಲ್ಲಿಕಂಡುಬರುವ ಲಕ್ಷಾಂತರ ಉತ್ಕೃಷ್ಟ ಮನಗಳ ದುಡಿಮೆ, ಅವರ ಪ್ರಾಮಾಣಿಕತೆ, ಅವರ ವಿಶ್ವಾಸಾರ್ಹತೆಯಿಂದ ಆ ಕ್ಷೇತ್ರಕ್ಕೆ ಸಮಾಜ ಕೊಡುವ ಪ್ರೋತ್ಸಾಹ ಇತ್ಯಾದಿಗಳೂ ಕಾರಣವಾಗಿರಬಹುದು. ಹಾಗಾಗಿ ಇಂದಿನ ಜ್ಯೋತಿಷ್ಯ ಶಾಸ್ತ್ರದವರ ಮತ್ತು ವಿಜ್ಞಾನಿಗಳ ಮುಖಾಮುಖಿಯಲ್ಲಿ ಸಾಮಾನ್ಯವಾಗಿ ವಿಜ್ಞಾನಿಗಳು ನಂಬಲರ್ಹರಾಗಿ ನನಗೆ ತೋರುತ್ತಾರೆ. ಹುಸಿ ವೈದ್ಯರು (quacks) ವೈದ್ಯಕೀಯ ಕ್ಷೇತ್ರಕ್ಕೆ ಮಸಿಬಳಿಯುತ್ತಾರೆ. ಹಾಗೆಯೇ ಜ್ಯೋತಿಷ ಶಾಸ್ತ್ರದಲ್ಲೂ ಆಗುತ್ತಿರಬೇಕು. ಅನೇಕ ‘ಜ್ಯೋತಿಷಿ’ಗಳು ವೇದಾಂಗವಾದ ಜ್ಯೋತಿಷ್ಯದ ಇತಿಮಿತಿಗಳ ಒಳಗೆ ಸೂಕ್ತವಾಗಿ ಅದರ ಅನುಸಂಧಾನವನ್ನು ಮಾಡುತ್ತಾರೆಯೆ ಎಂಬ ಪ್ರಶ್ನೆ ನನಗಿದೆ.

ಪ್ರಭು