ನೆರಳುಗಳು - ಲಕ್ಷ್ಮೀಕಾಂತ ಇಟ್ನಾಳ

ನೆರಳುಗಳು

         - ಲಕ್ಷ್ಮೀಕಾಂತ ಇಟ್ನಾಳ

ಎಲ್ಲೆಲ್ಲೋ ತಿರುಗಿದರೂ ನನ್ನ ಜೊತೆಯಲ್ಲೇ ಮಲಗುವುದು..ಈ ನೆರಳು

ಎಂದೂ  ಅದು ನನ್ನ ಮೇಲೆ ಮಲಗಿದ ನೆನಪಿಲ್ಲ !

ನಾನು  ಮಲಗುವ ಸಮಯದಲ್ಲಿ ಕಾಣುವುದಿಲ್ಲ, ಕೂಡ

ಯಾವಾಗ ನನ್ನಡಿಗೆ ನುಸುಳಿ ಬಿಡುವುದೋ ಗೊತ್ತಾಗದು

ದಿನವೂ ನನ್ನನಪ್ಪಿ  ಮಗಲುವುದಂತೂ  ಹೌದು,

ಈ ನೆರಳು....

ಆದರೂ ಇವುಗಳಲ್ಲಿ,

ನಾನು  ಕೆಲ  ನೆರಳುಗಳನ್ನು  ನಂಬುವುದಿಲ್ಲ

ಏನಾದರೂ ಸಿಗುವಂತಿದ್ದರೆ

ನನಗಿಂತ ಮುಂದೆ ಮುಂದೆಯೇ ಇರುತ್ತವೆ,

ಬಲು  ಬೆರಕಿತನ ತೋರುತ್ತವೆ

ಈಗೀಗಂತೂ

ಹಾಗೆಯೇ, ಬಲು ಸೂಕ್ಷ್ಮ ಕೆಲವು

ಅಪಾಯವಿರುವಲ್ಲಿ,

ಉಪಾಯವಾಗಿ   ಹಿಂದೆ ಹಿಂದೆ ಸರಿಯುತ್ತವೆ,

ಕೆಲವೊಮ್ಮೆ ಎಡಪಂಥವಾದರೆ, .........ಇನ್ನೊಮ್ಮೆ ಬಲಪಂಥ

ನೀಯತ್ತನ್ನೇ   ಉಳಿಸಿಕೊಂಡಿಲ್ಲ  ಕೆಲವು

ಈಗೀಗಂತೂ

ಎಷ್ಟೋ ಸಾರಿ,  ಹಾಡು ಹಗಲೇ

ನಟ್ಟ ನಡು ಮೈದಾನದಲ್ಲೂ  ಕೂಡ

ಕೆಲವೊಮ್ಮೆ  ಹತ್ತಾರು ಕಡೆಗಳಿಂದ ಮುತ್ತಿಕೊಂಡಿರುತ್ತವೆ !

ಇನ್ನೊಮ್ಮೆ ಒಂದೂ ಇಲ್ಲದಂತೆ,

ಮಟಾಮಾಯವಾಗಿಬಿಡುತ್ತವೆ, ...

ಅದೇ  ನೆರಳುಗಳು

ಈಗೀಗಂತೂ

ಎಂತಹ  ಕಡು ಬಿಸಿಲಿನಲ್ಲೂ

ಮೊದಮೊದಲು ನನ್ನ  ಬಿಟ್ಟು ಇರುತ್ತಿಲ್ಲದ  ಕೆಲವು

ಈಗ ತಂಪೊತ್ತಿನಲ್ಲೂ  ಜೊತೆಗೂಡಲು

ಕ್ಯಾತೆ ತೆಗೆಯುವವು

ಹೀಗಾಗಿ, ಕೆಲ ನೆರಳುಗಳಿಂದ....

ನಾನೀಗ ದೂರ ದೂರ ಸರಿದಿದ್ದೇನೆ....

ಎಂತಹ ಚಂದ್ರಾಮರನ್ನೂ ಬಿಡದ  ರಾಹುಗಳೆಂಬ ಆರೋಪ ಬೇರೆ,

ಅಸಲು 'ಹಕೀಕತ್ತು' ಏನಂದರೆ,

ನಿರುಪದ್ರವಿ,  ನಿರ್ಲಿಂಗ  ಜೀವಿಗಳಿವು...

ಬಲು ಆಪ್ತ,... ನಂಬಿ ಬರುತ್ತವೆ,

ನಾಯಿಯ ಹಾಗೆ...

ಹೋದಲ್ಲಿ ಬಂದಲ್ಲಿ ಬೆನ್ನು ಬಿಡದ ಹಾಗೆ

'ದೌಡ ದೌಡ' ಹಾಕಿದರೂ ಹೆಜ್ಜೆ, ದಾಪುಗಾಲಲ್ಲೆ  ಹಿಂಬಾಲಿಸುತ್ತ,

ನಿಧಾನವಾದರೂ ಕಾಲುಕಾಲಲ್ಲೆ...  ಬೆರಳು ಹಿಡಿದ  ಮಕ್ಕಳ ಹಾಗೆ

ಕತ್ತಲಾದರೆ, ಬಲು ತಳಮಳ ಅವಕ್ಕೆ, ಹುಡುಕುತ್ತವೆ ನನಗೆ,

'ಹ್ವಾರೇವು' ಸಿಗದ ಹೆಣಮಗಳ ಹಾಗೆ

ಹೌದು,... ಇವುಗಳ ಲೋಕವೆ ಬೇರೆ,

ಕತ್ತಲೆ ಲೋಕದ

ದ್ವಿ ಆಯಾಮಿಗಳು,

ನೀರ ಮೇಲಂತೂ ದೋಣಿಯಂತೆ ತೇಲುತ್ತ,

ಕಂದು, ಕಪ್ಪನೆಯ ಬಣ್ಣದ ಜೀವಿಗಳು,

ಹುಡುಕಿದರೂ ಸಿಗಲಾರವು, ಬಿಳಿಯ ನೆರಳುಗಳು!

ಬೆಳಕು ಎದುರಾದರೆ

ಓಡುತ್ತವೆ ಕತ್ತಲೆಯನ್ನು ಅರಸಿಕೊಂಡು,

ಚಪ್ಪಟೆ ದೇಹಿಗಳು,.... ಬಾಯಿ ಇಲ್ಲದ ಬಡಪಾಯಿಗಳು

ಆಸರೆ ಸಿಕ್ಕರೆ ಮೇಲಕ್ಕೂ ಏರಬಲ್ಲವು,

ಯಾವ ಲೋಕದಲ್ಲಿಯೂ  ಬದಲಾಗದ ತಂತುಗಳು !

ಎಲ್ಲರ  ಜೊತೆಗೂ  ಇವುಗಳ ಸ್ನೇಹ,

ಜೀವಿ, ನಿರ್ಜೀವಿ, ಚಲ-ನಿಶ್ಚಲ, ಬಡವ, ಬಲ್ಲಿದ, ಹೆಣ್ಣು , ಗಂಡು,

ಉಂಹೂಂ, ಯಾವುದೂ ಅಡ್ಡಬರದ ಮೋಹ

ಯಾವ ಭೇದವೆನಿಸದ ಸಮತತ್ವದ  ಗೇಹ

ಆದರೂ ಬೆಳಕಿನೊಂದಿಗೆ ಇವುಗಳ ಸರಸ!

ಆಟವಾಡುತ್ತಲೇ ಇರುತ್ತವೆ,..... ಕಣ್ಣುಮುಚ್ಚಾಲೆ

ಇದ್ದವೋ ಇಲ್ಲವೊ  ಎನ್ನುವಂತೆ ಮರೆಯಾಗುತ್ತವೆ,

ಬೆಳಕು ಬರುತ್ತಲೇ..ಮಾಯ....ಕೈಗೆ ಸಿಗದಲೇ

ಕತ್ತಲೆಯಲ್ಲಿ ಸೇರಿಬಿಡುತ್ತವೆ, ಯಾವುದೋ ಮೂಲೆ

ಹೇ ನೆರಳೇ,

ನನಗೂ ನೆರಳಾಗುವ ಆಸೆ,...

ನೆರಳು ನೀಡುವ ಆಸೆ....

ನಿನ್ನ ಲೋಕದ ಆತ್ಮ ಅರಿಯುವಾಸೆ,

ಕೈಜೋಡಿ, ಕೋರುವೆ ನಿನಗೆ,

ಒಮ್ಮೆ ನೀನು ನಾನಾಗಿ,

ನಾನು ನೀನಾಗಲೇ ?

(ಚಿತ್ರಕೃಪೆ : ಅಂತರ್ಜಾಲದಿಂದ)