ಗಜಲ್

 ಉದುರುವ ಹನಿಯನ್ನು ಕಣ್ಣರೆಪ್ಪೆಗಳು ಅಪ್ಪಿಕೊಂಡವು

ಎದ್ದ ಬಿರುಗಾಳಿಯನ್ನು ತೋಳುಗಳು ಅಪ್ಪಿಕೊಂಡವು.

ಉದುರಿದ ದಳಗಳನ್ನೆಲ್ಲಾ ಒಸರಿಸಿಕೊಂಡಿತು ನೆಲವೊಂದು

ಕಸುವಿಗೆಂದು ಹಸಿಯಾದ ಬೇರುಗಳು ಅಪ್ಪಿಕೊಂಡವು.

ಎಲ್ಲಾ ಬದುಕುಗಳು ಕೊರಗುತ್ತವೆ ಕೆಲವೊಮ್ಮೊಮ್ಮೆ

ಬಿಳುಪನ್ನು ಹಲವು ವರ್ಣಗಳು ಅಪ್ಪಿಕೊಂಡವು.

ಬಿಸಿಲರ್ಧ-ಮಳೆಯರ್ಧಕ್ಕೆ ಕಾಮನಬಿಲ್ಲಗಳು ಅನೇಕ

ಭೂಮಿ ಆಕಾಶದ ಬದುಕುಗಳು ಅಪ್ಪಿಕೊಂಡವು.

ಅನಿವಾರ್ಯತೆಯಲಿ ದಾರಿ ಸವೆಸಬೇಕಾಗಿದೆ ಕಾರಣ

ಪದೇ-ಪದೇ ಮರುಭೂಮಿಯನ್ನೆ ಹೆಜ್ಜೆಗಳು ಅಪ್ಪಿಕೊಂಡವು.