ಶ್ವಾನ ಪುರಾಣಮ್

ಶ್ವಾನ ಪುರಾಣಮ್

                       ಪ್ರಾಯಶಃ ಮನುಷ್ಯನ ಭಾವನೆಗಳನ್ನು ಅವನ ನಂತರ ತನ್ನದೇ ರೀತಿಯಿಂದ ಸರಿಯಾಗಿ ಅರ್ಥ ಮಾಡಿಕೊಳ್ಳುವ ಸನಿಹದ  ಜೀವಿ ಎಂದರೆ ಶ್ವಾನವೇ ಅನ್ನಿಸುತ್ತೆ ನನಗೆ. ನಿರ್ಮಲ ಅಂತಕರಣದ ಈ ಜೀವಿ ಪ್ರೀತಿಯೊಂದನ್ನು ಮಾತ್ರ ನಮಗೆ ಕೊಡ ಬಲ್ಲುದು ಅದೂ ನಿರ್ವಾಜ್ಯವಾಗಿ. ನನಗೆ ಲೂಯಿ ಬಗೆಗೆ ಅತ್ಯಂತ ಅಕ್ಕರೆ ಕಾಳಜಿ ಬರಲು ಕಾರಣ ಬೇರೆಯೇ ಇದೆ.

ನಮ್ಮ ಮನೆಯವರೆಲ್ಲರನ್ನೂ ತನ್ನ ಪ್ರೀತಿಯಿಂದ ಮನೆಯ ಒಂದು ಮುಖ್ಯ ಸದಸ್ಯಳಾಗಿ ಇಡೀ ಮನೆಯನ್ನ ತನ್ನ ಆಳ್ವಿಕೆಗೆ ಒಳ ಪಡಿಸಿಕೊಂಡವಳಿದ್ದಾಳೆ. ನಮ್ಮೆಲ್ಲರನ್ನು ತನ್ನ ಚೇತೋ ಹಾರೀ ಚೇಷ್ಟೆಗಳಿಂದ ನಗಿಸಿ ಅಳಿಸಿದ ಮನೆ ಮಗಳು ಅವಳೇ "ಆಲಿವ್". ಚಿಕ್ಕವಳಿರುವಾಗ ನನ್ನ ತೊಡೆ ಮೇಲೆ ಮಲಗಿಸಿಕೊಂದು ಪೂಪ್ ಸೀ ಬಾಟಲಿಯಲ್ಲಿ ಹಾಲು ಕುಡಿದವಳು. ಎರಡು ವರ್ಷವಾದಾಗ ಕೂಡಾ ನಾನು ನೆಲದಲ್ಲಿ ಕುಳಿತರೆ ಮತ್ತೆ ನನ್ನ ತೊಡೆ ಮೇಲೆಯೇ ಕುಳಿತು ಕೊಳ್ಳಲು ಬರುವವಳು ಆದರೆ ಆಗ ಎಷ್ಟು ಬೆಳೆದಿದ್ದಳೆಂದರೆ ಅವಳ ಅರ್ಧ ಭಾಗ ಈ ಕಡೆಯಿಂದ, ಮುಖ ಈ ಕಡೆಯಿಂದ ಹೊರಗಿರುತ್ತದೆ . ಆದರೂ ಬೇರೆ ಯಾರನ್ನೂ ಅವಳೆದುರಿಗೆ ಪ್ರೀತಿ ಮಾಡಲು ಬಿಡಳು. ಮನೆಗೆ ಐಸ್ ಕ್ರೀಮ್ ಮತ್ತು ಕಶ್ಮೀರಿ ನಾನ್ ಯಾವುದೇ ರೀತಿಯಲ್ಲಿ ಅಡಗಿಸಿಕೊಂಡು ತಂದರೂ ಅವಳ ಪಾಲು ಮೊದಲು ತೆಗೆದಿಡಬೇಕಾದದ್ದೇ ಅವಳ ನ್ಯಾಯ. ಮಂಜು ಗಡ್ಡೆಯ ಚೂರು ಕೊಟ್ಟರೆ ಕರಕರನೆ ಒಂದೇ ಕ್ಷಣದಲ್ಲಿ ಮೂಗಿನಿಂದ ನೀರು ವಸರುತ್ತಿದ್ದರೂ ಬಿಡಳು. ನ್ಯೂಟ್ರಿಲಾ ದ ಸೋಯಾಬಿನ್ ಅವಳಿಗೆ ಪ್ರಾಣ.