ವೈಪರೀತ್ಯ

ಒಂದೊಮ್ಮೆ ಮನದಲ್ಲಿ.......

ಕೃಷ್ಣ ಪಕ್ಷದ ಕೊನೆಯಲಿ

ಕಗ್ಗತ್ತಲ ಕಂದರದೊಳು

ಕಾರ್ಮೋಡವು ನುಸುಳಿ

ಕಪ್ಪಗಿನ ದಪ್ಪನೆಯ ಹನಿಗಳನು

ಧಾರಾಕಾರವಾಗಿ  ಸುರಿಸುವಂತೆ

ಮನದ ಕಂದರದಲಿ

ಗಾಢಾಂಧಕಾರದಲಿ

ನಿರಾಶೆಯ ಕರಿಮುಗಿಲು

ನಿರುತ್ಸಾಹದ ಬೆನ್ನೇರಿ

ಕಳ್ಳತನದಲಿ ಇಣುಕಿ,

ವ್ಯಾಕುಲದ ವೃಷ್ಟಿಯನು

ಸುರಿಯುತಿದೆ, ಎರೆಯುತಿದೆ.

ಅದೇ ಮನದಲ್ಲಿ, ಮತ್ತೊಮ್ಮೆ.....

         ಮನದಲೆಲ್ಲೋ ಮೊಳೆತ

         ಭಾವ ಬೀಜವು ತಾನು

        ಜೀವನೋತ್ಸಾಹದ ವೃಕ್ಷದಡಿಯಲಿ

        ಹಸಿರು ಚಿಗುರಾಗಿ ಬೆಳೆದು

        ಮಹಾ ವೃಕ್ಷವಾಗುವ,

        ನವ ಫಲವ ಜನಿಸುವ

        ಹೊಸ ಕನಸು ಕಾಣುವ ತೆರದಿ

        ಮನದಾಳದ ಸದಾಶಯ,

        ಹೊಂಬಿಸಿಲಿನ ಹೊನ್ನ ಮಳೆಯಲಿ

        ಕಾಮನ ಬಿಲ್ಲಾಗುವ, ಚಿರಂತನ ನಲಿವಿಗೆ

        ತುಂತುರು ಹನಿಸುತಿದೆ

        ಕಂಪನು ಬೀರುತಿದೆ