ಆರು ತಿಂಗಳ ಮೋದಿ ಸರಕಾರ

ಮೋದಿಯವರ ಸ್ವಚ್ಛ ಭಾರತ ಅಭಿಯಾನ ಎಂಬುದು ಒಂದು ದಿನದ ಪ್ರದರ್ಶನ ಎಂಬಂತೆ ಆಗಿದೆ. ಪೊರಕೆ ತೆಗೆದುಕೊಂಡು ಕೆಲವು ಕಾರ್ಯಕರ್ತರು ಫೋಟೋಗೆ, ಟಿವಿ ವಾಹಿನಿಗಳಿಗೆ ಫೋಸ್ ನೀಡುತ್ತಾ ಗುಡಿಸುವುದು, ಮಾರನೇ ದಿನದಿಂದ ಯಥಾಪ್ರಕಾರ ಕಸ, ಗಲೀಜು. ಕೆಲದಿನಗಳ ಹಿಂದೆ ಮಂಗಳೂರಿನ ಸ್ಟೇಟ್ ಬ್ಯಾಂಕ್ ಸನಿಹ ಇರುವ ಬಸ್ಸು ನಿಲ್ದಾಣಕ್ಕೆ ಹೋಗಿದ್ದೆ. ಅಲ್ಲಿ ಬಸ್ಸು ನಿಲ್ದಾಣದ ಒಂದು ಬದಿಯ ಉದ್ದಕ್ಕೂ ಮೂತ್ರ ಮಾಡಿದ ಗಬ್ಬು ವಾಸನೆಯಲ್ಲಿ ಅಲ್ಲಿ ಮೂಗು ಮುಚ್ಚಿಕೊಂಡೇ ಹೋಗಬೇಕಾಯಿತು. ಜನ ಎಗ್ಗಿಲ್ಲದೆ ಅಲ್ಲೇ ಮೂತ್ರ ಮಾಡುತ್ತಾ ಇದ್ದರು. ಹಾಗೆಂದು ಅಲ್ಲಿ ಶೌಚಾಲಯ ಇಲ್ಲವೇ ಎಂದರೆ ಇದೆ. ಅಲ್ಲಿ ಮೂತ್ರ ಮಾಡಲು ಗಂಡಸರಿಗೆ ೨ ರೂ, ಹೆಂಗಸರಿಗೆ ೩ ರೂಪಾಯಿ ಸುಲಿಯುತ್ತಿದ್ದರು. ಹೀಗಾಗಿ ಗಂಡಸರು ಬಸ್ಸು ನಿಲ್ದಾಣದ ಒಂದು ಬದಿಯಲ್ಲಿಯೇ ಮೂತ್ರ ಮಾಡುತ್ತಿದ್ದರು. ಹೆಂಗಸರಿಗೆ ಹಾಗೆ ಮಾಡಲು ಸಾಧ್ಯವಿಲ್ಲದ ಕಾರಣ ೩ ರೂ ಕಕ್ಕಿ ಶೌಚಾಲಯಕ್ಕೆ ಹೋಗುತ್ತಿದ್ದರು. ಕನಿಷ್ಠ ಬಸ್ಸು ನಿಲ್ದಾಣದಲ್ಲಿಯಾದರೂ ಉಚಿತವಾಗಿ ಮೂತ್ರ ಮಾಡುವ ವ್ಯವಸ್ಥೆ ಕಲ್ಪಿಸಿದ್ದಿದ್ದರೆ ಇಂಥ ಪರಿಸ್ಥಿತಿ ಉದ್ಭವಿಸುತ್ತಿರಲಿಲ್ಲ. ಇದು ಸ್ಥಳೀಯ ಆಡಳಿತ ಹಾಗೂ ಬಸ್ಸು ನಿಲ್ದಾಣದ ಜವಾಬ್ದಾರಿ ಇರುವವರ ಕರ್ತವ್ಯವಾಗಬೇಕಾಗಿತ್ತು. ಬೆಂಗಳೂರಿನ ಬಸ್ಸು ನಿಲ್ದಾಣದ ಶೌಚಾಲಯದಲ್ಲಿ ಉಚಿತ ಮೂತ್ರ ಮಾಡುವ ವ್ಯವಸ್ಥೆ ಕಲ್ಪಿಸಿದ್ದಾರೆ. ಹೀಗಾಗಿ ಅಲ್ಲಿ ಬಸ್ಸು ನಿಲ್ದಾಣದ ಬದಿಯಲ್ಲಿ ಮೂತ್ರ ಮಾಡುವವರು ಕಂಡುಬರುವುದಿಲ್ಲ.