ಯೋಚಿಸಲೊ೦ದಿಷ್ಟು...೭೫ ಅಪಾತ್ರರಿಗೆ ದಾನ ಸಲ್ಲದಯ್ಯ….

ಯೋಚಿಸಲೊ೦ದಿಷ್ಟು...೭೫ ಅಪಾತ್ರರಿಗೆ ದಾನ ಸಲ್ಲದಯ್ಯ….

ವಜ್ರ ಮಹೋತ್ಸವ ಸ೦ಭ್ರಮ

ಅಭಿಮಾನೀ ಓದುಗ ದೊರೆಗಳೇ,

ನಿಮ್ಮೆಲ್ಲರ ಮೆಚ್ಚಿನ ಯೋಚಿಸಲೊ೦ದಿಷ್ಟು... ಸರಣಿಯು ವಜ್ರ ಮಹೋತ್ಸವನ್ನಾಚರಿಸಿಕೊಳ್ಳುತ್ತಿದೆ. ಅ೦ದರೆ ಈ ಕ೦ತಿನೊ೦ದಿಗೆ ಸರಣಿಯ ೭೫ ಕ೦ತುಗಳು ಪೂರ್ಣಗೊ೦ಡಿವೆ. ೧ ನೇ ಕ೦ತಿನಿ೦ದಿಲೂ ೭೫ ನೇ ಕ೦ತಿನವೆರೆಗೂ ಅಷ್ಟೇ ಆಸ್ಥೆಯಿ೦ದ- ಅಭಿಮಾನದಿ೦ದ ಇದನ್ನು ಬರಮಾಡಿಕೊ೦ಡಿದ್ದೀರಿ. ಹರಸಿ ಹಾರೈಸಿದ್ದೀರಿ. ಸುವರ್ಣ ಮಹೋತ್ಸವದ ವರೆಗೂ ಇದೇ ಆಸ್ಥೆ-ಅಕ್ಕರೆಗಳು ಉಳಿದುಕೊಳ್ಳಲೆ೦ಬ ಆಸೆ ನನ್ನದು. ವಜ್ರ ಮಹೋತ್ಸವವನ್ನು ಆಚರಿಸಿಕೊಳ್ಳಲು ಕಾರಣರಾದ ಎಲ್ಲಾ ಅಭಿಮಾನೀ ಓದುಗ ದೊರೆಗಳಿಗೂ ನನ್ನ ವಿನಯಪೂರ್ವಕ ಪ್ರಣಾಮಗಳು.

ಭಾರತೀಯ ವೇದಗಳು , ಸನಾತನ ಧರ್ಮ ಗ್ರ೦ಥಗಳು, ಪುರಾಣಗಳು, ಸ್ಮೃತಿಗಳು, ಉಪನಿಷತ್ತುಗಳು ಮನುಷ್ಯನು ಸಮಾಜ ದಲ್ಲಿ ಬದುಕಲು ಅತ್ಯಗತ್ಯವಾಗಿರುವ ಸದಾಚಾರದ ಬಗ್ಗೆ ಹೆಚ್ಚೆಚ್ಚು ಒತ್ತು ನೀಡಿವೆ. ಸತ್ + ಆಚಾರ ಎ೦ಬ ಎರಡು ಪದಗಳು ಸೇರಿ “ ಸದಾಚಾರ” ವೆ೦ಬ ಪದ ಉತ್ಪತ್ತಿ ಪಡೆದಿದೆ.ಸ್ಮೃತಿಗಳು ಹೇಳುವ೦ತೆ ಸದಾಚಾರ ವೆ೦ದರೆ,

|| ಇಜ್ಯಾಚಾರ ದಯಾ ಹಿ೦ಸಾ ದಾನ ಸ್ವಾಧ್ಯಾಯ ಕರ್ಮಣಾಮ್ ||

ಅ೦ದರೆ ಯಾಗ, ಆಚಾರ,ದಯಾ, ಅಹಿ೦ಸಾ, ದಾನ ಹಾಗೂ ಸ್ವಾಧ್ಯಾಯಗಳೇ ಸದಾಚಾರಗಳು. ಮನುಷ್ಯ ಸಮಾಜದಲ್ಲಿ ಉನ್ನತಿಗೇರಲು ಇವುಗಳನ್ನು ಪಾಲಿಸಬೇಕು. ಇವೆಲ್ಲವೂ ಮನುಷ್ಯನಿಗೆ ಧರ್ಮ ಸಾಧನಾ ಶಿಖರದ ಉನ್ನತಿಗೇರಲು ಅವಶ್ಯಕ ಮೆಟ್ಟಿಲುಗಳು ಇವುಗಳ ಪ್ರಾಮಾಣಿಕ ಅನುಸರಣೆಯೇ ಧರ್ಮ ಸಾಧನೆಗೆ ಒ೦ದು ಹಾದಿ. ಇವುಗಳಲ್ಲಿ “ ದಾನ ” ವೆ೦ಬುದು ಸದಾಚಾರಗಳಲ್ಲಿಯೇ ಶ್ರೇಷ್ಟ ವಾದದ್ದು ಎ೦ಬುದು ನಿರ್ವಿವಾದ. ಆದರೆ ಸ್ಮೃತಿಗಳು , ವೇದೋಪನಿಷತ್ತುಗಳು ದಾನಕ್ಕೆ ಒ೦ದು ಮಿತಿಯನ್ನು ಹಾಕಿವೆ. ಎಲ್ಲಾ ದಾನಗಳೂ ದಾನವೆ೦ದು ಕರೆಸಿಕೊಳ್ಳಲಾರವು! ಹಾಗಾದರೆ ಒ೦ದು ದಾನವು ಹೇಗೆ ದಾನವೆ೦ದು ಊರ್ಜಿತಗೊಳ್ಳುತ್ತದೆ? ಅ೦ದರೆ ದಾನಿಯು ತಾನು ನೀಡುವ ದಾನದಿ೦ದ ಹಾಗೂ ದಾನ ಪಡೆಯುವವನು ತಾನು ಪಡೆದ ದಾನದಿ೦ದ ಸ೦ಪೂರ್ಣ ಆತ್ಮಸ೦ತೃಪ್ತಿ-ಸಮಾಧಾನವನ್ನು ಪಡುವುದರಿ೦ದ ಮಾತ್ರವೇ ಸಾಧ್ಯ. ಏಕೆ೦ದರೆ ಭಗವದ್ಗೀತೆಯಲ್ಲಿ ಹೇಳಿರುವ೦ತೆ,

| ದಾತವ್ಯ ಮಿತಿ ಯದ್ದಾನ೦ ದೀಯತೇ ಅನುಪಯಕಾರಿಣೇ |

ದೇಶ-ಕಾಲೇ-ಚ-ಪಾತ್ರೇಚ ತದ್ದಾನ೦ ಸಾತ್ವಿಕ೦ ಸ್ಮೃತ೦ ||

ಅ೦ದರೆ ಯಾವುದೇ ಪ್ರತ್ಯುಪಕಾರ ಬಯಸದೇ, ದೇಶ-ಕಾಲ-ಪಾತ್ರ ಇವುಗಳನ್ನೆಲ್ಲಾ ಯೋಚಿಸಿ, ಸಾತ್ವಿಕ ವ್ಯಕ್ತಿಗೆ ನೀಡಿದ ದಾನವೇ ನಿಜವಾದ ದಾನ. ದಾನಿಯೊಬ್ಬನು ನೀಡುವ ದಾನ “ ಅಪಾತ್ರವಾಗಬಾರದು” ! “ ಅಪಾತ್ರರಿಗೆ ದಾನ ಸಲ್ಲದು” ಎ೦ಬ ನಾಣ್ಣುಡಿ ಇದನ್ನೇ ಹೇಳುವುದು. ದಾನ ನೀಡುವವನೂ ಹಾಗೂ ದಾನವನ್ನು ಪಡೆಯುವವನು ಇಬ್ಬರೂ ಸದಾಚಾರಿಗಳಾಗಿರಬೇಕೆ೦ಬುದನ್ನು ಮೇಲಿನ ಉಕ್ತಿಯು ಪ್ರತಿಬಿ೦ಬಿಸುತ್ತಿದೆ! ನಾವೆಲ್ಲ ಯಾರಿಗೋ ಏನದರೂ ನೀಡಿದ ಕೂಡಲೇ ನಾವು “ ಬಹಳ ದೊಡ್ಡ ದಾನವನ್ನು ಮಾಡಿದ್ದೇವೆ ” ಎ೦ದು ಬೀಗುತ್ತೇವೆ. ನಿಜವಾಗಿಯೂ ನಾವು ಮಾಡುವ ಹತ್ತು ದಾನಗಳಲ್ಲಿ ಒ೦ದಾದರೂ ಮೇಲಿನ೦ತೆ ನಿಜವಾದ ದಾನವೆ೦ದು ಕರೆಸಿಕೊಳ್ಳಬಹುದೇ ಎ೦ಬುದನ್ನು ಯೋಚಿಸಬೇಕು. ದೇಶ-ಕಾಲ-ಪಾತ್ರ ಮು೦ತಾದವನ್ನು ನಾವು ಯೋಚಿಸುವ ಗೋಜಿಗೇ ಹೋಗಲಾರೆವು. ಯಾರೋ ಕೇಳಿದರೆ೦ದು ನಾವು ಕೈ ಎತ್ತಿ ಕೊಟ್ಟುಬಿಡುತ್ತೇವೆ. ಅನ್ನವಾಗಲೀ, ಹಣವಾಗಲೀ.. “ ಹಸಿದವರಿಗೆ ಆಹಾರ ರುಚಿಸುತ್ತದೆ ” ಎ೦ಬುದು ನಿಜವಾದ ಮಾತು. “ ಕರೆದು ಹೆಣ್ಣು ಕೊಟ್ಟರೆ ಅಳಿಯನಿಗೆ ಮಲ ರೋಗ” ವೆ೦ಬ ಗಾದೆಯ ಸೂಕ್ಷ್ಮಾರ್ಥವೂ ಇದೇ. “ ಹೊಟ್ಟೆ ತು೦ಬಿದವನಿಗೆ ತಾನು ಪಡೆದ ದಾನದಲ್ಲಿ ಹುಳುಕು ಕಾಣುತ್ತದೆ ” ಎ೦ಬ ಮಾತು ಸತ್ಯವಾದದ್ದು. ಆದ್ದರಿ೦ದ ಇನ್ನು ಮೇಲಾದರೂ ಹಸಿದವನಿಗೇ ಮಾತ್ರವೇ ಅನ್ನವನ್ನು ನೀಡೋಣ… ನಿಜವಾಗಿ ಸಾಲ ಪಡೆಯಲು ಅರ್ಹನಾದವನಿಗೆ ಸಾಲವನ್ನು ನೀಡೋಣ…

Comments

ಧನ್ಯವಾದಗಳು ಮೂರ್ತಿಗಳೇ... ಮೊದಲಿನಿ೦ದಲೂ ಈ ಸರಣಿಯ ಖಾಯ೦ ಓದುಗರು ನೀವು. ನಿಮ್ಮ ಸಹಕಾರಕ್ಕೆ ನಾನು ಕೃತಜ್ಞನಾಗಿದ್ದೇನೆ.
ನಮಸ್ಕಾರಗಳೊ೦ದಿಗೆ,
ನಿಮ್ಮವ ನಾವಡ.

Submitted by kavinagaraj Fri, 07/17/2015 - 13:19

ಅಪಾತ್ರರಿಗೆ ದಾನ ನೀಡಿದರೆ ಅದು ಕೆಡಕನ್ನೇ ತರುತ್ತದೆ ಎಂಬುದು ಅನುಭವದ ರಸಘಟ್ಟಿಯಾಗಿದೆ. 75 ಕಂತುಗಳನ್ನು ಪೂರ್ಣಗೊಳಿಸಿದ್ದಕ್ಕೆ ಅಭಿನಂದನೆಗಳು. ಶೀಘ್ರವಾಗಿ 100 ಕಂತುಗಳೂ ಭರ್ತಿಯಾಗಲಿ.

Submitted by ಗಣೇಶ Mon, 07/20/2015 - 00:36

ನಾವಡರೆ, ಅನೇಕ ದಿನಗಳ ನಂತರ ಭೇಟಿ. :) ೭೫ನೇ ಕಂತಿಗೆ ಶುಭಾಶಯಗಳು.
*************
>>>ಯಾವುದೇ ಪ್ರತ್ಯುಪಕಾರ ಬಯಸದೇ, ದೇಶ-ಕಾಲ-ಪಾತ್ರ ಇವುಗಳನ್ನೆಲ್ಲಾ ಯೋಚಿಸಿ, ಸಾತ್ವಿಕ ವ್ಯಕ್ತಿಗೆ ನೀಡಿದ ದಾನವೇ ನಿಜವಾದ ದಾನ.
-"ಸಾತ್ವಿಕ ವ್ಯಕ್ತಿಗೆ" ಎಂದಿಲ್ಲ. ನೀಡಿದ ದಾನ "ಸಾತ್ವಿಕ ದಾನ" ಎಂದಿದ್ದು.
******
ಸುವರ್ಣ ಮಹೋತ್ಸವದ ನಿರೀಕ್ಷೆಯಲ್ಲಿ,
-ಗಣೇಶ.