ಆಕ್ಸಿಡೆಂಟ್

ಪುತ್ತೂರು-ಸುಳ್ಯ ನಡುವೆ "ಆನೆಗುಂಡಿ" ಎಂಬ ರುದ್ರ ರಮಣೀಯ ಸ್ಥಳ ಸಿಗುವುದು. ಅನೇಕ ಬಾರಿ ಈ ದಾರಿಯಲ್ಲಿ ಹೋಗಿ ಬಂದಿದ್ದರೂ, ನನಗೆ ಗೊತ್ತೇ ಇರಲಿಲ್ಲ. ಕಳೆದ ತಿಂಗಳ ಮೊದಲವಾರ ನಾನು ದಕ್ಷಿಣ ಕನ್ನಡದ ಟೂರ್ ಮುಗಿಸಿ ಬರುವಾಗ ಅದರ ಪರಿಚಯವಾಯಿತು.

ಹಿಂದಿನ ದಿನವೂ ಅದೇ ದಾರಿಯಲ್ಲಿ ಎರಡು ಬಾರಿ ನನ್ನ ಕಾರಲ್ಲಿ ಹೋಗಿ ಬಂದಿದ್ದೆ. ಆ ದಿನ ಮಳೆ ಸ್ವಲ್ಪ ಜೋರಾಗೇ ಇತ್ತು. ನಾನು ಕಾರಿನ ಸ್ಟೇರಿಂಗ್ ತಿರುಗಿಸುತ್ತಿದ್ದರೂ ತಿರುಗದೇ...ಬ್ರೇಕ್ ಸಹ ಹಿಡಿಯದೇ ನೇರ ಹೋಗಿ ಎದುರುಗಡೆಯಿಂದ ಬರುತ್ತಿದ್ದ ಬಸ್ಸಿಗೆ ಕಾರು ಗುದ್ದಿತು.

ನನಗೆ ಅರೆಕ್ಷಣ ಏನು ಮಾಡಬೇಕೆಂದೇ ಗೊತ್ತಾಗಲಿಲ್ಲ..ಒಂದು ತರಹ ಶಾಕ್ ಸ್ಥಿತಿಯಲ್ಲಿದ್ದೆ. (ನನ್ನ "ಡ್ರೈವಿಂಗ್ ಇತಿಹಾಸ"ದಲ್ಲೇ ಒಂದು ಸಣ್ಣ ಆಕ್ಸಿಡೆಂಟ್ ಸಹ ಮಾಡಿರಲಿಲ್ಲ. ಎಲ್ಲಿಗೆ ಹೋಗುವಾಗಲೂ ಗಾಡಿಯನ್ನು ಸರ್ವಿಸ್‌ಗೆ ಕೊಟ್ಟು ಉತ್ತಮ ಕಂಡೀಷನ್‌ನಲ್ಲೇ ತೆಗೆದುಕೊಂಡು ಹೋಗುವುದು. ಶಿರಾಡಿ ಘಾಟಿ ತೀರಾ ಹದಗೆಟ್ಟ ಸಮಯದಲ್ಲೇ, ರಾತ್ರಿ ಹೊತ್ತು ಕಾರು ಬಿಟ್ಟುಕೊಂಡು ಹೋಗಿದ್ದೆ. ಈಗ ನನ್ನಿಂದ ಆಕ್ಸಿಡೆಂಟ್!)

ಪಕ್ಕದ ಸೀಟಲ್ಲಿ ಕುಳಿತ ಮಗಳನ್ನು ನೋಡಿದೆ. ಗಾಬರಿಯಾಗಿದ್ದು ಬಿಟ್ಟು ಗಾಯವೇನೂ ಕಾಣಿಸಲಿಲ್ಲ. ಹಿಂದೆ ತಿರುಗಿ ನೋಡಿದಾಗ, ನಮ್ಮ ಜತೆ ಬಂದಿದ್ದ ಸಂಬಂಧಿಯೊಬ್ಬರಿಗೆ ಹಣೆಯಲ್ಲಿ ಗಾಯವಾಗಿ ರಕ್ತ ಸುರಿಯುತ್ತಿದ್ದುದು ಕಾಣಿಸಿತು. ಕೂಡಲೇ ಎದ್ದು ಹೊರಗೆ ಬಂದು (ಅವರೂ ಹೊರಗೆ ಬಂದರು) ಅವರಿಗೆ ಟವಲನ್ನು ಹಣೆಗೆ ಒತ್ತಿ ಹಿಡಿಯಲು ಕೊಟ್ಟೆ. ಆಗಲೇ ಬಸ್ಸಲ್ಲಿದ್ದವರೆಲ್ಲಾ ಓಡಿ ಬಂದರು. ಅವರು ಬಂದು ನನ್ನನ್ನು ವಿಚಾರಿಸಿದಾಗಲೇ, ನನಗೆ ಏನೂ ಆಗಿಲ್ಲ ಎಂಬ ಅರಿವಾಯಿತು.

ಮಗಳ ಬದಿ ಬಾಗಿಲು ಜಾಮ್ ಆಗಿದ್ದರಿಂದ ಕಿಟಕಿಯ ಗಾಜನ್ನು ಒಡೆದು ಮಗಳನ್ನು ಜನ ಎತ್ತಿ ಹೊರತೆಗೆದರು. ಯಾರೋ ಒಬ್ಬರು ಫೋನ್ ಮಾಡಿ ಸಮೀಪದ ಊರಿನವರಿಗೆ ತಿಳಿಸಿದರು. ಕೂಡಲೇ ಖಾಲಿ ಜೀಪಲ್ಲಿ ಒಬ್ಬರು ಸ್ಥಳಕ್ಕೆ ಬಂದು, ಸಾಮಾನೆಲ್ಲಾ ಜೀಪಿಗೆ ಹಾಕಿ, ನನ್ನನ್ನು ಬಿಟ್ಟು ಉಳಿದವರೊಂದಿಗೆ ಪುತ್ತೂರಿಗೆ ಹೋದರು.

ನನ್ನ ಸಂಬಂಧಿಗಳಿಗೆ ವಿಷಯ ತಿಳಿಸಲು, ನನ್ನ ಮೊಬೈಲಲ್ಲಿ ರೇಂಜೇ ಸಿಗದಿದ್ದರಿಂದ, ಯಾರೋ ಒಬ್ಬರು ಅವರ ಮೊಬೈಲ್ ಕೊಟ್ಟರು.

ಕೆಲವರು ಕಾರಿನವರು ಸೈಡ್‌ಗೆ ತಂದು ನಿಲ್ಲಿಸಿ, ನೀರು/ಬಿಸ್ಕಿಟ್ ಇತ್ಯಾದಿ ಕೊಟ್ಟು ಏನಾದರೂ ಸಹಾಯ ಬೇಕಾ ಎಂದು ವಿಚಾರಿಸಿದರು. ಪುತ್ತೂರಿಗೆ ಹೋದವರೆಲ್ಲಾ ಕ್ಷೇಮವಾಗಿರುವರು, ಯಾರಿಗೂ ಗಂಭೀರ ಗಾಯಗಳಾಗಿಲ್ಲ, ನಮ್ಮ ಸಂಬಂಧಿಗಳು ಅಲ್ಲಿಗೆ ಬಂದಿರುವರು. ಅಲ್ಲಿನ ಬಗ್ಗೆ ಚಿಂತೆ ಬೇಡ. ಒಂದಿಬ್ಬರು ಸಂಬಂಧಿಗಳು ಸ್ಥಳಕ್ಕೆ ಬರುತ್ತಿದ್ದಾರೆ.ಚಿಂತಿಸಬೇಡಿ...ಎಂದು ಫೋನ್ ಬಂತು.

ಬಸ್ಸಿನವರದೇನೂ ತಪ್ಪಿಲ್ಲದಿರುವುದರಿಂದ, ಬಸ್ಸಿಗೆ ಹಾನಿಯೂ ಆಗದಿದ್ದುದರಿಂದ, ಬಸ್ಸನ್ನು ತೆಗೆಯಲು ಒಪ್ಪಿದೆ. ಜನರೆಲ್ಲಾ ಸೇರಿ, ಕಾರನ್ನು ಎತ್ತಿ ಸೈಡಿಗೆ ಇಟ್ಟರು. ಅಲ್ಲಿನವರ ಪ್ರಕಾರ ಅಲ್ಲಿ ಒಂದಲ್ಲ ಒಂದು ಆಕ್ಸಿಡೆಂಟ್ ಆಗುತ್ತಲೇ ಇದೆಯಂತೆ-   http://www.daijiworld.com/news/news_disp.asp?n_id=77613&n_tit=Sullia%3A+Celebrations+Turn+into+Mourning+as+Groom%2C+Four+Others+Die+in+Accident

ಪರಿಹಾರಕ್ಕಾಗಿ ಹೋಮ ಸಹ ಮಾಡಿರುವರಂತೆ...

ನನ್ನ ತಂದೆಯ ಚಿಕ್ಕ ತಮ್ಮನವರು ಬಂದು, ಕಾರನ್ನು ಸಾಗಿಸುವುದು... ಇತ್ಯಾದಿ ಎಲ್ಲಾ ವ್ಯವಸ್ಥೆ ಮಾಡಿದರು. ನನ್ನ ಬಾವಂದಿರೂ ಸಹ ಸಹಾಯಕ್ಕೆ ಬಂದರು. ನಮ್ಮವರನ್ನು ಕರಕೊಂಡು ಹೋಗಿದ್ದ ಜೀಪಿನವರು, ಸಂಬಂಧಿಗಳು ಬಂದ ಮೇಲೆ ಜೀಪಲ್ಲಿದ್ದ ಸಾಮಾನೆಲ್ಲಾ ಅವರ ಕಾರಿಗೆ ವರ್ಗಾಯಿಸಿ,ಹಿಂದೆ ಬಂದು ಅಲ್ಲಿ ಎಲ್ಲರೂ ಕ್ಷೇಮವಾಗಿದ್ದಾರೆ ಎಂದು ಸಮಾಧಾನ ಹೇಳಿ ಹೋದರು.

ಇನ್ನು ಆಕ್ಸಿಡೆಂಟ್ ಆದ ಸ್ಥಳದ ಬಗ್ಗೆ- ಅಂತಹ ಕಷ್ಟದ ತಿರುವೇನೂ ಅಲ್ಲ. ರಸ್ತೆ ಸಹ ಅಗಲವಾಗಿದೆ. ಡಾಮರ್ ಹಾಕಿದ ಇಳಿಜಾರಿನ ರೀತಿ ಸರಿಯಿರಲಿಕ್ಕಿಲ್ಲ ಅನಿಸುತ್ತದೆ. ಯಾಕೆಂದರೆ-ನನ್ನ ಕಾರು ಆಕ್ಸಿಡೆಂಟ್ ಆದ ಸ್ವಲ್ಪ ಸಮಯದ ನಂತರ ಇನ್ನೊಂದು ಕಾರೂ ಸಹ ಅದೇ ರೀತಿ ಬಂದಿತು...ಪುಣ್ಯಕ್ಕೆ ಸರಿಯಾದ ಸಮಯಕ್ಕೆ ಬ್ರೇಕ್ ಹಿಡಿದು ಸೈಡಿಗೆ ತೆಗೆದುಕೊಂಡ. ಹಲಸಿನಹಣ್ಣು +ನನ್ನ ( :) ) ಭಾರ..ಕಾರಿಗೆ ಲೋಡ್ ಜಾಸ್ತಿ ಆಯ್ತು ಕಾಣುತ್ತದೆ. ಅಲ್ಲಿ ಆದ ಇನ್ನೆರಡು ಆಕ್ಸಿಡೆಂಟ್ ಸಹ (ಕೊಂಡಿಯಲ್ಲಿ ಕೊಟ್ಟದ್ದು) ಒಂದು ಮದುವೆ ಪಾರ್ಟಿ(ಲೋಡ್ ಇರಲೇಬೇಕಲ್ಲಾ..) ಇನ್ನೊಂದು ಭಾರೀ ವಾಹನ.

ನನಗೆ ಆ ಸಮಯದಲ್ಲಿ ಸಹಾಯ ಮಾಡಿದ ಬಸ್ಸಿನ ಡ್ರೈವರ್( ಕಾರು ಕಂಟ್ರೋಲ್ ತಪ್ಪಿರುವುದನ್ನು ಗಮನಿಸಿ ಬಸ್ಸನ್ನು ಬ್ರೇಕ್ ಹಾಕಿ ನಿಲ್ಲಿಸಿದ್ದ)ನಿಂದ ಹಿಡಿದು ಎಲ್ಲರಿಗೂ ನನ್ನ ತುಂಬು ಹೃದಯದ ಕೃತಜ್ಞತೆಗಳು. 

http://www.tunturu.com/archives/1843

-ಗಣೇಶ.