ವ್ಯವಸ್ಥೆ - ಲಕ್ಷ್ಮೀಕಾಂತ ಇಟ್ನಾಳ

ವ್ಯವಸ್ಥೆ  

   
'ಅಪ್ಪನ ನೆರಳು ಸ್ವಲ್ಪ ಮೈಮೇಲೆ ಕೆಡವಿಕೋ,  .... ಹಾದಿಗೆ ಬಂದರೂ ಬಂದೀಯಾ'
ತಂಗಿಯನ್ನು 'ಸಣಮಂತ'  ಮಾಡುತ್ತ ಅವ್ವ ಬಡಕೋತಿದ್ದಳು,
.... ನಮ್ಮ ಉಡಾಳತನಕ್ಕೆ,,
ಅವ್ವ ನೀಡುತ್ತಿದ್ದ ದಿವ್ಯೌಷಧೀಯ ಸಲಹೆ ಅದು!

ಅಪ್ಪ ಕೈ ಹಿಡಿದು ನಡೆಸುತ್ತಿದ್ದರೆ, ಅವನ ನೆರಳಲ್ಲೇ ಒಂದಾಗುತ್ತಿದ್ದೆ,
ಅಂವ ಬಯಲಾಟದ ರಾಗಗಳನ್ನು ತನಗಷ್ಟೆ ಕೇಳುವಂತೆ ಗುಣಿಗುಣಿಸುತ್ತಿದ್ದರೂ,
ನಾನೂ ಕಿವಿಯಾಗುತ್ತಿದ್ದೆ, , ....ಅಂವ ದನಿಯಾಗುತ್ತಿದ್ದ,
ನಾನೂ ದನಿಯಾದರೆ ಮಾತ್ರ ...ಕಿವಿದೆರೆದು ಕೇಳುತ್ತಿದ್ದ,.... ತಿದ್ದುತ್ತಿದ್ದ,
'ಅದನ್ ಇನ್ನೊಮ್ಮೆ ಹಾಡಲಾ'  ಎಂಬ ಹಠಕ್ಕೆ ಮತ್ತೆ ಇಂಪುಗರೆಯುತ್ತಿದ್ದ,
ಎಂತಹ ಬಿರುಸು ಕೈಗಳಲ್ಲೂ ...ಮೃದು ಮನಸ್ಸು ಅವನದು, ...
....ದುಡಿಯುತ್ತಿದ್ದ ... ಕಾಯಕ ಯೋಗಿ.....ಈಗ ನೆನಪಷ್ಟೆ.,
 ಅವನ ನೆರಳಲ್ಲಿ ನಡೆದಿದ್ದ ಹೆಜ್ಜೆಗಳಿಗೆ .... ಸಿಕ್ಕಿದ್ದೆಲ್ಲ ಬಂಗಾರವೇ!

ದಿನಗಳುರುಳಿ,  
ಬದಲಾದ ವ್ಯವಸ್ಥೆಯಲ್ಲೀಗ
ಮಗನೊಡನೆ ಹೊರಟರೆ,
ಭಯ ಪಡುತ್ತೇನೆ!
 
ಅದೇ....ಹಾಗಾಗದಂತೆ..... ಎಚ್ಚರ ವಹಿಸುತ್ತೇನೆ,
ದಕ್ಷಿಣೋತ್ತರವೇ ನಿಂತು ಮಾತಾಡಿಸುತ್ತೇನೆ!