ninna nagu

ನಿನ್ನ ನಗು

ನಾನೇ ನೆಟ್ಟ ಪುಟ್ಟ ಗಿಡ
ನೋಡುನೋಡುತ್ತ ಬೆಳೆದು
ಮೈ ತುಂಬ ಹೂವ ತುಂಬಿ
ಕಣ್ಣ ಮಿಟುಕಿಸಿ ನಕ್ಕಿತು

ಬಾಂದಳದಿ ಚಂದಿರನು
ತುಂಬು ಬೆಳೆದಿಂಗಳ ಚೆಲ್ಲಿ
ನೀರ ಬುಗ್ಗೆಗಳಲಿ ತನ್ನನೇ
ಬಿಂಬಿಸಿ ನಗುತಿತ್ತು

ಗಿರಿಯ ಶೃಂಗಗಳು
ಮೇಲಕ್ಕೆ ಮುಖ ಮಾಡಿ
ಬಿಳಿ ಮೋಡಗಳ ಕರೆಯುತ್ತ
ತುಟಿಬಿರಿಸಿ ನಗುತಿತ್ತು

ಸುಳಿ ಗಾಳಿ ಸುಳಿ ಸುಳಿದು
ಕೊಳಲಿನಿಂಚರವ ಪಸರಿಸಿ
ಗಿಡಗಳಿಗೆ ಕಚಗುಳಿ ಇಟ್ಟು
ತುಂಟ ನಗು ನಗುತಿತ್ತು

ಈ ಎಲ್ಲ ನಗುವಿನಲಿ
ನಿನ್ನ ನಗು ಎಲ್ಲಿ ಇದೆ ಎಂದು
ಕಂಗಾಲಾಗಿ ಹುಡುಕಿದಾಗ
ನಗುತ ನೀನೆಂದೆ

"ಯದ್ಯದ್ವಿಭೂತಿ ಮತ್ಸತ್ವಂ"