ಮರಳು ಗಾಡು ( ಕವನ )

ಮರಳು ಗಾಡಲಿ ನಿಂತು ಮರೀಚಿಕೆಯ ಬೆಂಬತ್ತಿ

ಓಡುತಿರುವವನೆಂದು ನಗುವಿರೇಕೆ ?

ವ್ಯಂಗ್ಯವಾಡುವಿರೇಕೆ ? ಸಮೃದ್ಧ ಗಂಗೆಯ

ತಟದಲಿ ನೆಲೆ ನಿಂತ ನಿಮಗೇನು ಗೊತ್ತು

ಬಾಯಾರಿಕೆ ದಾಹಗಳ ಕಟು ಅನುಭವ !

ನಾ ಹುಟ್ಟಿ ಬೆಳೆದು ಆಡಿ ಕನಸಿದ್ದು

ಎಲ್ಲ ಈ ಮರಳುಗಾಡಲ್ಲೆ

ಸಾಗಿದೆ ಮರಭೂಮಿಯಲ್ಲಿ ಕಾರವಾನ

ಎಂದಾದರೊಂದು ದಿನ ಹಿಡಿಯುವೆ ಮರೀಚಿಕೆ

ತಣಿಸುವೆ ಮರಳುಗಾಡಿನ ದಾಹ

ಮುಸಿ ಮುಸಿ ನಗು ಎಕೆ ? ವ್ಯರ್ಥ ಕನಸೆಂದೆ ?

ಸಮೃದ್ಧ ನೆಲೆ ಕಂಡು ತಾಯ್ನೆಲ ತೊರೆದು

ವಲಸೆ ಹೋಗುವ ವಲಸೆ ಹಕ್ಕಿ ನಾನಲ್ಲ

ಜನನಿ ಜನ್ಮಭೂಮಿ ಸ್ವರ್ಗಕೂ ಮಿಗಿಲೆನುವ

ಈ ನೆಲದ ಅಪ್ಪಟ ಅಭಿಮಾನಿ ನಾನು

ವಿಜಯ ಲಕ್ಷ್ಮಿಯ ಒಲುಮೆ ಸಾಹಸಿಗೆ

ಕನಸುಗಾರನಿಗೆ ಸಂಕಲ್ಪಮಾಡಿ

ತಪಗೈದು ಭಗಿರಥನ ಕರೆತಂದು

ಗಂಗೆಯನು ಹರಿಸಿ ನಂದನವಾಗಿಸುವೆ

ಈ ನನ್ನ ಮರಳುಗಾಡನ್ನು