ಟ್ವಿಟರ್ ಮೂಲಕ ಹಣ ಗಳಿಸಿ
ಗುರುಗುಂಟಿರಾಯರಿಗೆ ಖುಷಿ ಕೊಡಬಹುದಾದ ಸಮಾಚಾರ ಇಲ್ಲಿದೆ.ಟ್ವಿಟರ್ ಅಂತರ್ಜಾಲ ತಾಣದಲ್ಲಿ ಪ್ರಕಟವಾಗುವ,ಶೇರುಗಳ ಬಗೆಗಿನ ಜನರ ಒಲವು-ತಾತ್ಸಾರಗಳು ನಿಜವಾಗುತ್ತಿದೆ.ಶೇರುಗಳ ಬಗೆಗಿನ ಟ್ವೀಟ್ಸ್‌ಗಳನ್ನು ಕಲೆ ಹಾಕಿ,ಕಂಪೆನಿಯ ಶೇರೊಂದರ ಬಗ್ಗೆ ಜನಾಭಿಪ್ರಾಯ ಹೇಗಿದೆ?ಆ ಕಂಪೆನಿಯ ಶೇರಿನ ಬಗ್ಗೆ ಜನರ ಒಲವು ಹೆಚ್ಚಿದೆಯೇ ಅಲ್ಲ ತಗ್ಗಿದೆಯೇ ಎನ್ನುವುದನ್ನು ತಿಳಿಸುವ ಸೇವೆಗಳಿವೆ. ಇದು ಕಂಪೆನಿಯ ಶೇರುಗಳ ಮಾರುಕಟ್ಟೆ ದರಕ್ಕೂ ತಳಕು ಹಾಕಿಕೊಡಿರುವುದು ಅಧ್ಯಯನದಿಂದ ವ್ಯಕ್ತವಾಗಿದೆ.ಉದಾಹರಣೆಗೆ http://tweettrader.net ಅಂತಹ ಅಂತರ್ಜಾಲ ತಾಣವು,ಪ್ರತಿ ಕಂಪೆನಿ ಶೇರಿನ ಬಗ್ಗೆ ಜನಾಭಿಪ್ರಾಯ ಏರಿದೆಯೇ ಅಥವಾ ತಗ್ಗಿದೆಯೇ-ಎಷ್ಟು ಪ್ರಮಾಣದಲ್ಲಿ ಎಂದು ತಿಳಿಸುವ ಸೇವೆಯನ್ನು ನೀಡುತ್ತಿದ್ದು,ಇದರ ಪ್ರಕಾರ ವ್ಯವಹಾರ ಮಾಡಿದರೆ,ಅಚ್ಚುಕಟ್ಟಾಗಿ ಹಣ ಮಾಡಲು ಮೋಸ ಇಲ್ಲವಂತೆ. ಈ ತಾಣವನ್ನು ಅಧ್ಯಯನ ವರದಿಯ ಆಧಾರದಲ್ಲಿ ಅಭಿವೃದ್ಧಿ ಪಡಿಸಲಾಯಿತು.ಮ್ಯುನಿಚ್ ಪಟ್ಟಣದ ವಿಶ್ವವಿದ್ಯಾಲಯದ ವಿದ್ಯಾರ್ಥಿ,ಎರಡೂವರೆ ದಶಲಕ್ಷ ಟ್ವೀಟ್ಸ್‌ಗಳ ಅಧ್ಯಯನದ ಆಧಾರದಲ್ಲಿ ಸಂಶೋಧನೆ ಕೈಗೊಂಡು ಪ್ರಬಂಧ ಮಂಡಿಸಿದ್ದನಂತೆ.
ಜನಾಭಿಪ್ರಾಯ ತಿಳಿಯಲು ಟ್ವಿಟರ್ ಸಹಾಯಕ ಎನ್ನುವುದಕ್ಕೆ ಜರ್ಮನಿಯ ಇನ್ನೊಂದು ಸಂಶೋಧನಾ ವರದಿಯೂ ಪೂರಕವಾಗಿದೆ.ಚುನಾವಣೆಯಲ್ಲಿ ಜನರ ಒಲವು ಯಾವ ಪಕ್ಷದ ಕಡೆಗಿದೆ ಎನ್ನುವುದನ್ನು ತಿಳಿಯಲು ಸಮೀಕ್ಷೆಗಳನ್ನು ಕೈಗೊಳ್ಳುವುದಕ್ಕೆ ಬದಲಾಗಿ,ಟ್ವೀಟ್ಸ್‌ಗಳಲ್ಲಿ ವ್ಯಕ್ತವಾಗುವ ಜನರ ಅಭಿಪ್ರಾಯಗಳ ಆಧಾರದಲ್ಲಿ ಮತದಾನದ ಪಕ್ಷವಾರು ಮತಪ್ರಮಾಣವನ್ನು ಊಹಿಸಿದರೆ,ಅದು ನೈಜ ಪರಿಣಾಮದ ಬಹು ಸಮೀಪದಲ್ಲಿರುವುದು ಜರ್ಮನಿಯ ಸಮೀಕ್ಷೆಯಿಂದ ವ್ಯಕ್ತವಾಗಿದೆ.
------------------------------------------------
ಸಮುದ್ರದಲ್ಲಿ ವಿದ್ಯುತ್ ಸ್ಥಾವರ
ಗಾಳಿಯಿಂದ ವಿದ್ಯುಚ್ಛಕ್ತಿ ಉತ್ಪಾದನೆಯು ಪರಿಸರಪ್ರಿಯ ವಿದ್ಯುತ್ಪಾದನೆಯಾಗಿದೆ.ಇಂತಹ ಮಾರುತ ಶಕ್ತಿ ಆಧಾರಿತ ಸ್ಥಾವರಗಳನ್ನು ಸ್ಥಾಪಿಸಲು,ಏಕಪ್ರಕಾರವಾಗಿ ಬೀಸುವ ಗಾಳಿಯ ಅನುಕೂಲ ಬೇಕು.ವರ್ಷದುದ್ದಕ್ಕೂ ಗಾಳಿ ಬೀಸುತ್ತಿರುವ ಪ್ರದೇಶಗಳನ್ನು ಆಯ್ದು ಕೊಂಡು,ಸ್ಥಾವರ ಸ್ಥಾಪಿಸುವುದು ಮುಖ್ಯ.ಇದಕ್ಕೆ ವಿಶಾಲ ಪ್ರದೇಶಗಳನ್ನು ಆರಿಸಿಕೊಳ್ಳಬೇಕು.ಸಮುದ್ರ ಮಧ್ಯೆ ಸತತವಾಗಿ ಗಾಳಿ ಬೀಸುವ ಅನುಕೂಲ ಇರುವ ಪ್ರದೇಶಗಳನ್ನು ಪತ್ತೆ ಮಾಡುವುದು ಸುಲಭ.ಆದರೆ ಇಂತೆಡೆ,ಗಾಳಿ ಮಿಲ್ಲುಗಳನ್ನು ಸ್ಥಾಪಿಸುವುದು ಕಠಿನ.ಒಂದು ವೇಳೆ ಸ್ಥಾಪಿಸಿದರೂ,ಅಲ್ಲಿಂದ ವಿದ್ಯುತ್ತನ್ನು ನಗರಗಳಿಗೆ ತರಲು ಸಮುದ್ರ ತಳದಲ್ಲಿ ಕೇಬಲ್ ಹಾಕಬೇಕು ಇದು ಖರ್ಚಿನ ಬಾಬತ್ತು ಗೂಗಲ್ ಕಂಪೆನಿಯು ಇಂತಹ ಸಮುದ್ರ ನಡುವಣ ಗಾಳಿ ವಿದ್ಯುತ್ ಸ್ಥಾವರದಿಂದ ವಿದ್ಯುತ್ ತರಲು ಸಮುದ್ರ ತಳದಲ್ಲಿ ಕೇಬಲ್ ಹಾಕಲು ಮುಂದೆ ಬಂದಿದೆ.ದಕ್ಷಿಣ ವರ್ಜೀನಿಯಾದಿಂದ ಆರಂಭಿಸಿ,ನ್ಯೂಜೆರ್ಸಿ ವರೆಗಿನ ಕೇಬಲ್ ಹಾಕಲು ಕಂಪೆನಿ ಮುಂದೆ ಬಂದಿದೆ.ಒಟ್ಟು ಇಪ್ಪತ್ತು ಕಿಲೋಮೀಟರುಗಳಷ್ಟು ಕೇಬಲ್ ಹಾಕಬೇಕಾದೀತು.ಈ ಮೂಲಕ ಆರುಸಾವಿರ ಮೆಗಾವ್ಯಾಟ್ ವಿದ್ಯುಚ್ಛಕ್ತಿಯನ್ನು ಉತ್ಪಾದಿಸಿ,ವಿತರಿಸ ಬಹುದು.ಎರಡು ದಶಲಕ್ಷ ಮನೆಗಳಿಗೆ ಈ ವಿದ್ಯುತ್ ಸಾಕಾಗಬಹುದು.
--------------------------------------
ತುಷಾರ:ವಾರ್ಷಿಕ ಚಂದಾ ಗೆಲ್ಲಿ!
ಈ ಪ್ರಶ್ನೆಗಳಿಗೆ ಸರಿಯುತ್ತರ ಕಳುಹಿಸಿ,ತುಷಾರ ಮಾಸಿಕದ ವಾರ್ಷಿಕ ಚಂದಾ ಗೆಲ್ಲಿ! ಬಹುಮಾನ ಪ್ರಾಯೋಜಿಸಿದವರು ಉಡುಪಿ ಬ್ರಹ್ಮಗಿರಿಯ ಡಾ.ಶ್ರೀನಿವಾಸ್ ರಾವ್,ಪ್ರೊಫೆಸರ್,ನಿಟ್ಟೆ.
*ಉಬುಂಟು ಲೀನಕ್ಸ್‌ನ ಎಪ್ರಿಲ್ 2011ನ ಆವೃತ್ತಿಯ ಹೆಸರೇನು?
*ಫೊಟೋಶಾಪ್,ಜಿಂಪ್,ಇಂಕ್‌ಸ್ಕೇಪ್ ತಂತ್ರಾಂಶಗಳ ಪೈಕಿ ಲೀನಕ್ಸಿನಲ್ಲಿಲ್ಲದ ತಂತ್ರಾಂಶ ಯಾವುದು?
(ಉತ್ತರಗಳನ್ನು nistantusansaara@gmail.comಗೆ ಮಿಂಚಂಚೆ ಮಾಡಿ ಅಥವಾ 725927022ಗೆ ಎಸ್ಸೆಮ್ಮೆಸ್ ಮಾಡಿ.ವಿಷಯ:NS26 ನಮೂದಿಸಿ.)
ಕಳೆದ ವಾರದ ಸರಿಯುತ್ತರಗಳು:
*ಡೆಬಿಯನ್ ಲೀನಕ್ಸ್ ವಿತರಣೆಯ ಮುಖ್ಯ ಹೆಗ್ಗಳಿಕೆ-ಇದು ಬಹು ಸ್ಥಿರವಾದ ಕಾರ್ಯಕ್ಷಮತೆಯುಳ್ಳ, ವಿತರಣೆ.
*ಐ ಆರ್ ಸಿ ತಂತ್ರಜ್ಞರು ಪಟ್ಟಾಂಗಕ್ಕೆ ಬಳಸುವ ಮಾಧ್ಯಮ.ಯಾಕೆ ಜನಪ್ರಿಯವೆಂದರೆ ವೃತ್ತಿಪರರೇ ಹೆಚ್ಚು ಬಳಾಸುವುದರಿಂದ ಸಮಸ್ಯೆಗಳಿಗೆ ಪರಿಹಾರ ಸಿಗುವ ಸಾಧ್ಯತೆ ಹೆಚ್ಚು . ಬಹುಮಾನ ಗೆದ್ದವರು ಚೇತನ್ ಭಟ್. ಅಭಿನಂದನೆಗಳು.
-----------------------------------------------------
ಯುಟ್ಯೂಬಿನಲ್ಲಿ ಹೊಸ ಚಾನೆಲುಗಳು
ಗೂಗಲ್ ಯುಟ್ಯೂಬನ್ನು ಸಮಗ್ರವಾಗಿ ಬದಲಿಸುವಂತೆ ಕಾಣಿಸುತ್ತಿದೆ.ಮೊದಲಾಗಿ ಯುಟ್ಯೂಬಿನಲ್ಲಿ ಹೊಸ ಚಾನೆಲುಗಳನ್ನು ಆರಂಭಿಸಿ,ಅದರಲ್ಲಿ ತಾನೇ ನಿರ್ಮಾಣ ಮಾಡಿದ ವಿಡಿಯೋಗಳನ್ನು ನೇರ ಪ್ರಸಾರಕ್ಕೆ ಒದಗಿಸುವ ಯೋಚನೆ ಗೂಗಲ್ ಕಂಪೆನಿಗಿದೆ.ಅದಕ್ಕಾಗಿ ನೂರು ದಶಲಕ್ಷ ಡಾಲರು ಬಜೆಟ್ ಮೀಸಲರಿಸಲದು ನಿರ್ಧರಿಸಿದೆ.ಹಾಲಿವುಡ್ ನಿರ್ಮಾಪಕರ ಸಲಹೆ ಸೂಚನೆಗಳನ್ನು ಪಡೆದು,ಗೂಗಲ್ ಮುಂದಡಿಯಿಡುತ್ತಿದೆ.ಯುಟ್ಯೂಬಿನಲ್ಲಿ ಜನರು ಹಾಕುವ ಅಗಣಿತ ವಿಡಿಯೋಗಳಲ್ಲೂ ಹಲವು ಚಾನೆಲುಗಳು ಲಭ್ಯವಿವೆ.ಅಂತರ್ಜಾಲವನ್ನು ಸೆಟ್‌ಟಾಪ್ ಮೂಲಕ ಟಿವಿಯಲ್ಲಿ ವೀಕ್ಷಿಸುವ ಅಭ್ಯಾಸ ಬೆಳೆಯುವ ಈ ಹೊತ್ತಿನಲ್ಲಿ,ಇಂತಹ ಬಹುಸಂಖ್ಯೆಯ ಚಾನೆಲುಗಳು ನೀಡುವ ಭರಪೂರ ಆಯ್ಕೆ,ಡಿ ಟಿ ಎಚ್,ಕೇಬಲ್ ಟಿವಿ ಚಾನೆಲುಗಳಿಗೆ ಹೋಲಿಸಿದರೆ,ಇದು ಜನರ ಒಲವು ಗಳಿಸುವುದರಲ್ಲಿ ಅನುಮಾನವಿಲ್ಲ.ಡಿಟಿಎಚ್,ಕೇಬಲ್ ಟಿವಿಗಳು ನೂರೋ,ಇನ್ನೋರೂ ಚಾನೆಲ್ ನೀಡಿದರೆ,ಇಲ್ಲಿನ ಆಯ್ಕೆ ಅವುಗಳ ಹಲವು ಪಟ್ಟು ಹೆಚ್ಚು.
---------------------------------------
ಬ್ರೌಸರುಗಳ ಪೈಕಿ ಕ್ರೋಮ್ ಟಾಪರ್
ಇಂಟರ್ನೆಟ್ ಎಕ್ಸ್‌ಪ್ಲೋರರ್,ಫೈರ್‌ಫಾಕ್ಸ್ ಮತ್ತು ಗೂಗಲ್‌ನ ಕ್ರೋಮ್ ಬ್ರೌಸರ್ ತಂತ್ರಾಂಶಗಳ ಸ್ಪರ್ಧೆಯಲ್ಲಿ ಒಂದಕ್ಕೊಂದು ಪೈಪೋಟಿ ಒಡ್ಡುತ್ತಿವೆ.ಇಂಟರ್ನೆಟ್ ಎಕ್ಸ್‌ಪ್ಲೋರರ್‌ನ ಒಂಭತ್ತನೇ ಆವೃತ್ತಿ,ಹಳೆಯ ಆವೃತ್ತಿಗಳಿಗಿಂತ ಉತ್ತಮ ಪ್ರತಿಕ್ರಿಯೆ ಪಡೆಯಲು ಸಫಲವಾಗಿದೆ.ಮೋಜಿಲ್ಲಾ ಫೈರ್‌ಫಾಕ್ಸ್ ಬ್ರೌಸರ್ ಕೂಡಾ,ಈಗ ಬಹು ಜನಪ್ರಿಯ ಬ್ರೌಸರುಗಳಲ್ಲೊಂದು.ಆಡಾನ್ ತಂತ್ರಾಂಶಗಳ ಮೂಲಕ ಅದು ವಿವಿಧ ಸವಲತ್ತುಗಳನ್ನು ಬಳಕೆದಾರರಿಗೆ ನೀಡಿ,ಹೆಚ್ಚಿನ ಜನ ಮನ್ನಣೆ ಪಡೆದಿದೆ.ಗೂಗಲ್ ಸರಳ ಬ್ರೌಸರ್ ಆಗಿ ಹೊಸ ವಿನ್ಯಾಸವನ್ನು ನೀಡಿ,ಅಂತರ್ಜಾಲ ಜಾಲಾಟಕ್ಕೆ ಹೇಳಿ ಮಾಡಿಸಿದ,ವಿನ್ಯಾಸ ಹೊಂದಿದ ಮೊದಲ್ ಬ್ರೌಸರ್ ಆಗಿದೆ.ವೇಗವಾಗಿ ಅಂತರ್ಜಾಲ ಪುಟಗಳನ್ನು ತೋರಿಸುವಲ್ಲೂ ಕ್ರೋಮ್ ಮೇಲುಗೈ ಪಡೆದಿದೆ.ಬ್ರೌಸರ್‌ಗಳ ಮೇಲೆ ನಡೆಸಿದ ಪರೀಕ್ಷೆಗಳಲ್ಲೂ ಗೂಗಲ್ ಕ್ರೋಮ್ ಉಳಿದ ಬ್ರೌಸರುಗಳಿಗಿಂತ ಅತಿ ಹೆಚ್ಚು ಅಂಕ ಪಡೆದು ಮೇಲುಗೈ ಪಡೆದಿದೆ.
Udayavani
*ಅಶೋಕ್‌ಕುಮಾರ್ ಎ
Comments
ಉ: ಟ್ವಿಟರ್ ಮೂಲಕ ಹಣ ಗಳಿಸಿ
In reply to ಉ: ಟ್ವಿಟರ್ ಮೂಲಕ ಹಣ ಗಳಿಸಿ by venkatesh
ಉ: ಟ್ವಿಟರ್ ಮೂಲಕ ಹಣ ಗಳಿಸಿ