ಇತಿಹಾಸವೇಕೆ ಎಲ್ಲರನ್ನೂ ನೆನಪಿಡುವುದಿಲ್ಲ..?

"ಕುರಿಯ ಮುಂದಾಳತ್ವದ ಸಿಂಹಗಳ ಸೈನ್ಯಕ್ಕೆ ನಾನು ಹೆದರುವುದಿಲ್ಲ, ಆದರೆ ಒಂದು ಸಿಂಹದ ನೇತೃತ್ವ ಹೊಂದಿರುವ ಕುರಿಗಳ ಸೈನ್ಯಕ್ಕೆ ನಾನು ಭಯ ಪಡುತ್ತೇನೆ" ಈ ಮಾತನ್ನು ಹೇಳಿದವರು ವಿಶ್ವವನ್ನೇ ಜಯಿಸಲು ಹೊರಟ ಅಲೆಕ್ಸಾಂಡರ್ ದಿ ಗ್ರೇಟ್. ಒಂದು ದೇಶ, ಸಮುದಾಯ, ನಾಗರೀಕತೆ ಪ್ರಗತಿ ಹೊಂದಬೇಕಿದ್ದರೆ ಒಬ್ಬ ಸಮರ್ಥ ನಾಯಕ ಅಗತ್ಯ ಮಾತ್ರವಲ್ಲ ಅನಿವಾರ್ಯ ಕೂಡ. ಇತಿಹಾಸವನ್ನು ನೆನಪಿಡಲು ಕಷ್ಟ; ಇತಿಹಾಸವೂ ಅಷ್ಟೇ ಎಲ್ಲರನ್ನೂ ನೆನಪಿಡುವುದಿಲ್ಲ. ಇತಿಹಾಸ ನೆನಪಿಡುವುದು ಸಮರ್ಥ ಶ್ರೇಷ್ಠ ವ್ಯಕ್ತಿಗಳನ್ನು ಮಾತ್ರ.
ನಾನು ಇತಿಹಾಸದಲ್ಲಿ ಆಸಕ್ತಿಯನ್ನು ಹೊಂದಿದ್ದರೂ, ರಾಜಕೀಯ ಇತಿಹಾಸದಲ್ಲಿ ನನಗೆ ಹೆಚ್ಚಿನ ಒಲವು. ಇತಿಹಾಸವೆಂದರೆ ಕೇವಲ ಚಕ್ರವರ್ತಿಗಳ ಸಾಧಕರ ಕಥೆಯಲ್ಲ ಎಂಬ ವಾದವಿದೆ, ಆದರೆ ಇತಿಹಾಸ ನೆನಪಿಡುವುದು ಅಂಥ ವ್ಯಕ್ತಿತ್ವಗಳನ್ನೇ. ಅಲೆಕ್ಸಾಂಡರ್, ಚಾಣಕ್ಯ, ಶೇರ್‌ಷಾ, ಅಕ್ಬರ್, ಶಿವಾಜಿ, ಪುಲಕೇಶಿ, ಕೃಷ್ಣದೇವರಾಯ, ಹೈದರ್ ಟಿಪ್ಪು, ನೆಪೋಲಿಯನ್........ ಇವರೆಲ್ಲರ ಜೀವನಚರಿತ್ರೆ ನನ್ನ ಮೇಲೆ ಅಪಾರವಾದ ಪ್ರಭಾವ ಬೀರಿದೆ. ಇತಿಹಾಸದ ಬಗ್ಗೆ ವಸ್ತುನಿಷ್ಠ ಮಾಹಿತಿಗೆ ಮನಸ್ಸು ತವಕಿಸಿದರೂ, ಕೆಲವೊಮ್ಮೆ ದಂತಕಥೆಗಳೇ ಐತಿಹಾಸಿಕ ವ್ಯಕ್ತಿಗಳನ್ನು ನಮಗೆ ಹತ್ತಿರವಾಗಿಸುತ್ತದೆ.
ಕ್ರಿಸ್ತಪೂರ್ವದಲ್ಲಿ ಚಾಣಕ್ಯ ನೀಡಿದ ರಾಜಕೀಯ ಆರ್ಥಿಕ ಸಿದ್ಧಾಂತಗಳು ಇವತ್ತಿಗೂ ಪ್ರಸ್ತುತ, ವಿಶ್ವ ಕಂಡ ಅಪ್ರತಿಮ ವೀರರಲ್ಲಿ ಒಬ್ಬನಾದ ನೆಪೋಲಿಯನ್ ಸೆರೆವಾಸದಲ್ಲಿ ಸಾವನ್ನಪ್ಪಿದ್ದು, 1857ರ ಸಂಗ್ರಾಮದ ಬಗೆಗಿನ ವಿವಾದ ಸಂಶಯಗಳು, ಭಾರತದ ಸ್ವಾತಂತ್ರ್ಯಕ್ಕೆ ಹಿಟ್ಲರ್ ಸುಭಾಶ್‌ಚಂದ್ರ ಬೋಸ್‌ರಿಗೆ ನೆರವಿನ ಭರವಸೆ ನಿಡಿದ್ದು, ಭಗತ್‌ಸಿಂಗ್ ಚಂದ್ರಶೇಖರ್ ಆಝಾದ್ ಮುಂತಾದವರ ಬಲಿದಾನ, ಮದರ್ ತೆರೆಸಾರ ನಿಸ್ವಾರ್ಥ ಸೇವೆ, ವಿವೇಕಾನಂದರ ಪ್ರೇರಣೆ... ಹೀಗೆ ಪ್ರಶ್ನೆ, ಕುತೂಹಲ, ಸಂಶಯ, ವಿರೋಧಾಭಾಸಗಳ ಪಟ್ಟಿ ಮುಂದುವರಿದು ಇತಿಹಾಸದ ಅಸ್ಪಷ್ಟ ಚಿತ್ರಣ ನೀಡುತ್ತದೆ.
ಇತಿಹಾಸದಿಂದ ಪಾಠ ಕಲಿಯದವನು ಭವ್ಯ ಭವಿಷ್ಯತ್ತನ್ನು ನಿರ್ಮಿಸಲಾರ ಎಂಬ ಮಾತಿದೆ. ಸಂಪೂರ್ಣ ಇತಿಹಾಸ ತಿಳಿದಿಕೊಳ್ಳಲು ಕಷ್ಟಸಾಧ್ಯ. ಆದರೂ ಇತಿಹಾಸದ ಪುಟಗಳಲ್ಲಿ ನಮ್ಮ ಹೆಸರೂ ಒಳ್ಳೆಯ ರೀತಿಯಲ್ಲಿ ಗುರುತಿಸಲ್ಪಟ್ಟರೆ ಜೀವನ ಸಾರ್ಥಕ.