ಕಣಿಯ ನೋಡಲು ಬನ್ನಿರಿ

ಕಣಿಯ ನೋಡಲು ಬನ್ನಿರಿ|ವಿಷುವಿನ

ಕಣಿಯ ನೋಡಲು ಬನ್ನಿರಿ ||

ಸೌರಮಾನ ಯುಗಾದಿ ಬಂದಿದೆ

ಜನತೆ  ತೋರಿದೆ ಸಡಗರ

ಉಚ್ಚ ರಾಶಿಯನೇರಿ ರಾಜಿಪ

ಸೂರ್ಯದೇವನಿಗಾದರ           [೧]

ಚಳಿಯು ಓಡಿದೆ ಸೆಕೆಯು ಮೂಡಿದೆ

ಋತು ವಸಂತವು ತೊಡಗಿದೆ

ತಳಿರು ತುಂಬಿದ ಗಿಡ  ಮರಗಳಲಿ

ಹಕ್ಕಿಯುಲಿತವು ಹರಡಿದೆ          [೨]

ಮನೆಯ ಮುಂದಿದೆ ರಂಗವಲ್ಲಿಯು

ಹೊಸಿಲು ಹೊಸಿಲಲಿ ಚಿತ್ತರ

ದೀಪ ಬೆಳಗಿದೆ ಕರೆಯುತಿದೆ ,ಬಾ

ಪೂಜಿಸುವ ಮನೆದೇವರ          [೩]

ದೇವನೆದುರಿವೆ ನಾಗಸಂಪಿಗೆ

ಬಣ್ಣ ಬಣ್ಣದ ಹೂಗಳು

ತೆಂಗು ಹಲಸಿನ ,ಮಾವು ಕದಳಿಯ

ಸ್ವಾದ ತುಂಬಿದ ಫಲಗಳು        [೪]

ಮಂಗಳದ ಬೆಳೆ ಬೆಳೆದು ನಿಂತಿದೆ

ಸಂಪದದ ತುಣುಕಿಲ್ಲಿದೆ         

ದ್ವೇಷ ಭಾವನೆ ಕಾಲು ಕಿತ್ತಿದೆ

ಸ್ನೇಹಕಲಶವು ತುಂಬಿದೆ           [೫]

ದೇವ,ಗುರು,ಹಿರಿಯರಿಗೆ ವಂದಿಸಿ

ಕಾಣಿಕೆಯನರ್ಪಿಸುತಲಿ 

ಒಲುಮೆ ಹರಕೆಯ ಪಡೆದು ವಿಷುವಿನ

ದಿನದಿ ನಾಡಿದು ನಲಿಯಲಿ         [೬]

ಕಣಿಯ ನೋಡಲು ಬನ್ನಿರಿ |ವಿಷುವಿನ

ಕಣಿಯ ನೋಡಲು ಬನ್ನಿರಿ ||

[ಈ ವರ್ಷದ ಸೌರ ಯುಗಾದಿ-೧೫-೪-೨೦೧೧ -ಎಲ್ಲಾ ಸಂಪದಿಗರಿಗೂ ಶುಭಾಶಯಗಳು}