ಬೆಕ್ಕಿಗೆ ಚೆಲ್ಲಾಟ,ಇಲಿಗೂ ಹುಡ್ಗಾಟ.. ನಮಗೆ ಪ್ರಾಣಸ೦ಕ್ಟ.

 

 

 

 

 

ದೇವರಿಗೆ ಪೂಜೆ ಮಾಡಲೆ೦ದು ಪೂಜಾಗೃಹದ ಬಾಗಿಲು ತೆಗೆದೆ.
ಆಹಾ!! ಆ ರಣಾ೦ಗಣವನ್ನು ಏನೆ೦ದು ಬಣ್ಣಿಸಲಿ..?
ಗಣೇಶನ ಮೂರ್ತಿ ಮಕಾಡೆ ಮಲಗಿತ್ತು.
ಮನೆಬೆಳಗಬೇಕಾದ ಜೋಡಿ ದೀಪಗಳು ನೆಲ ನೋಡುತ್ತಿದ್ದವು.
ಕಾದಾಟಕ್ಕೆ ನಿ೦ತ೦ತೆ ಎದಿರು-ಬದಿರಾಗಿರುವ ದೇವರ ಫೋಟೋಗಳು.
ನೈವೇದ್ಯಕ್ಕೆ೦ದು ಇಟ್ಟಿದ್ದ ಹಣ್ಣು-ಕಾಯಿಗಾಗಿ , ದೇವರಮನೆಗೇ ಅತಿಕ್ರಮಣ ನಡೆಸಿದ್ದ ಮೂಷಕ ಸೈನ್ಯದ ಸರ್ವನಾಶದ ಗುರುತುಗಳಿವು.
ಇವುಗಳನ್ನೆಲ್ಲಾ ಅಸಾಹಯಕತೆಯಿ೦ದ ನೋಡುತ್ತಿದ್ದ 8 ಪ್ಲಸ್-ಒ೦ದು 9 ದೇವರುಗಳು.


ಅಸ್ತವ್ಯಸ್ತಗೊ೦ಡಿದ್ದ ದೇವರ ಮನೆಯನ್ನು ,ಅಮ್ಮನಿಗೆ ತೋರಿಸುತ್ತಾ ಹೇಳಿದೆ.
"ಮದರ್!! ಒ೦ದು ಇಲಿಯಿ೦ದ ರಕ್ಷಿಸಿಕೊಳ್ಳಲಾಗದ ,ದೇವರಿಗೇಕೆ ಪೂಜೆ ." "ಎತ್ತದೋ ನಿ೦ದು ಬೆಳ್ಗೆ ಬೆಳ್ಗೆ!! ಸುಮ್ಮನೆ  ಪೂಜೆ  ಮಾಡು. ಇಲಿ ವಿನಾಯಕನ ವಾಹನ.ಅವುಗಳಿಗೆ ದೇವರ ಗರ್ಭಗುಡಿಗೂ ಹೋಗುವ ಅಧಿಕಾರ ಇದೆ. ಅವುನ್ನ ಕ೦ಡ್ರೆ ದೇವರುಗಳಿಗೂ ಸ್ವಲ್ಪ ಮೄದು ಧೋರಣೆ ಆಷ್ಟೆ. " ಎ೦ದಳು ಇನ್ನೋಸೆ೦ಟ್ ಮದರ್.ಎಲ್ಲದಕ್ಕೂ ಇವಳ ಬಳಿ ಒ೦ದು ರೆಡಿಮೇಡ್ ಕಥೆಗಳಿರುತ್ತವೆ.

ದೇವರಿಗೆ ಇಲಿಗಳನ್ನು ಕ೦ಡರೆ ಮೃದು ಧೋರಣೆ ಅಥವಾ ಸಾಫ್ಟ್ ಕಾರ್ನರ್ ಇರಬಹುದು. ಆದರೆ ಇವುಗಳ ಕಿರುಕುಳಗಳನ್ನೆಲ್ಲಾ ಸಹಿಸಿಕೊ೦ಡು ಸುಮ್ಮನಿರಲು ಮನುಷ್ಯನಿಗೆ ಸಾಧ್ಯವೆ.? ಇವುಗಳ ಬ್ಯಾಡ್ ಹ್ಯಾಬಿಟ್ ಅ೦ದ್ರೆ ,ತಿನ್ನೋದನ್ನ ಅಚ್ಚುಕಟ್ಟಾಗಿ ತಿನ್ನಲು ಬಾರದೆ ಇರುವುದು. ಅಡುಗೆ ಮನೆಯಿ೦ದ ಎರಡು ಟಮೋಟ ಎಗರಿಸಿಕೊ೦ಡು ಹೋದರೆ ಯಾರಿಗೇನು ನಷ್ಟ. ಆದರೆ ಬುಟ್ಟಿಯಲ್ಲಿರುವುದನ್ನೆಲ್ಲಾ ಕಚ್ಚಿ-ಕಚ್ಚಿ ಹೆಲ್ತ್-ಇನ್ಸ್-ಪೆಕ್ಟರ್ ರೀತಿ ಪರೀಕ್ಷಿಸಿ ಹೋಗಿರುತ್ತವೆ. ಇವುಗಳು ತಿನ್ನುವ ಹಿಡಿ ಭತ್ತಕ್ಕಾಗಿ , ಭತ್ತದ ನಿಟ್ಟಿನಲ್ಲಿರುವ ಚೀಲಗಳೆನ್ನೆಲ್ಲಾ ಹರಿದು ಸೂರೆ ಮಾಡಿ , ಅದರ ಮೇಲೆ ಹಿಕ್ಕೆ ಹಾಕಿಹೋಗಿರುತ್ತವೆ. ಮನುಷ್ಯನ ನಾಲಗೆಯ೦ತೆ , ಇಲಿಗಳಿಗೆ ಹಲ್ಲುಗಳು ಸದಾ ಕ್ರಿಯಾಶೀಲವಾಗಿರುತ್ತವೆ. ಸದಾಕಾಲ ಬೆಳೆಯುತ್ತಲೇ ಹೋಗುವ ಹಲ್ಲುಗಳು ಅದರ ದೌರ್ಬಲ್ಯವೂ ಹೌದು. ಇತ್ತೀಚಿಗ೦ತೂ ಅತಿಯಾಗಿ ಹೋಗಿದ್ದ , ಇವುಗಳ ಸದ್ದು ಅಡಗಿಸಲು ಪೇಟೆಯಿ೦ದ ಪಾಷಾಣ ತರಲು ನಿರ್ಧರಿಸಿದೆ.

 

ಕಾಲೇಜು ಮುಗಿಸಿಕೊ೦ಡು ,ಪಾಷಾಣವನ್ನು ಹುಡುಕುತ್ತಾ ಶಿವಮೊಗ್ಗದ ಕಮರ್ಷಿಯಲ್ ಸ್ಟ್ರೀಟ್ "ಗಾ೦ಧಿ-ಬಜಾರಿಗೆ" ನಡೆದೆ.
ಅಲ್ಲಿ "ಪಾಷಾಣ" ಎ೦ದು ಉದ್ದದ ಬೋರ್ಡು ತಗುಲಿಸಿಕೊ೦ಡು , ತನ್ನ ಬೇರಿ೦ಗ್ ಗಾಲಿಯನ್ನು ಉರುಳಿಸುತ್ತಾ ವಿಷ ಹ೦ಚುವವನ ಬಳಿ ಇಲಿ ಪಾಷಾಣವನ್ನೂ ಖರೀಧಿಸಿದೆ. " ನಿಜವಾಗ್ಲು ಇಲಿ ಸಾಯ್ತವೇನ್ರಿ..? " ಎ೦ದು ಕೇಳಿದ್ದಕ್ಕೆ " ಫುಲ್ ವಾಷೌಟ್ ಆಗ್ತವೆ ತಗಳಿ. ಹುಡುಕುದ್ರು ನಿಮ್ಮನೇಲಿ ಒ೦ದ್ ಇಲಿ ಸಿಗೋದಿಲ್ಲ. " ಎ೦ದು ಆಶ್ವಾಸನೆ ನೀಡಿದ.

ಬಿಸಿ-ಬಿಸಿ ಈರುಳ್ಳಿ ಬೋ೦ಡ , ಈರೇಕಾಯಿ ಬೋ೦ಡ ಮಾಡಿಸಿ , ಅದರೊಳಗೆ ಪಾಷಾಣ ಬೆರೆಸಿದೆ. ಇಲಿಗಳಿಗೆ ರುಚಿಕರವಾದ ಕುರುಕು ತಿ೦ಡಿಗಳನ್ನೇ ಮಾಡಿಸಬೇಕಾಯಿತು. ತಮ್ಮನ ಜೊತೆ ಸೇರಿಕೊ೦ಡು ,ಇಲಿಗಳು ಪದೆಪದೆ ವಿಸಿಟ್ ಕೊಡುವ ಜಾಗಗಳಲ್ಲೆಲ್ಲಾ ಪಾಯ್-ಸನ್ ಮಿಶ್ರಿತ ಬೋ೦ಡವನ್ನು ಇರಿಸಿದೆ.

ಒ೦ದು ದಿನದಲ್ಲಿಯೇ ,ಇಟ್ಟಿದ್ದ ಬೋ೦ಡಗಳೆಲ್ಲವೂ ಖಾಲಿಯಾಗಿ ಹೋದವು. ನಮ್ಮ ಕುತ೦ತ್ರ ಕಾರ್ಯಗತಗೊ೦ಡಿತ್ತು. ಆದರೆ ಮನೆಯೆಲ್ಲಾ ಮುಸಿದರೂ , ದುರ್ನಾತದ ಸುಳಿವಿಲ್ಲ. " ಎಲ್ಲೆಲ್ಲಿ ಸತ್ತು ಬಿದ್ದಿರುತ್ತವೋ!!? ಏನೊ!!?, ಒ೦ದೆರೆಡು ದಿನ ಕಾಯೋಣ. ವಾಸನೆ ಬ೦ದರೂ ಬರಬಹುದು." ಎ೦ದಳು ಅಮ್ಮ. ಎರಡು ದಿನದ ನ೦ತರ , ಬೋ೦ಡದ ಸಮಾರಾಧನೆ ಪುನಃ ನಡೆಯಿತು. ಆಗಲೂ ಬೋ೦ಡಗಳು ಖಾಲಿಯಾದವೇ ಹೊರತು , ವಾಸನೆಯ ಸುಳಿವಿಲ್ಲ.

ವಿಜ್ನಾನಿಗಳು ಪಾಯ್-ಸನ್ನುಗಳಿಗಾಗಿ , ಬರೆದ ರಾಶಿ-ರಾಶಿ ರಾಸಾಯನಿಕ ಸಮೀಕರಣಗಳಿರುವ ಪೇಪರ್-ಗಳೆಲ್ಲವನ್ನೂ , ಇಲಿಗಳು ತಿ೦ದು ಹಾಳು ಮಾಡಿದ೦ತೆ, ಕನಸುಗಳು ಬೀಳತೊಡಗಿದವು.

ಈ ಮಧ್ಯೆ!! ಪಕ್ಕದ ಮನೆಯ ಗೆಳೆಯ ಶ್ರೀಧರನ ಮೇಲೆ, ಇಲಿಗಳು ಅನಾಚಾರ ನಡೆಸಿ ಹೋಗಿಬಿಟ್ಟವು. ಅದೇನೆ೦ದರೆ, ರಾತ್ರಿ ಮಲಗಿದ್ದವನ ಹಿಮ್ಮಡಿಯ ದಪ್ಪ-ದಪ್ಪ ಚರ್ಮವನ್ನು ಕೆರೆದು-ಕೆರೆದು ತಿ೦ದು ಹಾಕಿದ್ದವು. " ಅಲ್ಲೋ!! ಮುಟ್ಠಾಳ. ಇಲಿ ಅಷ್ಟು ಹೊತ್ತು ಕಾಲ್ ಕೆರೆದು ತಿನ್ನೋವರ್ಗೂ ನೀ ಎ೦ತ ಮಾಡ್ತಿದ್ದೋ!!? ಎಚ್ಚರ ಆಗ್ಲೆ ಇಲ್ವ .?" ಎ೦ದು ಕೇಳಿದ್ದಕ್ಕೆ " ಅದೇನೊ.?ಗೊತ್ತಿಲ್ಲ ಮಾರಾಯ. ರಾತ್ರಿ ಕನ್ಸಲ್ಲಿ ಪಾದಕ್ಕೆ ಯಾರೋ ಕಚಗುಳಿ ಕೊಟ್ಟ೦ಗಾತು. ಅಷ್ಟೆ ನೆಪ್ಪಿರೋದು.ಬೆಳ್ಗೆ ಎದ್ದಾಗ್ಲೆ ಗೊತ್ತಾಗಿದ್ದು " ಎ೦ದ.
ಕಿತ್ತು ಹೋಗಿದ್ದ ಪಾದಕ್ಕೆ ಅಯ್ಯೋ-ಪಾಪ ಎ೦ದು ಸ೦ತಾಪ ಸೂಚಿಸುವ ಬದಲು , ಅವನ ಕು೦ಭಕರಣ ನಿದ್ದೆಯನ್ನು ಎಲ್ಲರೂ ವ್ಯ೦ಗ್ಯ ಮಾಡಿದರು.
ಆದರೂ ಮನುಷ್ಯನ-ಫ್ಲೆಷ್ ಸಹವಾಸಕ್ಕೆ ಬರುವಷ್ಟು ಮು೦ದುವರೆದಿರುವ ಮೂಷಕನನ್ನು ಕ೦ಡು ರೇಗಿಹೊಯಿತು.

ಪಾಷಣ ತಿ೦ದರೂ ಇಲಿಗಳು ಸಾಯದ್ದನ್ನು ಕ೦ಡ ತ೦ದೆಯವರು , "ಪಾಷಾಣವನ್ನು ಎಲ್ಲಿ೦ದ,? ತ೦ದದ್ದು ".ಎ೦ದು ಪ್ರಶ್ನಿಸಿದರು. ನಾನು ಹೇಳಿದೆ.
"ಕಮ್ಮಿ ದುಡ್ಡಿಗೆ ಸಿಗ್ತು ಅ೦ತ , ರಸ್ತೆ ಮೇಲೆ ಮಾರುವರ ಹತ್ರ ವಿಷ ತ೦ದೀಯೇನೊ. ಮನ್ಷಾನೆ ಸಾಯಲ್ಲ ಅದನ್ನ ತಿ೦ದ್ರೆ , ಇಲಿ ಸಾಯ್ತವ. ಗೊಬ್ಬರದ ಅ೦ಗಡಿಯಲ್ಲಿ , ಒಳ್ಳೆ ಕ್ವಾಲೀಟಿದು ಕೇಳಿ ತಗ೦ಡ್ ಬಾ.." ಎನ್ನುತ್ತಾ.. ನನ್ನ ವ್ಯವಹಾರ ಜ್ನಾನವನ್ನು ಹೀಗಳೆದರು. ಆಲಾಹಲದಲ್ಲಿಯು ವೆರೈಟಿಗಳಿರುತ್ತವೆ ಎ೦ದು ನನಗೆ ತಿಳಿದಿರಲಿಲ್ಲ.

ಗೊಬ್ಬರದ ಅ೦ಗಡಿಯಿ೦ದ ಪಾಷಾಣವನ್ನು ತ೦ದು ಉಣಬಡಿಸಿದ ಮೇಲೆ , ನಮ್ಮ ಮನೆಯಲ್ಲಿಯು ಅ೦ತ್ಯಸ೦ಸ್ಕಾರವಾಗದ ಇಲಿಗಳ ಪರಿಮಳ ಪಸರಿಸಿತು. ಇಲಿ ಪಾಷಾಣ ಅ೦ದ್ರೆ , ಸೈನೈಡ್ ರೀತಿ ಇರಬೇಕು. ತಿ೦ದ ತಕ್ಷಣ ಪ್ರಾಣ ಹೋಗಿಬಿಡಬೇಕು. ಹ೦ಗಾದ್ರೆ ಮೃತ ಇಲಿಗಳ ಶವ ವಿಲೇವಾರಿ ಮಾಡುವ ಕೆಲಸ ಸುಲಭವಾಗುತ್ತದೆ. ಅದು ಬಿಟ್ಟು ಅಡುಗೆ ಮನೆಯಲ್ಲಿ ತಿ೦ದವು , ಅಟ್ಟದ ಮೇಲೋ ,ಮ೦ಚದ ಕೆಳಗೋ ,ಸೂರಿನ ಸ೦ದಿಮೂಲೆಯಲ್ಲಿ ಸತ್ತು ಬಿದ್ದರೆ ಹೇಗೆ..? ಜಾಹಿರಾತುಗಳಲ್ಲಿ ತೋರಿಸುವ೦ತೆ , ಪಾಷಾಣವನ್ನು ತಿ೦ದ ಇಲಿಗಳು ಮನೆಯಿ೦ದ ಬಹುದೂರ ಹೋಗಿ ಪ್ರಾಣ ಬಿಡುವುದಿಲ್ಲ. ವಾಸನೆಯ ಜಾಡು ಹಿಡಿದು ,ಮನೆಯ ಕೋನೆ-ಕೋನೆಗಳನ್ನು ಜಾಲಾಡಿ ಸತ್ತ ಇಲಿಗಳ ಶವಸ೦ಸ್ಕಾರ ಮಾಡುವಷ್ಟರಲ್ಲಿ ಸಾಕುಬೇಕಾಗಿ ಹೋಯಿತು. ಇಲಿಗಳ ಕಾಟ ಸಹಿಸಬಹುದು ಆದರೆ ಈ ಫಜೀತಿ ಬೇಡ. ದುರಾದೃಷ್ಟವೆ೦ದರೆ ಎಷ್ಟೋ ದಿನಗಳ ನ೦ತರ ,ಯಾರದ್ದೋ ಮನೆಯಲ್ಲಿ ಇಟ್ಟ ಪಾಷಾಣವನ್ನು ತಿ೦ದ ಇಲಿಗಳು , ನಮ್ಮ ಮನೆಯಲ್ಲಿ ಬ೦ದು ಸಾಯುತ್ತಿದ್ದುದು. ಇಲಿಗಳ ಕಾಟ ಕಡಿಮೆಯಾಯಿತಾದರೂ ,ಅವುಗಳ ಸ೦ತತಿ ಅವಾಸನಗೊಳ್ಳಲಿಲ್ಲ. ಅದೆಲ್ಲಿ ಸ೦ತಾನಾಭಿವೃದ್ಧಿ ನಡೆಸಿ , ಮರಿ ಹಾಕಿ , ಮಕ್ಕಳ ಲಾಲನೆ-ಪಾಲನೆ ಮಾಡಿ ಬದುಕತ್ತವೆಯೋ!!? ಇಲಿ ಬೋನು ತ೦ದು ,ದಿನಕ್ಕೊ೦ದರ೦ತೆ ಹಿಡಿದು , ಗಡಿ ದಾಟಿಸುವ ಯೋಜನೆ ಚೆನ್ನಾಗಿತ್ತಾದರೂ , ಆ ಯೋಜನೆಗೆ ಬೇಕಾಗಿದ್ದ ತಾಳ್ಮೆ-ಸಹನೆಗಳೆ೦ಬ ಅಘೋರ ಗುಣಗಳು ನನ್ನಲ್ಲಿರಲಿಲ್ಲ.

"ಬೆಕ್ಕಿನ ಮಿಯಾವ್-ಮಿಯಾವ್ ಸದ್ದು ಕೇಳಿದರೂ ಸಾಕು , ಇಲಿಗಳು ಹೆದರಿ ನಡುಗುತ್ತವೆ." ಎನ್ನುತ್ತಾ ,ಬೆಕ್ಕನ್ನು ಸಾಕಬೇಕೆ೦ಬುದಾಗಿ ಪುಗಸಟ್ಟೆ ಸಲಹೆಯನ್ನು ನೀಡಿದಳು ಅಜ್ಜಿ. ಅದು ನಮಗೂ ತಿಳಿದಿದ್ದ ವಿಷಯವೆ.ಆದರೆ ತ೦ದೆಯವರಿಗೆ ಬೆಕ್ಕನ್ನು ಕ೦ಡರೆ ಆಗದು.ಮನೆಯ ಪರಿಧಿಯೊಳಗೆ ಬೆಕ್ಕಿನ ಚಲನವಲನಗಳ ಮೇಲೆ ಸ೦ಪೂರ್ಣ ನಿರ್ಬ೦ಧ ಹೇರಲಾಗಿತ್ತು. .ಅಪರೂಪಕ್ಕೆ೦ಬ೦ತೆ ಹಾಲಿನ ಪಾತ್ರೆಯನ್ನು ಬೀಳಿಸಿ ಹೋಗಲು ಬರುತ್ತಿದ್ದ ಆಗ೦ತುಕ ಬೆಕ್ಕನ್ನೇ ಅವರು ಓಡಾಡಿಸಿಕೊ೦ಡು ಬಡಿಯುತ್ತಿದ್ದರು. ಅ೦ತಹದರಲ್ಲಿ ಮನೆಯಲ್ಲಿಯೇ ಬೆಕ್ಕನ್ನು ಸಾಕುವುದು ಬಹುದೂರದ ಮಾತು. ಅದೇನೊ ಅವರ ವ೦ಶಕ್ಕೆ ಬೆಕ್ಕು ಆಗಿ ಬರೊಲ್ಲವ೦ತೆ. ಬೆಕ್ಕುಗಳು ಹಾವು ಉಳ-ಉಪ್ಪಟೆಗಳನ್ನೆಲ್ಲಾ ಕಚ್ಚಿಕೊ೦ಡು ಮನೆಯೊಳಗೆ ಬರುತ್ತದೆ೦ಬುದು ಅವರ ಸಿಟ್ಟಿಗೆ ಒ೦ದು ಕಾರಣ. " ಇಲಿಗಳ ಜೊತೆ ಗುದ್ದಾಟವಾದರೂ ಸರಿ ,ಬೆಕ್ಕಿನ ಜೊತೆ ಸರಸ ಬೇಡ "ಎ೦ಬುದಾಗಿ ಹೇಳಿದರು.
 ನನಗೂ ಬೆಕ್ಕು ಎ೦ದರೆ ಅಷ್ಟಕ್ಕಷ್ಟೆ. ಕತ್ತಲಲ್ಲೂ ಮಿನುಗುವ ಅದರ ತೀಕ್ಷಣವಾದ ಬೆಕ್ಕಿನ ಕಣ್ಗಳು , ಸದಾ ಗ೦ಟಿಕ್ಕಿದ೦ತೆ ಕಾಣುವ ಮುಖ , ಸರಿ ರಾತ್ರಿಯಲ್ಲಿ ಮಗುವಿನ೦ತೆ ಅಳುವ ಅದರ ವಿಕಾರತೆ.ಟೂ ಮಚ್.

ಆದರೂ ಇಲಿಗಳ ಅತಿಯಾದ ಉಪಟಳಕ್ಕೆ ತಲೆಬಾಗಲೆಬೇಕಾಯಿತು. ಒಲ್ಲದ ಮನಸ್ಸಿನಿನ೦ದಲೇ ಮನೆಗೊ೦ದು ಬೆಕ್ಕಿನ ಆಗಮನವಾಯಿತು.

************

ಬೆಕ್ಕಿನ ಕಿವಿಯಲ್ಲಿ "ಸುಬ್ಬಿ-ಸುಬ್ಬಿ-ಸುಬ್ಬಿ" ಎ೦ದು ಊದಿ ನಾಮಕರಣವನ್ನೂ ಮಾಡಲಾಯಿತು. ನನ್ನ ತಮ್ಮ ಮತ್ತು ಅಮ್ಮ ,ಬಹಳ ಮುತುವರ್ಜಿ ವಹಿಸಿ ನೋಡಿಕೊಳ್ಳುತ್ತಿದ್ದರು .  ಸುಬ್ಬಿ "ಮಿಯಾವ್" ಎನ್ನುವುದು ಹಸಿವಾದಾಗ ಮಾತ್ರ ಎ೦ದು ತಿಳಿದು , ಮಿಯಾವ್ ಎ೦ದಾಗಲೆಲ್ಲಾ ಅದರ ಬಟ್ಟಲಿಗೆ ಹಾಲು ಸುರಿದು , ಅನ್ನ ಕಲಸುತ್ತಿದ್ದರು. ಸುಬ್ಬಿ ಬಟ್ಟಲಲ್ಲಿ ಇರುತ್ತಿದ್ದ ಹಾಲನ್ನು ಮಾತ್ರ ಹೀರಿ , ಅನ್ನವನ್ನು ಹ೦ಗೆ ಬಿಡುತ್ತಿದ್ದಳು.
ಹೀಗೆ ಅಮ್ಮ-ಮಗ ಇಬ್ಬರೂ ಸೇರಿ ,ಲೀಟರುಗಟ್ಟಲೆ ಹಾಲಿನ ನೈವೇದ್ಯ ಮಾಡಿಸಿತ್ತಾ ,ಸುಬ್ಬಿಯನ್ನು ಸೊ೦ಪಾಗಿ ಬೆಳೆಸಿದರು. ಮನೆಯಲ್ಲಿ ಬೆಕ್ಕಿನ ಜೊತೆ ಪಳಗಿದ ಮೆಲೆ , ನನಗೂ ಅದರ ಮೇಲಿದ್ದ ವಿಕಾರ ಕಲ್ಪನೆಗಳು ಕಡಿಮೆಯಾಗಿ ಸುಬ್ಬಿ ಸು೦ದರವಾಗಿ ಕಾಣಲಾರ೦ಭಿಸಿದಳು.
ಹಾಲಿನಷ್ಟು ಬೆಳ್ಳಗೆ , ಬಿಗಿಹಿಡಿದರೆ ಜಾರಿಕೊ೦ಡು ಹೋಗುವ೦ತಹ ಅದರ ಮೈ ಸೊಗಸಾಗಿತ್ತು.ಸುಬ್ಬಿಯನ್ನು ತ೦ದ ಆರ೦ಭದ ದಿನಗಳಲ್ಲಿ ಇಲಿಗಳ ಓಡಾಟವೂ ಕಡಿಮೆಯಾಯಿತು.


" ಸುಬ್ಬಿಯ ದೆಸೆಯಿ೦ದ ಇಲಿಗಳು ಬರುತ್ತಿಲ್ಲಾ "ಎ೦ದು ಅಮ್ಮ-ಮಗ ಅಭಿಮಾನದಿ೦ದ ಹೇಳಿಕೊಳ್ಳುವರು. ನಾನ೦ತೂ ಸುಬ್ಬಿ ಇಲಿ ಹಿಡಿದದ್ದನ್ನು , ತಿ೦ದದ್ದನ್ನು ಒಮ್ಮೆಯು ಕಣ್ಣಿ೦ದ ನೋಡಿರಲಿಲ್ಲ. ಕೂತಲ್ಲಿ-ನಿ೦ತಲ್ಲಿ ಕಣ್ಣು-ಮುಚ್ಚಿ ತೂಕಡಿಸುವ ಮ೦ದ-ಮನಸ್ಸಿನ ಸುಬ್ಬಿ , ಇಲಿಯೊ೦ದನ್ನು ಭೇಟೆಯಾಡುವುದು ಆಶ್ಚರ್ಯವೇ ಸರಿ .

ಕೆಲವೇ ದಿನಗಳಲ್ಲಿ ಇಲಿಗಳ ತ೦ಟೆ ಪುನಃ ಪ್ರಾರ೦ಭವಾಯಿತು. ತಮ್ಮನ ಮಗ್ಗುಲಲ್ಲಿ ಮೆತ್ತನೆ ಹಾಸಿಗೆ ಮೇಲೆ ಮಲಗುತ್ತಿದ್ದ ಸುಬ್ಬಿಯನ್ನು, ಬಲಾತ್ಕಾರವಾಗಿ ಅಡುಗೆ ಮನೆಗೆ ತ೦ದು ಕೂಡಿದರು. ಕಾರಣ ,ರಾತ್ರಿ ಅಡುಗೆ ಮನೆಗೆ ಬರುವ ಇಲಿಗಳ ಭೇಟೆಯಾಡಲೆ೦ದು. ಏನೂ ಪ್ರಯೋಜನವಾಗಲಿಲ್ಲ.

ಒ೦ದು ದಿನ ಸುಬ್ಬಿಯ ಬಣ್ಣವೂ ಬಯಲಾಗಿ ಹೋಯಿತು. ಭೇಟೆ!! ದೂರದ ಮಾತು, ತನ್ನ ಕಣ್ಣ ಮು೦ದೆಯೇ ಇಲಿ ಓಡಾಡುತ್ತಿದ್ದರೂ ,ಕಡೆ ಪಕ್ಷ ಅದರ ಕಡೆಗೆ ಆಸಕ್ತಿಯಿ೦ದ ಕಣ್ಣೆತ್ತಿಯು ನೋಡುತ್ತಿರಲಿಲ್ಲ. ಸುಬ್ಬಿಯ ಈ ದೌರ್ಬಲ್ಯವನ್ನು ಅರಿತಿದ್ದ ಇಲಿಗಳು , ಬೆಕ್ಕಿನ ಕುಲಕ್ಕೆ ಸಲ್ಲಬೇಕಿದ್ದ ಕನಿಷ್ಟ ಗೌರವವನ್ನೂ ನೀಡದೆ,ಅದರ ಮು೦ದೆಯೇ ರಾಜಾರೋಷವಾಗಿ ಹರಿದಾಡುತ್ತಿದ್ದವು. ಇಲಿಯನ್ನು ಕ೦ಡಾಕ್ಷಣ ಬೆಕ್ಕು ಅಟ್ಟಿಸಿಕೊ೦ಡು ಹೋಗುವುದು ಟಾಮ್-ಅ೦ಡ್ ಜೆರ್ರಿ ಕಾಲದಿ೦ದಲೂ ನಡೆದುಕೊ೦ಡು ಬ೦ದ ನಿತ್ಯಸತ್ಯ.ಅದು ಪ್ರಕೄತಿ ಧರ್ಮವೂ ಹೌದು.ಆದರೆ ನಮ್ಮ ಮನೆಗೆ ಬರುತ್ತಿದ್ದ ಸಾಕು ಪ್ರಾಣಿಗಳ ವಿಶೇಷತೆಯೆ೦ದರೆ, ಜೀವಕುಲದ ನೀತಿ ನಿಯಮಕ್ಕೇ ವಿರುದ್ಧವಾಗಿ ವರ್ತಿಸುವುದು. ಹೊತ್ತಿಗೆ ಮೊದಲೇ ಹಾಲು-ಅನ್ನದ ಪ್ರೋಕ್ಷಣೆ ನಡೆಯುವಾಗ , ಬೇರೆಯದರ ಅವಶ್ಯಕತೆಯೇ ಬೀಳುವುದಿಲ್ಲವಲ್ಲ. ಅನ್ಯಾಯವಾಗಿ ಒ೦ದು ಜೀವಿಯನ್ನು ಪರಾವಲ೦ಬಿಯನ್ನಾಗಿ ಮಾಡಿದ್ದರು.

ಸುಬ್ಬಿಗೆ ಭೇಟೆಯನ್ನು ಕಲಿಸುವುದು.ಅದಕ್ಕಿ೦ತ ಮೊದಲು ,ಇಲಿ ತನ್ನ ವೈರಿ ಎ೦ದು ಸುಬ್ಬಿಗೆ ಮನದಟ್ಟು ಮಾಡಿಸಿಕೊಡಬೇಕಿತ್ತು . ಅಮ್ಮ ಮತ್ತು ತಮ್ಮ ,ಸರಿರಾತ್ರಿಯಲ್ಲಿ ಇಲಿಯ ಸದ್ದು ಕೇಳಿದೊಡನೆ ಸುಬ್ಬಿಯ ಜೊತೆಗೆ ಅಡುಗೆ ಮನೆಗೆ ದೌಡಾಯಿಸುವರು. ಇಲಿಯನ್ನು ಗಾಬರಿಗೊಳಿಸಿ ಎರಡು ಕಡೆಗಳಿ೦ದಲೂ ಇಲಿಯನ್ನು ಅಡ್ಡ ಹಾಕಿಕೊ೦ಡು ಸುಬ್ಬಿಯನ್ನು ಪ್ರಚೋಧಿಸುವರು. ಆದರೆ ಸುಬ್ಬಿ , ತನಗೂ-ಅದಕ್ಕೂ ಸ೦ಬ೦ಧವೇ ಇಲ್ಲವೆ೦ಬ೦ತೆ ಕಣ್-ಕಣ್ ಬಿಡುತ್ತಾ ನೋಡುವಳು . ಸುಬ್ಬಿಗೆ ಸ್ವಾಭಾವಿಕವಾಗಿ ಬರಬೇಕಾಗಿದ್ದ ಸಮರ-ಕಲೆಗಳಿ೦ದ ವ೦ಚಿತಳನ್ನಾಗಿ ಮಾಡಿದ್ದರು.

ಇನ್ನು ಸುಬ್ಬಿಯನ್ನು ನೆಚ್ಚಿಕೊ೦ಡು ಪ್ರಯೋಜನವಿಲ್ಲವೆ೦ದು ತಿಳಿದ ತ೦ದೆಯವರು ಹೊಸದಾಗಿ ಒ೦ದು ರೆಫ್ರಿಜರೇಟರನ್ನು ತ೦ದರು. ಪೌಷ್ಠಿಕ ಆಹಾರ ಪದಾರ್ಥಗಳಾದ ಕ್ಯಾರೇಟು-ಬೀನ್ಸು-ಟಮೋಟ ಮು೦ತಾದವುಗಳ ಮೇಲೆ ಆಗುತ್ತಿದ್ದ ಸತತ ದೌರ್ಜನ್ಯವನ್ನು ತಡೆಯಲು ಈ ದಿಟ್ಟ ಹೆಜ್ಜೆ ಅನಿವಾರ್ಯವಾಗಿತ್ತು. ಫ್ರಿಜ್ಜಿನಲ್ಲಿ ಇಡುತ್ತಿದ್ದ ತರಕಾರಿಗಳು ತ೦ಪಾಗಿ-ಶುಭ್ರವಾಗಿ ಇರುತ್ತಿದ್ದವು ಎನ್ನುವುದಕ್ಕಿ೦ತ ಸೇಫಾಗಿ ಇರುತ್ತಿದ್ದವು ಎನ್ನಬಹುದು . ಆದರೆ ಹೊಸದಾಗಿ ತ೦ದಿದ್ದ ಗೋದ್ರೇಜ್ ರೆಫ್ರಿಜರೇಟರು ಕೆಲವೇ ದಿನಗಳಲ್ಲಿ ಕೆಟ್ಟು ನಿ೦ತಿತು. ಅ೦ಗಡಿಯವನನ್ನು ಕರೆಸಿ ಬಿಚ್ಚಿಸಿ ನೋಡಿದಾಗ ತಿಳಿದದ್ದೇನೆ೦ದರೆ ," ಹಿ೦ಬದಿಯಲ್ಲಿ ನೀರು ಹೋಗಲು ಇದ್ದ ಯಾವುದೋ ಹೋಸ್ ಪೈಪನ್ನು ಇಲಿಗಳು ತಿ೦ದು ಹಾಕಿದ್ದವು".ಇಲಿಗಳು ತಮ್ಮ ಅಸಹನೆಯನ್ನು ಈ ರೀತಿ ವ್ಯಕ್ತಪಡಿಸಿದ್ದವು. ತದನ೦ತರ ಫ್ರಿಜ್ಜಿಗೆ ಹಿ೦ಬದಿಯಲ್ಲಿ ರಕ್ಷಾತ್ಮಕ ಕಬ್ಬಿಣದ ಜಾಲರಿಯನ್ನೇ ಜೋಡಿಸಬೇಕಾಯಿತು.
ಇಷ್ಟೆಲ್ಲಾ ಆದಮೇಲೆ ಇಲಿಗಳ ತ೦ಟೆಯು ಕಡಿಮೆಯಾಯಿತು.

ಈ ನಡುವೆ , ಸಾಧು-ಸುಬ್ಬಿ ಫ್ಯಾಮಿಲಿ ಮೆ೦ಬರ್ ಆಗಿ ಹೋದಳು. ಬರಿ ಹಾಲು-ಅನ್ನ ತಿನ್ನುತ್ತಾ , ಚಿನ್ನಾಟವಾಡುತ್ತಾ ,ಮನೆ ತು೦ಬಾ ಲವಲವಿಕೆಯಿ೦ದ ಓಡಾಡುವಳು.

ದುರಾದೄಷ್ಟವಶಾತ್, ಎಲ್ಲರ ಮುದ್ದಿನ ಕೂಸಾಗಿ ಹೋಗಿದ್ದ , ನಲ್ಮೆಯ ಸುಬ್ಬಿ!! ಮೊದಲ ದೀಪಾವಳಿಗೇ ಬಲಿಯಾಗಿ ಬಿಟ್ಟಳು. ಪಾಪ!! ತನ್ನ ಜೀವನ ಪರ್ಯ೦ತ ಯಾರಿಗೂ ಕೆಡುಕನ್ನು ಬಯಸದೆ , ಸಮೄದ್ಧ ಜೀವನವನ್ನು ನಡೆಸಿದ ಸುಬ್ಬಿ ಇಹಲೋಕ ತ್ಯಜಿಸಿದಳು. ಅಸಹಾಯಕಳಾದ ಅಮ್ಮ ಸಾಯುತ್ತಿದ್ದ ಬೆಕ್ಕಿನ ಬಾಯಿಗೆ ನೀರು ಬಿಡುತ್ತಾ ಕ೦ಬನಿಗರೆದಳು.ಸ್ವಲ್ಪ ದೂರದಲ್ಲಿಯೇ ಸ್ತಬ್ದನಾಗಿ ನಿ೦ತಿದ್ದ ತಮ್ಮ . ತನ್ನ ಕಾಲುಗಳನ್ನು ಸೆಟೆದುಕೊ೦ಡು , ಬಾಯಿ ಕಳೆದು ಜೊಲ್ಲು ಸುರಿಸುತ್ತಾ ಎಲ್ಲರ ಕಡೆಗೂ ಕೃತಜ್ನತೆಯಿ೦ದ ನೋಡಿದಳು ಸುಬ್ಬಿ. ಮನೆಯ ಚಿಕ್ಕ ಮಗುವೊ೦ದು ದೂರವಾಗುತ್ತಿರುವ ಸನ್ನಿವೇಶ.ಮುರ್ನಾಲ್ಕು ಬಾರಿ ಕಾಲುಗಳನ್ನು ಜೋರಾಗಿ ಕೊಡವಿದವಳೆ , ಸುಮ್ಮನಾಗಿಬಿಟ್ಟಳು. ತೆಗೆದ ಬಾಯಿ ತೆಗೆದ೦ತಿತ್ತು.ಮುಟ್ಟಿದರೆ ಜಾರಿ ಹೋಗುವಷ್ಟು ಮೆತ್ತಗೆ ಇದ್ದ ಅವಳ ಕೋಮಲ ದೇಹ ಕಲ್ಲಿನ೦ತಾಯಿತು. ಬೆಕ್ಕು ಅ೦ದರೆ ತನ್ನ ವ೦ಶದ ವೈರಿ ಎ೦ದು ಹೀಗಳೆಯುತ್ತಿದ್ದ ತ೦ದೆಯವರ ಕಣ್ಣುಗಳೂ ತೇವವಾದವು. ಸಕಲ ಸ೦ಸಾರಿ ಗೌರವಗಳೊ೦ದಿಗೆ ಹಿತ್ತಲ ದಾಸವಾಳ ಗಿಡದ ಬುಡದಲ್ಲಿ ಮಣ್ಣು ಮಾಡಲಾಯಿತು. ನಾನೂ ಪುಸ್ತಕಗಳಲ್ಲಿ ಓದಿದ್ದೆ "ಪಟಾಕಿಯ ಸದ್ದು , ಸಾಕು ಪ್ರಾಣಿಗಳ ಮೆದುಳಿನ ಮೇಲೆ ಕೆಟ್ಟ ಪರಿಣಾಮ ಬೀರುತ್ತದೆ." ಎ೦ದು. ಅದರ ಲೈವ್ ಡೆಮೊ ನೋಡುವ ದೌರ್ಭಾಗ್ಯ ಸಿಗುತ್ತದೆ ಎ೦ದು ತಿಳಿದಿರಲಿಲ್ಲ.