' ಶಾಲ್ಮಲೆ '

ಗುಡ್ಡ ಬೆಟ್ಟಗಳಿಂದಾವೃತ
ಪ್ರಸ್ತಭೂಮಿ
ಅನತಿ ದೂರದಲೊಂದು
ಬೃಹತ್ತಮರ
ಗಗನದೆತ್ತರಕೆ ತಲೆ ಚಾಚಿದೆ
ಯಾರಿಹರು
ತನಗಿಂತ ಮಿಗಿಲೆಂದು !

ಮೈದುಂಬಿ ವೃಕ್ಷದ ತುಂಬೆಲ್ಲ
ಅವರಿಸಿಹ ಕಡುಗೆಂಪು ಬಣ್ಣದ
ಬಟ್ಟಲಾಕೃತಿಯ ಸುಂದರ
ಹೂಗುಚ್ಛಗಳ ತುರಾಯಿ
ಕಾಣುತ್ತಿದ್ದಾಳೆ ಶಾಲ್ಮಲೆ ನವೀನಳಾಗಿ

ಅಂಗೈಯಲಿ ಕಡುಗೆಂಪು
ಬಣ್ಣದ ದೀಪಗಳ ಹಿಡಿದ
ಭೂರಮೆಯಂತೆ
ನಿಂತಿದ್ದಾಳೆ ಮಹಾ ಶಾಲ್ಮಲಿ
ಭೂಮ್ಯಾಕಾಶಗಳನು
ಒಂದು ಮಾಡಿ

ಮರ ಮುಟ್ಟುಗಳಲಿ ನೀನು
ದೊಡ್ಡವಳು ಶಾಲ್ಮಲೆ
ವೇದಕಾಲದಿಂದಲೂ ನಿನ್ನ
ಐತಿಹ್ಯವುಂಟು
ವಧು ವರರ ಕೊಂಡೊಯ್ವ
ರಥಕೆ ನೀನಾಗಿದ್ದೆ  ಮೂಲಾಧಾರ 
ಗ್ರಾಮಗಳ ಮಧ್ಯದ
ಗಡಿ ಗುರುತು ನೀನಾಗಿದ್ದೆ
 
ಕಾಯಿಗಳು ಬಿರಿದು
ಅಜ್ಜನ ಗಡ್ಡವಾಗಿ
ಸುತ್ತ ಮುತ್ತಲಲೆಲ್ಲ ಗಾಳಿಯಲಿ
ತೇಲಿ ಎಲ್ಲಿಯೋ ಒಂದು
ಗೌಪ್ಯ ಜಾಗದಲಿ ಬಿದ್ದು
ಅಂಕುರಿಸಿ ಮತ್ತೆ
ನಿನ್ನ ಸಂತತಿ ಹುಟ್ಟು
ಅವುಗಳ ಪುನರುಜ್ಜೀವನ

ಬೇಸಿಗೆಯ ಬಿಸಿಲಿಗೆ
ಬಳಲಿ ಬೆಂಡಾಗಿ
ಎಲೆಗಳುದುರಿಸಿಕೊಂಡು
ಬೆತ್ತಲಾಗಿ ವಸಂತದಲಿ
ರೆಂಬೆ ಕೊಂಬೆಗಳಲ್ಲಿ
ಹೂವುಗಳರಳಿಸಿ ಕೊಂಡು
ನಿಂತು ಕಾರ್ತೀಕದ
ದೀಪಗಳ ನೆನಪಿಸುವವಳು

ವಾಸನೆರಹಿತ ಬರಿ
ಬಣ್ಣದ ಬಡಿವಾರದ ಹೂವುಗಳ
ಕಣ್ಣು ಕೋರೈಸುವ
ಬೆಡಗಿನ ಶಾಲ್ಮಲೆ ಅಂದ ಚೆಂದದಲಿ
ಬೆಡಗು ಬೀರಿ ಎಲ್ಲರ ಮನ ಸೆಳೆವ
ಬರಿ ಮೋಸಗಾತಿ ನೀನು ಶಾಲ್ಮಲಿ

ನಿನ್ನ ಹೂಗೊಂಚಲುಗಳನು
ಹಂಸಗಳು ಕಮಲ
ಪುಷ್ಪಗಳೆಂದು
ರಣ ಹದ್ದುಗಳು ಮಾಂಸದ
ತುಂಡುಗಳೆಂದು
ದುಂಬಿಗಳು ಜೇನಿನ
ಆಗರಗಳೆಂದು
ದಾರಿಹೋಕರು ಗಳಿತ
ಫಲಗಳೆಂದು
ನಿನ್ನ ಕಂಡು ಮೋಸ
ಹೋಗುವ ಪರಿ

ಶಾಲ್ಮಲೆ ಹಿಂಜರಿಕೆ
ರೇಶಿಮೆಯ ನಯ ನುಣುಪು
ನಾಜೂಕಿನ ಅರಳೆ
ನೀನು ಸುರಿಸುವ ಅಂಟು
ವೈದ್ಯದಲಿ ಉಪಯೋಗ
ಬೆಂಕಿ ಕಡ್ಡಿಗೆ ಪ್ಲೈವುಡ್ ಪಲ್ಪಿಗೆ
ಸೆಲ್ಯುಲೋಸ್ ಸಾಮಗ್ರಿಗೆ
ನೀನು ಮೂಲಾಧಾರ
ಜನುಪಯೋಗಿ
ಸಾರ್ಥಕ ಬದುಕು ನಿನ್ನದು

                 *

ಚತ್ರ ಕೃಪೆ: http://www.google.co.in/imgres?q=shalmali+tree&sa=X&rls=com.microsoft:en-us&rlz=1I7ADFA_enIN462&biw=862&bih=590&tbm=isch&tbnid=ouHE8tqCvxgCiM:&imgrefurl=http://creative.sulekha.com/the-silk-cotton-tree_400511_blog&docid=iRdN8MAzJ1EihM&imgurl=http://www1.sulekha.com/mstore/a1samud/albums/default/DSC00263.JPG&w=500&h=375&ei=dPqhUd7rMsrJrAfD2oDACg&zoom=1&iact=rc&dur=140&page=1&tbnh=147&tbnw=206&start=0&ndsp=14&ved=1t:429,r:5,s:0,i:96&tx=155&ty=89