ಸ್ವಾತಂತ್ರ

ಸ್ವಾತಂತ್ರ

   

ಬಂದಿದೆ ಬಂದಿದೆ ಸ್ವಾತಂತ್ರ !
ಯಾರಿಗೆ ಬಂದಿದೆ ಎಲ್ಲಿಗೆ ಬಂದಿದೆ
ಏತಕೆ ಬಂದಿದೆ ಸ್ವಾತಂತ್ರ !
ದೇಶಕೆ ಇಲ್ಲದ ಕೋಶಕೆ ಇಲ್ಲದ
ಜನ ಸಾಮಾನ್ಯನಿಗಿಲ್ಲದ ಸ್ವಾತಂತ್ರ !

ಆರ್ಯರು ಹೋದರು ಅರಸರು ಬಂದರು
ಮೊಗಲರು ಹೋದರು ಆಂಗ್ಲರು ಬಂದರು
ಬಂದಿತು ಜನತೆಗೆ ಸ್ವಾತಂತ್ರ್ಯ
ಜಗದೋದ್ಧಾರದ ಮಂತ್ರವ ಪಠಿಸಿ
ಮೊಸಳೆಯ ಕಣ್ಣೀರನು ಸುರಿಸಿ
ಗಾಂಧಿಯ ಮೇಲೆ ಆಣೆಯನಿಟ್ಟು
ಹಿಡಿದರು ದೇಶದ ಚುಕ್ಕಾಣಿ

ದೇಶೋದ್ದಾರಕೆ ಪಣ ತೊಟ್ಟವರು
ಅವನಾ ಪಕ್ಷ ಇವನಾ ಪಕ್ಷ
ಶೋಷಕರವರು ಶೋಷಿತರಿವರು
ಬಡವರು ಇವರು ಬಲ್ಲಿದರವರು
ಸ್ಪೃಶ್ಯರು ಇವರು ಅಸ್ಪೃಶ್ಯರು ಅವರು
ಮಾಲಿಕರಿವರು ಕಾರ್ಮಿಕರವರು
ಎಂದೊಡೆದಾಳಿದರು ಜನಮನ

ಆಡುವುದೊಂದು ಮಾಡುವುದೊಂದು
ಅಧಿಕಾರದ ಗದ್ದುಗೆಯಲಿ ಎಲ್ಲರು ಒಂದೆ
ಬಿಗಿದರು ಭಾಷಣ ಮೇಜನು ಕುಟ್ಟಿ
ತಾವೊಬ್ಬರೆ ಉದ್ಧಾರಕರೆಂದು
ನಂಬಿದ ಮುಗ್ಧರು ಓಟನು ಕೊಟ್ಟರು
ಆರಿಸಿ ತಂದರು ಆಗಾಗ
ಬದುಕು ಹಸನಾಗುವುದು ಎಂದು
ಕಾಯುತಲಿರುವರು ಇಲ್ಲೀಗ


ಕಣ್ಣೆವೆ ಮುಚ್ಚದೆ ಕಾದೇ ಕಾದರು
ಕನಸು ನನಸಾಗುವುದೆಂದು
ದಟ್ಟ ಕಾರಿರುಳು ಸರಿಯಲೆ ಇಲ್ಲ
ಕಾಣದ ದಾರಿ ಕತ್ತಲೆ ರಾತ್ರಿ
ಚಲಿಸದೆ ಕಾಲ ನಿಂತಿದೆ ಇಲ್ಲಿ

ಬಾಲ್ಯದ ಮುಗ್ಧತೆ ಜಾರಿತು ಇಲ್ಲಿ
ಹರೆಯವು ಕಳೆಯಿತು ನಿರೀಕ್ಷೆಯಲ್ಲಿ
ಕಳೆಯಿತು ಬಾಲ್ಯ ಮುರುಟಿತು ಹರೆಯ
ವೃದ್ಧಾಪ್ಯದ ಛಾಯೆ ಹರಡಿದೆ ಇಲ್ಲಿ
ಕಳೆಯಿತು ಸುಮ್ಮನೆ ದಿನಮಾನ
ಹೋಯಿತು ಅರ್ಧ ಶತಮಾನ

ಕನಸಿದ ಕನಸು ನನಸಾಗಲೆ ಇಲ್ಲ
ಬಿಳಿ ಮೋಡ ಕರಿಗಟ್ಟಲೆ ಇಲ್ಲ
ಆಶೆಯ ಬೀಜ ಫಲಿಸಲೆ ಇಲ್ಲ
ಬಂಜರು ಭೂಮಿ ದುರ್ಬಲ ಬೀಜ
ಗಾಳಿ ಬೆಳಕು ನೀರುಗಳಿಲ್ಲ
ಬಿತ್ತಿದ ಬೀಜ ಮೊಳೆಯಲೆ ಇಲ್ಲ
ಕನಸಲಿ ಹುಟ್ಟಿ ಕನಸಲೆ ಬೆಳೆದು
ಕನಸು ನನಸಾಗದೆ ಸಾಯುವುದಿಲ್ಲಿ

ಒಳ್ಳೆಯ ದಿನಗಳು ಬರಬಹುದೆಂದು
ನೋಡುತಲಿರುವರು ಕೆಂಪು ಕೋಟೆ
ದೊರೆಗಳು ಬಂದರು
ದೊರೆಸಾನಿಯು ಬಂದಳು
ಬಿಗಿದರು ಭಾಷಣ ಉದ್ದುದ್ದ
ಹರಿಯಿತು ಭರವಸೆಗಳ ಮಹಾಪೂರ

ಕನಸಿದ ಮೋಡ ಕಟ್ಟಲೆ ಇಲ್ಲ
ಆಶೆಯ ಮಳೆ ಸುರಿಯಲೆ ಇಲ್ಲ
ಆದರೂ ಬಂದಿದೆ ಸ್ವಾತಂತ್ರ್ಯ
ಅರ್ಥವಿಲ್ಲದ ಸ್ವಾತಂತ್ರ್ಯ

           **
 

Rating
No votes yet

Comments