ಭ್ರಷ್ಟಾಸುರ ಮರ್ದನವಾಗಲಿ

ಸತತ ನಿರಂತರ ಸತ್ಯಾನ್ವೇಷಣ
ವ್ರತವಾಗಲಿ ಅದು ಸರ್ವ ಜನ
ಪಾಲನೆಯಾಗಲಿ ಧ್ಯೇಯದ ಪಥದಲಿ
ಸಾಗುತಲಿರಲಿ ದೇಶ ಜನ ||

ಸ್ವಾರ್ಥಕೆ ದುಡಿಯುವ ಮಂದಿಯ ಸಹಿಸದು
ಇತಿಹಾಸಕೆ ಬೇಕೊಳ್ಳೆತನ 
ಮಾತ್ರವೇ ಉಳಿವುದು ಗಾತ್ರಗಳಳಿವುದು
ಎಂಬುದನರಿತಿರಲೆಲ್ಲ ದಿನ  ||

ದುಡಿದವರನು ಛೀ ಥೂ ಎನ್ನುವ ಸಿರಿ
ಬರಿ ಮರುಳಾಟಿಕೆ ಅಹಮಿಕೆಯು
ಮರುಗುವ ಪರಿಗದು ಕಾರಣವಾಗುವ
ತಿಳುವಳಿಕೆಯು ಬೇಕೆಲ್ಲರಲು ||

ನಯವಂಚಕರನು ಜೈಲಿಗೆ ತಳ್ಳಲು
ನಿಷ್ಟುರ ನಿಷ್ಠೆಯು ನ್ಯಾಯದೊಳು
ಅಧಿಕಾರದ ದುರ್ಬಳಕೆಗೆ ಶಾಸ್ತಿಯು
ಆಗಲೇ ಬೇಕಿದೆ ದೇಶದೊಳು ||

ಅಣ್ಣ ಹಜಾರೆಯ ಹೋರಾಟವು ಫಲ
ನೀಡಲಿ ಭಾರತ ಯುವಕರಲಿ
ಭ್ರಷ್ಟಾಸುರ ಮರ್ದನಕೆಂದೇ ಛಲ
ಮೂಡಲಿ ತರುಣರ ಹೃದಯದಲಿ ||

                                                 - ಸದಾನಂದ