ಸಂತೋಷದ ಜಾಡಿ!

ಆತ್ಮೀಯರೆ,

          ಈ ಹೊಸ ವರ್ಷದ ಆರಂಭದಿಂದ ಈ ಕಾರ್ಯವನ್ನು ಕೈಗೊಳ್ಳಬಹುದೆನಿಸುತ್ತದೆ, ಇದೇನೆಂದು ತಿಳಿಯಲು ಆಸಕ್ತಿಯುಳ್ಳವರು ಮುಂದಿನ ಬರಹವನ್ನು ಓದಿ.

          ಸಂತೋಷದ ಜಾಡಿ ಎಂದರೇನು? ಅದು ಜಗತ್ತಿನಲ್ಲಿರುವ ಅತ್ಯಂತ ಸರಳ ವಸ್ತು. ನೀವೇ ಸ್ವತಃ ಒಂದು ಜಾಡಿಯನ್ನು (ಡಬ್ಬಿ ಅಥವಾ ಇನ್ಯಾವುದೇ ತರಹದ ಪಾತ್ರೆ) ತೆಗೆದುಕೊಳ್ಳಿ ಮತ್ತು ಪ್ರತಿದಿನ, ದಿನದಾಂತ್ಯದಲ್ಲಿ ಅಂದಿನ ಅತ್ಯಂತ ಸಂತೋಷಕರ ಗಳಿಗೆಯನ್ನು ಒಂದು ಚೀಟಿಯಲ್ಲಿ ಬರೆದಿಟ್ಟು ಆ ಜಾಡಿಯಲ್ಲಿ ಹಾಕಿಡಿ.

          ನಿಮಗೆ ಅತ್ಯಂತ ಬೇಸರ ತಂದ ದಿನವಾದರೂ ಸರಿ, ಇದನ್ನು ಕ್ರಮ ತಪ್ಪದೇ ಮಾಡಿ, ಏಕೆಂದರೆ ಅಂತಹ ದಿವಸಗಳಲ್ಲಿ ಸಹ ಒಂದಾದರೂ ಸಂತಸಕರವಾದ ಕ್ಷಣವಿರುತ್ತದೆ (ಒಂದು ವೇಳೆ ಇಲ್ಲದಿದ್ದರೆ ಕಡೇ ಪಕ್ಷ ಕಡಿಮೆ ಕೆಟ್ಟದಾದ ಕ್ಷಣವಿರುತ್ತದೆ). ಹೀಗೆ ಬರೆದ ಕಾಗದದ ಚೀಟಿಯನ್ನು ಆ ಜಾಡಿಯಲ್ಲಿ ಹಾಕಿ.

          ಹಲವು ವರ್ಷಗಳ ನಂತರ ನಿಮ್ಮ ಸಂತಸದ ಕ್ಷಣಗಳ ದಾಖಲೆ ಸಿದ್ಧವಾಗಿರುತ್ತದೆ.

          ನಿಮಗೆ ಕೆಡುಕೆನಿಸುವ ಅಥವಾ ಕೆಟ್ಟದ್ದೆಂದು ಅಂದುಕೊಳ್ಳುವ ಯಾವುದಾದರೂ ಒಂದು ದಿವಸದಲ್ಲಿ ನಿಮ್ಮ ಕೈಯ್ಯನ್ನು ಆ ಜಾಡಿಯಲ್ಲಿ ಆಡಿಸಿ ಒಂದು ಹಿಡಿಯಷ್ಟು ಸಂತಸದ ಕ್ಷಣಗಳನ್ನು ಹೆಕ್ಕಿಕೊಳ್ಳಿ, ಅದರಲ್ಲಿ ನೀವು ದಾಖಲಿಸದೇ ಇದ್ದರೆ ವಾಸ್ತವವಾಗಿ ಮರೆತುಹೋಗಬಹುದಾಗಿದ್ದ ಸಂತಸದ ಕ್ಷಣಗಳು ದೊರೆಯುತ್ತವೆ.

          ಇದನ್ನು ನಾನು (ಮೂಲ ಲೇಖಕರು) ಹಲವು ವರ್ಷಗಳಿಂದ ಮಾಡುತ್ತಾ ಬಂದಿದ್ದೇನೆ ಮತ್ತು ಹೀಗೆ ಮಾಡುವುದನ್ನು ನಾನು ಇಷ್ಟ ಪಡುತ್ತೇನೆ.

          ಒಂದು ವೇಳೆ ನನ್ನ ಮನೆಗೇನಾದರೂ ಬೆಂಕಿ ಬಿದ್ದರೆ, ನಾನು ಹೊರಗೋಡಿ ಬರುವ ಮುನ್ನ ಮಾಡುವ ಮೊದಲ ಕೆಲಸವೆಂದರೆ ಇದನ್ನು ತೆಗೆದುಕೊಳ್ಳುವುದು..... ಏಕೆಂದರೆ ಅದರಲ್ಲಿ ಏನಿದೆ ಎಂದುಕೊಂಡಿರಿ - ಅದರಲ್ಲೇ ಎಲ್ಲಾ ಇದೆ, ಜೀವನದ ಮೂಲೋದ್ದೇಶ.

          ವರ್ಷಗಳು ಕಳೆದಂತೆ ನನ್ನ ಸಂತಸದ ಜಾಡಿ ನನಗೆ ಬಹಳಷ್ಟು ಕಲಿಸಿದೆ. ನನ್ನನ್ನು ಚಕಿತಗೊಳಿಸುವುದು ಏನೆಂದರೆ ಪ್ರತಿದಿನದ ಕಡೆಯಲ್ಲಿ ಚೀಟಿಯಲ್ಲಿ ಏನು ದಾಖಲಾಗುತ್ತದೆ ಎನ್ನುವುದು. ವ್ಹಾಹ್, ವ್ಹಾಹ್ ಎನ್ನುವ ಕಾರ್ಯಕ್ರಮಗಳಲ್ಲ, ಅಥವಾ ದೊಡ್ಡ ಸಾಧನೆಗಳಲ್ಲ - ಸಾಮಾನ್ಯವಾಗಿ ಕೇವಲ ಸಣ್ಣ-ಪುಟ್ಟ ಸಂಗತಿಗಳು, ಒಂದು ಕ್ಷಣದ ವಿವೇಚನೆ..... ನೀವು ಹೊರಗೆ ಕಾಲಿಡುತ್ತಿದ್ದಂತೆಯೇ ಬಂದು ಗುದ್ದಿದ ಕಾರು ನಿಮ್ಮ ತಲೆಗೆ ಪೆಟ್ಟಾಗುವಂತೆ ಮಾಡಿ, ಹಗಲಿನಲ್ಲಿ ನಕ್ಷತ್ರಗಳನ್ನು ಕಾಣುವಂತೆ ಮಾಡಿದ್ದು, ಮತ್ತು ತಕ್ಷಣವೇ ಅವನ್ನೆಲ್ಲಾ ಬದಿಗೆ ತಳ್ಳಿ ಸಧ್ಯ ನನಗೇನೂ ಆಗಲಿಲ್ಲ, ನಾನು ಜೀವಂತವಾಗಿಯೇ ಇದ್ದೇನೆ ಎನ್ನುವ ಧನ್ಯತಾ ಭಾವ ತಳೆಯುವುದು, ಮತ್ತು ನಿಮಗೆ ಅನಿಸುತ್ತದೆ, "ಹೌದು, ಇದೇ ಆ ಸಂತಸದ ಕ್ಷಣ!"

        ಇದು ಸಾಮಾನ್ಯವಾಗಿ ಅಷ್ಟು ಸಣ್ಣದು ಮತ್ತು ಅಷ್ಟೇ ಮಹತ್ತರವಾದದ್ದು.

         ನಿಮ್ಮಲ್ಲಿ ಬಹುತೇಕರು ಇದನ್ನು ಅಭ್ಯಾಸವಾಗಿಟ್ಟುಕೊಂಡಿರಬಹುದು, ಮತ್ತು ನಿಮ್ಮ ಜಾಡಿಯಲ್ಲಿನ ಚಿತ್ರಗಳನ್ನು ನೋಡುತ್ತಿರಬಹುದು, ಮತ್ತು ಇದನ್ನು ಯಾವ ರೀತಿ ನಿಮ್ಮ ಜೀವಿತದಲ್ಲಿ ಅಳವಡಿಸಿಕೊಂಡಿದ್ದೀರಿ ಎನ್ನುವುದು ನನಗೆ ತಿಳಿದಿದೆ. ನನಗೆ ಗೊತ್ತಿರುವ ಒಬ್ಬ ಮಹಿಳೆ ಈ ಸಂತಸದ ಜಾಡಿಯನ್ನು ತನ್ನ ಮನೆಯ ಡೈನಿಂಗ್ ಟೇಬಲ್ಲಿನ ಮೇಲಿಟ್ಟಿದ್ದಾಳೆ ಮತ್ತು ಆಕೆಯ ಮಕ್ಕಳೂ ಸಹ ಅದರಲ್ಲಿ ತಮ್ಮ ಸಂತಸದ ಕ್ಷಣಗಳ ಚೀಟಿಯನ್ನು ಹಾಕುತ್ತಾರೆ - ಎಂತಹ ಒಳ್ಳೆಯ ಕೌಟುಂಬಿಕ ಹವ್ಯಾಸ! ಇನ್ನೊಬ್ಬ ಹೆಂಗಸು ನನಗೆ ಇತ್ತೀಚೆಗೆ ಪತ್ರ ಬರೆದು ತಿಳಿಸಿದ್ದೇನೆಂದರೆ, ಈ ವರ್ಷ ತನ್ನ ಜೀವಿತದಲ್ಲೇ ಅತ್ಯಂತ ತಾಪತ್ರಯದಿಂದ ಕೂಡಿದ ದಿನಗಳನ್ನು ಎದುರಿಸುತ್ತಿದ್ದರೂ ಸಹ ಆಕೆ ಈ ಅಭ್ಯಾಸವನ್ನು ಪ್ರತಿದಿನವೂ ಮುಂದುವರೆಸಿಕೊಂಡು ಹೋಗುತ್ತಿದ್ದಾಳೆ, ಮತ್ತು ಈ ದಿನ ಅಂದರೆ ೨೦೧೪ನೇ ಸಂವತ್ಸರದ ಕಡೆಯ ದಿನ ಆಕೆ ಆ ಜಾಡಿಯಲ್ಲಿರುವ ಪ್ರತಿಯೊಂದೂ ಚೀಟಿಯನ್ನು ಹೆಕ್ಕಿ ಓದಿಕೊಂಡು ಇಂತಹ ಕಷ್ಟಕರ ದಿನಗಳಲ್ಲಿಯೂ ಸಹ ತನಗೆ ದಿನಕ್ಕೆ ಒಂದಾದರೂ ಸಂತಸದ ಕ್ಷಣಗಳಿದ್ದವು ಎಂದು ಖುಷಿ ಪಡುತ್ತಾಳೆ.

          ಆದ್ದರಿಂದ ಯಾರಾದರೂ ಈ ಅಭ್ಯಾಸವನ್ನು ಆರಂಭಿಸ ಬೇಕೆಂದರೆ ಈ ಹೊಸ ವರ್ಷದಿಂದಲೇ ಆರಂಭಿಸಬಹುದು, ಹೊಸ ವರ್ಷಕ್ಕೊಂದು ಮಹತ್ತರವಾದ ನಿರ್ಣಯವಾದೀತು!

          ನಿಮಗೆಲ್ಲರಿಗೂ ಆತ್ಮೀಯ ಮತ್ತು ಪ್ರೀತಿ ಪೂರ್ವಕವಾದ ೨೦೧೫ರ ಹೊಸ ವರ್ಷದ ಶುಭಾಶಯಗಳು.

ವಿ.ಸೂ. : ವೈಯಕ್ತಿಕವಾಗಿ ಪಾಶ್ಚಿಮಾತ್ಯ ಹೊಸ ವರ್ಷಕ್ಕೆ ಶುಭ ಕೋರುವ ಪದ್ಧತಿಯಿಲ್ಲದಿದ್ದರೂ ಸಹ ಇದರಲ್ಲಿರುವ ವಿಷಯ ಮಹತ್ವಪೂರ್ಣವೆನಿಸಿದ್ದರಿಂದ ಈ ಬರಹವನ್ನು ನಿಮ್ಮಲ್ಲಿ ಹಂಚಿಕೊಳ್ಳುತ್ತಿದ್ದೇನೆ.

ಆಂಗ್ಲ ಮೂಲ: ಮಿತ್ರನೋರ್ವ ಹಂಚಿಕೊಂಡ ಮೊಗಹೊತ್ತಗೆಯ ಪುಟದಿಂದ.

ಚಿತ್ರ ಕೃಪೆ : ಗೂಗಲ್