ಮನಃ ಏವ ಕಾರಣಂ ಬಂಧಮೋಕ್ಷಯೋ: (ಹಾಗೇ ಸುಮ್ಮನೆ)

 ನೂರು ಪುಟದ ೨ ಪೇಪರು ಬಂದು ಬೀಳುತ್ತವೆ. ನಾನು ತಿರುವಿ ಹಾಕುತ್ತೇನೆ ಒಂದರ್ಧ ಗಂಟೆ.ನಾನು  ಪೇಪರ್ ಓದಬೇಕು/ತಿರುವಿ ಹಾಕಬೇಕು ಎಂದು ನಿರ್ಣಯಿಸಿದವರು ಯಾರು?ನಾನು ಇದನ್ನು ಮಾಡದಿದ್ದರೆ ಏನಾಗುತ್ತದೆ ?
ಮುನ್ನೂರು ಟೀ ವೀ ಚಾನೆಲ್ಲುಗಳಿವೆ. ನಾನೇಕೆ ಟೀವೀ ನೋಡಬೇಕು?  ಚಾನೆಲ್ ಬದಲಿಸಬೇಕು?  ಮನೆಯಲ್ಲಿ ಟೀವೀ ಇದ್ದಾಕ್ಷಣ ಟೀವೀ  ಆನ್ ಮಾಡಬೇಕು ಏಕೆ?
ಸಾವಿರ ಪುಟದ ವಿದೇಶೀ ಕಾದಂಬರಿ ಇಟ್ಟುಕೊಂಡು ಯಾವಾಗ ಅದನ್ನು ಓದಿ ಮುಗಿಸಿಯೇನು ಅಂದುಕೊಳ್ಳುವುದೇಕೆ?
ಇಂಟರ್ನೆಟ್ಟಿನಲ್ಲಿ ದಿನವೂ ಗೂಗಲ್ ರೀಡರಿನಲ್ಲಿ ಸುಮಾರು  ಸಾವಿರ ಹೊಸ ಸಂಗತಿಗಳು ಸೇರ್ಪಡೆ ಆಗುತ್ತವೆ. ದಿನವೂ   ಅವುಗಳನ್ನು ಗಮನಿಸಿ ತೆಗೆದು ಹಾಕಬೇಕೇಕೆ ?
ಒಂದೂವರೆ ಸಾವಿರ  ಕನ್ನಡ ಪುಸ್ತಕಗಳು , ಇನ್ನೂ ಐದು ವರ್ಷದ ಕೊರವಂಜಿ ಸಂಚಿಕೆಗಳು , ಇಪ್ಪತ್ತೈದು ವರ್ಷದ ಅಪರಂಜಿ ಸಂಚಿಕೆಗಳು ಓದಲು ಬಾಕಿ ಇವೆ . ಓದಬೇಕೆಂದು ಇಟ್ಟುಕೊಂಡದ್ದೂ  ನಾನೇನೇ , ಇನ್ನೂ ಇಷ್ಟೆಲ್ಲ ಬಾಕಿ ಅಂದುಕೊಳ್ಳುವುದೂ ನಾನೇನೇ ಅಲ್ಲವೆ?

ಸಂಪದದಲ್ಲೋ ಫೇಸ್ಬುಕ್ಕಿನಲ್ಲೋ ವಿಕಿಪೀಡಿಯದಲ್ಲೋ ನಾನು ಪೋಸ್ಟ್ ಮಾಡುವುದೇಕೇ?  ಯಾರಾದರೂ ಹೊಗಳಲಿ , ಬೆನು ತಟ್ಟಲಿ ಎಂದೇ ?

ಯಾರ ಯಾರ ಜತೆಗೋ ನನ್ನನ್ನು ಹೋಲಿಸಿಕೊಳ್ಳುವುದೇಕೆ? ಸಂತಸಪಡುವುದೇಕೇ? ಬೇಜಾರು ಮಾಡಿಕೊಳ್ಳುವುದೇಕೆ?
 


 ಯಾವುದೋ ಝೆನ್ ಕತೆ ನೆನಪಾಗುತ್ತದೆ- ಯಾವನೋ ಗುರುವಿನ ಬಳಿ ಬಂದು ಅಲವತ್ತುಕೊಳ್ಳುತ್ತಾನೆ - ಗುರುಗಳೇ ಈ ಬಂಧನದಿಂದ ಬಿಡಿಸಿ ಅಂತ .ಗುರು ಕೇಳುತ್ತಾನೆ- ಯಾರು ನಿನ್ನನ್ನ ಕಟ್ಟಿ ಹಾಕಿರೋದು ? ಅಂತ!!

ಬಂಧನಕ್ಕೂ  ಮೋಕ್ಷಕ್ಕೂ (ಬಿಡುಗಡೆಗೂ) ಮನಸ್ಸೇಕಾರಣವಂತೆ!

ಜಗತ್ತಿನ ಕೇಂದ್ರದಲ್ಲಿರುವದು  ನಾನೇ.
ಈ ನಾನು ಎನ್ನುವುದು  ನನ್ನ ಮನಸ್ಸು .
ಈ ನನ್ನ ಮನಸ್ಸಿನಲ್ಲಿ ಇರುವುದು ಕಾಮ, ಕ್ರೋಧ , ಭಯ , ಆಸೆ , ಮುಂತಾದವು .
ಇವೇ ನನ್ನ ಎಲ್ಲ ಕ್ರಿಯೆಗಳನ್ನೂ ಪ್ರತಿಕ್ರಿಯೆಗಳನ್ನೂ  ನಿಯಂತ್ರಿಸುವುದು , ನಿರ್ಧರಿಸುವುದು.
ಈ ಮನಸ್ಸನ್ನೂ , ನನ್ನ ಕ್ರಿಯೆಗಳನ್ನೂ  ಪ್ರತಿಕ್ರಿಯೆಗಳನ್ನೂ  ಗಮನಿಸಿಕೊಳ್ಳುವುದು , ಅರಿತುಕೊಳ್ಳುವುದು  ಒಂದು ಬಗೆಯ ಧ್ಯಾನವೇನೋ . ಅದರಿಂದ ಒಂದು ತರಹ ಬಿಡುಗಡೆ ಸಿಗುವ ಹಾಗೆ ತೋರುತ್ತದೆ.