ಬೂಟ್ ಪಾಲೀಶ್ ಹುಡುಗ ಮತ್ತು ಸ್ವಾತಂತ್ರ್ಯೋತ್ಸವ

ಬೂಟ್ ಪಾಲೀಶ್ ಹುಡುಗ ಮತ್ತು ಸ್ವಾತಂತ್ರ್ಯೋತ್ಸವ

ಶಾಲೆಯೆದುರು ಬೀದಿಯಲ್ಲಿ  ಕುಳಿತ

ಅವನ ಕಣ್ಣಗಳಲ್ಲಿಂದು  ಹೊಸ ಹೊಳಪು !

ಇದೊಂದು ದಿನವಾದರೂ.........

 ಖಾದಿ ಬಟ್ಟೆ ತೊಟ್ಟ ಬೆರಳೆಣಿಕೆಯ ಮಂದಿಯ

ಪಾದರಕ್ಷೆಗೆ ಪಾಲೀಶ್ ಯೋಗ..!

ಸಿಗಬಹುದಿಂದು ಬಹಳಷ್ಟು ಗಿರಾಕಿ..

 

ಜೈಲಿನಲಿ ಬಂಧಿಯಾಗಿಹ ತನ್ನ ತಾಯಿಗೆ

ಕೊಡಬಹುದು ಒಂದಿಷ್ಟು ಸಿಹಿ..!

 

ಕಣ್ಣೆದುರಿಗೆ....

ಕೈಯ್ಯಲ್ಲಿ ಚೈನಾಮೇಡ್ ತ್ರಿವರ್ಣ ಧ್ವಜ ಹಿಡಿದ

ಮಕ್ಕಳ ಶಿಸ್ತಿನ ದಂಡು.....

ಅವರ ಹಿಂದೆ ನಿಸ್ತೇಜ ಕಣ್ಣುಗಳ  ಒಂದಿಷ್ಟು ಹಿರಿಯರ ಹಿಂಡು

ವಸ್ತ್ರ ಮಾತ್ರ ಗರಿ...ಗರಿ

ಸಾಗಿತ್ತು ಪಥ ಸಂಚಲನ....ಅವರ ಹಿಂದೆಯೇ....

ಮಣ ಭಾರ ಹೊತ್ತ ಗಾಡಿ ಎಳೆಯುವ ಹಮಾಲಿ..

ಹೂ. ಹಣ್ಣು..ಮಾರುವವರು ಸಾಗುತ್ತಿದ್ದಾರೆ...!

ದಿನದ ಹೊಟ್ಟೆ ಹಸಿವಿಗೆ  ಹಿಟ್ಟು ಕಟ್ಟಲು...!

 

ಅರುಳವ ಧ್ವಜದಿಂದ...ಕೆಸರಲಿ ಬೀಳುವ ಹೂ ಪಕಳೆಗಳು..

ಭಾಷಣ,... ಹಾರ...., ಆಹಾರ..ಯಾರೋ ಕೈಗಿತ್ತರು...  ಚಾಕಲೇಟ್

ಅಮ್ಮನ ನೆನಪಾಗಿ ಕಿಸೆಯಲ್ಲಿಟ್ಟುಕೊಂಡ...

ಅವನ ಕಣ್ಣುಗಳಲ್ಲೊಂದು ಪ್ರಶ್ನೆಯಿತ್ತು...!

ಸ್ವಾತಂತ್ರ್ಯವೆಂದರೆ...ಚಾಕಲೇಟ್  ತಿನ್ನುವದೇ ?

Comments