ಪುಟಾಣಿ ಲಂಗದ ಜಪಾನಿ ಬೊಂಬೆ

 ಬಗೆ ಬಗೆ ಕನಸನು ಮನಸಲಿ ತುಂಬುವ

ಹೊಸ ಹೊಸ ಆಟಿಗೆ ಮಾರಲು ತಂದಿಹೆ

ಗಿರಿ ಗಿರಿ ತಿರುಗುವ ಬಣ್ಣದ ಬುಗುರಿ

ಸರಿಗಮ ಸದ್ದಿನ ಬಿದಿರಿನ ಬಾಸುರಿ

ಕಣ್ಣಿನ ರೆಪ್ಪೆಯ ರಪ್ಪನೆ ಮುಚ್ಚುವ

ಪುಟಾಣಿ ಲಂಗದ ಜಪಾನಿ ಗೊಂಬೆ

ಹೊಸ ಹೊಸ ರೀತಿಯ ಕೀಲಿಯ ಗೊಂಬೆ

ಮಕ್ಕಳಿಗೆಂದೇ ಮಾರಲು ಬಂದೆ

ಲಾಗವ ಹಾಕುವ ಮಂಗನ ಜೋಡಿ

ತಿರ್ರನೆ ತಿರುಗುವ ತಿರುಸಿನ ಬಂಡಿ

ಧಡಧಡ ಸದ್ದಿನ ಮುದ್ದಿನ ಆನೆ

ಮುಸುಮುಸುಗುಟ್ಟುವ ಅಡವಿಯ ಕಡವೆ

ದೂರದ ದೇಶದ ದುಬಾರಿ ಗೊಂಬೆ

ನಮ್ಮಯ ಮಕ್ಕಳಿಗೆಂದೇ ತಂದೆ

ಸರ ಸರ ಹರಿಯುವ ಹಸಿರಿನ ಹಾವು

ತರ ತರ ಬಣ್ಣದ ಸುಂದರ ಹೂವು

ಇಲಿಯನು ಹಿಡಿಯುವ ಸೊಕ್ಕಿನ ಬೆಕ್ಕು

ಬೆಕ್ಕಿನ ಹಾಲಿಗೆ ಬೆಲ್ಲದ ಮುಕ್ಕು

ಬಗೆಬಗೆ ಗೊಂಬೆಯ ಬುಟ್ಟಿಯ ಹೊತ್ತು

ಮಾರಲು ನಮ್ಮಯ ಹೊಟ್ಟೆಗೆ ತುತ್ತು

ತಿಪ್ಪೆಯ ಕೆದರುವ ಜಂಬದ ಕೋಳಿ

ಕುಣಿಕುಣಿದಾಡುವ ಮೊಲಗಳ ಜೋಡಿ

ಕಾಗೆಯ ಗೂಡಿನ ಜೀವನ ಗುಟ್ಟು

ಕೋಗಿಲೆ ಮೊಟ್ಟೆಯು ಮಾಡಿದೆ ರಟ್ಟು

ಅಕ್ಕರೆ ಮಗುವಿನ ಸಕ್ಕರೆ ನಿದ್ದೆಗೆ

ಬಗೆಬಗೆ ಬಣ್ಣದ  ಆಟಿಗೆ ತಂದಿಹೆ

ಹಗಲಿನ ನಿದ್ದೆಯ ಗತ್ತಿನ ಗೂಗೆ

ಕೋಗಿಲೆ ಮರಿಯನು ಸಾಕುವ ಕಾಗೆ

ಟಮಟಮ ಸಾರುವ ತಿಮ್ಮನ ತಮಟೆ

ತಮ್ಮನ ಅಳುವನು ನಿಲಿಸುವ ಜಾಗಟೆ

ಮಗುವಿನ ನಿದ್ದೆಯ ಮುದ್ದಿನ ನಗುವಿಗೆ

ಸದ್ದೇ ಮಾಡದ ಗೊಂಬೆಯ ತಂದಿಹೆ

ಸಿಡುಕಿನ ಮುಸುಡಿಯ ಕೆಡುಕಿನ ಮಿಡತೆ

ಬಣ್ನದ ಕುಡಿಕೆಯ ಮಣ್ಣಿನ ಮಡಕೆ

ನೆಗೆಯುತ ಕೆನೆಯುವ ಹಾರುವ ಕುದುರೆ

ಹಾರುತ ನೆಗೆಯುವ ಸುಂದರ ಚಿಗರೆ

ಮಕ್ಕಳ ಕಣ್ಣಿನ ಮಿಟುಕದ ನೋಟಕೆ

ಚಿಟಿಕೆ ಹೊಡೆಯುವ ಬೊಂಬೆಯ ತಂದಿಹೆ

ಹಾವನು ಕುಕ್ಕುವ ಕೊಕ್ಕಿನ ಗರುಡ

ಹಕ್ಕಿಯ ಒದೆಯುವ ಬೇಟೆಯ ಗಿಡುಗ

ಕಡಲಿನ ಅಲೆಯಲಿ ತೇಲುವ ಹಡಗು

ಬೊಂಬೆಯ ಕಾಲಿನ ಹೊಳೆಯುವ ಕಡಗ

ಮಕ್ಕಳ ಮೋಜಿನ ಮಾಟದ ಆಟಕೆ

ಹೊಸ ಹೊಸ ಆಟಿಗೆ ಮಾರಲು ಬಂದಿಹೆ