ಬದಲಾಗುವ ದಿನಚರಿ!

ಬದಲಾಗುವ ದಿನಚರಿ!

ನನ್ನಾಕೆ
ಊರಿಗೆ ಹೋಗಿ
ತಿಂಗಳಾಗುತ್ತಾ ಬಂದಿತ್ತು

ನನಗಾದರೋ
ಸ್ವಾತಂತ್ರ್ಯದ ಹೊಸ
ದಿನಚರಿ ರೂಢಿಯೂ ಆಗಿತ್ತು

ನನಗಷ್ಟೇ
ನಾನಾಗಿ, ನನ್ನನರಿಯುವ
ಪರಿಯಲೂ ಉತ್ಸುಕತೆಯಿತ್ತು

ಒಂಟಿತನದ
ಆನಂದದ ಆ ಹೊಸ
ಅನುಭವದಲ್ಲಿ ಸುಖವೂ ಕಂಡಿತ್ತು

ಆದರೆ,

ಅಡುಗೆಮನೆಯಲ್ಲಿ
ಅನಿಲದ ಒಲೆಗಳಿಗೆ
ಅದೇಕೋ ಬೇಸರ ಕಾಡಿತ್ತು

ಪ್ರತಿ ದಿನವೂ
ಮೈತೊಳೆಸಿಕೊಳ್ಳುತ್ತಿದ್ದ
ಮನೆಯ ನೆಲ ಬೇಸರಗೊಂಡಿತ್ತು

ಪ್ರತೀ ಸಂಜೆ
ಆ ದೇವರ ಮೂರ್ತಿ
ಕತ್ತಲಲ್ಲಿ ದೀಪಕ್ಕಾಗಿ ಕಾಯುತ್ತಿತ್ತು

ನೀರು ಕಾಣದ
"ಜೀನ್ಸ್ ಪ್ಯಾಂಟ್"
ನನ್ನನ್ನು ಅದಾಗಲೇ ಶಪಿಸುತ್ತಿತ್ತು

ಮತ್ತೀಗ,

ನನ್ನ ಆ ಹೊಸ
ದಿನಚರಿಗೆ ಬದಲಾಗಿ
ಹಳೆಯದೇ ಜಾರಿಯಾಗಿಹುದು

ಆ ಒಲೆಗಳಲಿ
ಪುರುಸೊತ್ತೇ ಇಲ್ಲದಂತೆ
ಜ್ವಾಲೆ ತಾಂಡವವಾಡುತ್ತಿಹುದು

ಮನೆಯ ನೆಲ
ದಿನ ದಿನವೂ ಸ್ವಚ್ಛಗೊಂಡು
ಮಗುವಿನ ಹಾಲ್ಗೆನ್ನೆಯಂತಾಗಿಹುದು

ದೀಪ ಕಂಡ
ದೇವರ ಮೂರ್ತಿಯ
ಆ ಮುಖದಲ್ಲೂ ಪ್ರಭೆ ಕಾಣುತಿಹುದು

ಒಗೆಸಿಕೊಂಡ ಆ
"ಜೀನ್ಸ್ ಪ್ಯಾಂಟ್ " ಈಗ
ನನಗೆ ಗುರುತೇ ಸಿಗದಂತಾಗಿಹುದು
*******************