ಹೂ ನೋಟದ ಫಲ - ಲಕ್ಷ್ಮೀಕಾಂತ ಇಟ್ನಾಳ

ಹೂ ನೋಟದ ಫಲ    - ಲಕ್ಷ್ಮೀಕಾಂತ ಇಟ್ನಾಳ

ಅವಳ ನಡೆದು ಹೋದ ಮಣ್ಣ ರಸ್ತೆಯಲ್ಲಿ ಮೂಡಿದ

ಅವಳ ಹೆಜ್ಜೆಯ ಮೇಲೆ ಹೆಜ್ಜೆ ಇಟ್ಟು

ತಲ್ಲೀನನಾಗುತ್ತಿದ್ದೆ,

ಅದೆಷ್ಟೊ ಹೊತ್ತು!

ಬೀಳುತ್ತಿವೆ ಹೆಜ್ಜೆಗಳೀಗ

ಅವಳ ಬಳುಕುತ್ತ ಸರಿದು ಹೋದ ಹೆಜ್ಜೆಗಳಿಗಾಗಿ

ಹುಡುಕುತ್ತ,

ದಶಕಗಳ ನಂತರ!

ಹೆಜ್ಜೆ ಮೂಡವು ಈಗ,

ಡಾಂಬರು ಬಳಿದುಕೊಂಡಿದೆ ರಸ್ತೆ,

ರಸ್ತೆಯ ಅಂಚಿನ ಅರಳಿ ಮರದ ಕೆಳಗೆ ನಿಂತವನನ್ನು

ಕುಡಿನೋಟಿದಿಂದ ಒಮ್ಮೆ ನೋಡಿ ಮಂದಹಾಸ ನೀಡಿ,

ಮುಂದಡಿಯಿಡುತ್ತಿದ್ದ ಅವಳ ನೆನಪಿಗಾಗಿ

ಆ ಅರಳಿ ಮರವನ್ನಾದರೂ ನೋಡಲು

ಅದರತ್ತ ಹೆಜ್ಜೆ ಹಾಕಿದೆ,

ಅರಳಿ ಮರವೂ ಇಲ್ಲ, ಕಟ್ಟೆಯೂ ಇಲ್ಲ,

ಅವಳಿಲ್ಲದ ನೆಲದಲ್ಲಿ ಯಾವ ಸುಳಿವೂ ಇಲ್ಲ.

ಮರಳುವಾಗ ಗಮನಿಸಿದೆ,

ಕಟ್ಟೆ ಇರುವಲ್ಲಿ ಹೂವರಳಿ ನಿಂತಿದ್ದವು,

ನಮ್ಮ ಹೂ ನೋಟದ ಫಲವೆ ಇರಬಹುದೆ?