ದೇವರೊಡನೆ ಸಂದರ್ಶನ - 6

     "ಏನ್ರೀ ಇದು? ಎಂದೂ ಇಲ್ಲದ್ದು ಇವತ್ತು ಎಲ್ಲಾ ಅಚ್ಚುಕಟ್ಟಾಗಿ ಹೊದಿಕೆ ಮಡಿಸಿಟ್ಟಿದ್ದೀರಿ. ಟವೆಲ್ಲನ್ನು ಎಲ್ಲೋ ಬಿಸಾಕುತ್ತಿದ್ದವರು ನೀಟಾಗಿ ಇಟ್ಟಿದ್ದೀರಿ. ದೇವರು ಒಳ್ಳೇ ಬುದ್ಧಿ ಕೊಟ್ಟಿದ್ದಾನೆ. ಹೀಗೆಯೇ ಮನೆಕೆಲಸಕ್ಕೂ ಸಹಾಯ ಮಾಡೋ ಬುದ್ಧೀನೂ ಬರಲಿ" - ಪತ್ನಿಯ ಮಾತಿಗೆ ನಗುತ್ತಾ ಗಣೇಶರು, "ಧ್ಯಾನ ಕಣೇ, ಧ್ಯಾನ. ಮಾಡೋ ಕೆಲಸಾನ ನೀಟಾಗಿ ಗಮನವಿಟ್ಟು ಮಾಡಿದರೆ ಅದೇ ಧ್ಯಾನ. ಒಳ್ಳೆಯ ಬಿಸಿ ಬಿಸಿ ಚಾ ತೆಗೆದುಕೊಂಡು ಬಾ. ಧ್ಯಾನ ಮಾಡುತ್ತಾ ಕುಡಿಯುತ್ತೇನೆ. ವಾಕಿಂಗಿಗೂ ಹೋಗಬೇಕಲ್ಲಾ?" ಎಂದು ಉತ್ತರಿಸಿದರು. "ಎಷ್ಟು ದಿವಸಾನೋ ಇಂತಹ ಬುದ್ಧಿ, ನಾನೂ ನೋಡ್ತೀನಿ" ಅನ್ನುತ್ತಾ ಅವರ ಪತ್ನಿ ಅಡುಗೆ ಮನೆಗೆ ಹೋದರು.

     ರತ್ನಗಿರಿ ಬೋರೆ ಕಡೆಗೆ ಯಾಂತ್ರಿಕವಾಗಿ ಹೋಗುತ್ತಿದ್ದಾಗ ಗಣೇಶರ ಪಕ್ಕದಲ್ಲೇ ಬುರ್ರನೆ ಬಂದು ನಿಂತ ಬೈಕಿನವ, "ರೀ, ಸ್ವಾಮಿ, ನೋಡಿಕೊಂಡು ಸೈಡಿನಲ್ಲಿ ಹೋಗಿ. ನೀವು ಕೈಕಾಲು ಮುರಿದುಕೊಳ್ಳೋದಲ್ಲದೆ ನಾವೂ ಮುರಿದುಕೊಳ್ಳುವಂತೆ ಮಾಡುತ್ತೀರಿ. ಬೆಳಬೆಳಗ್ಗೇನೇ ಹೀಗಾದ್ರೆ ಹೆಂಗ್ರೀ?" ಎಂದವನೇ ಗಣೇಶರು ಉತ್ತರಿಸುವ ಮುನ್ನವೇ ಮತ್ತೆ ಬುರ್ರನೆ ಹೊರಟುಹೋದ. ಬೆಚ್ಚಿಬಿದ್ದು ಎಚ್ಚೆತ್ತ ಗಣೇಶರು, "ಹೌದಲ್ಲಾ, ನಡೆಯುವಾಗ ನನ್ನ ಗಮನ ರಸ್ತೆ ಮೇಲೆ ಇರಬೇಕಿತ್ತು. ನನ್ನದೇ ತಪ್ಪು" ಎಂದುಕೊಂಡು ಫುಟ್ ಪಾತಿನ ಮೇಲೆ ನಡೆಯುತ್ತಾ ಬೋರೆ ತಲುಪಿ ಕಲ್ಲು ಮಂಟಪದ ಬೆಂಚಿನ ಮೇಲೆ ಕುಳಿತು ಸುಧಾರಿಸಿಕೊಳ್ಳತೊಡಗಿದರು.

ಗಣೇಶ: ದೇವರೇ, ನಿನ್ನ ಸಹವಾಸ ಸಾಕಾಯಿತು. ನೀನು ಸಿಗದೇ ಇದ್ದಿದ್ದರೇ ಚೆನ್ನಾಗಿತ್ತು. ಆಗಲೇ ಆರಾಮವಾಗಿದ್ದೆ. ಈಗ ತಲೆಗೆ ಹುಳ ಬಿಟ್ಟುಕೊಂಡು ಒದ್ದಾಡುವಂತಾಗಿದೆ. ಬರೀ ಡೌಟುಗಳೇ ತಲೆ ತಿನ್ನುತ್ತಿವೆ. ಎಲ್ರೂ 'ಏನೋ ಗಣೇಶ, ಹುಷಾರಿಲ್ಲವಾ?' ಅಂತ ಕೇಳೋಕೆ ಶುರು ಮಾಡಿಬಿಟ್ಟಿದ್ದಾರೆ. ನನಗೂ ಈ ಸಂದರ್ಶನ ನಿಲ್ಲಿಸಿಬಿಟ್ಟು ಮೊದಲಿನಂತೆ ಇದ್ದುಬಿಡಲೇ ಅನ್ನಿಸುತ್ತಿದೆ. ಏನು ಪ್ರಶ್ನೆ ಕೇಳಬೇಕು ಅಂತಾ ಯೋಚನೆ ಮಾಡುತ್ತಾ ಬರುತ್ತಿದ್ದಾಗ ಬೈಕಿಗೆ ಸಿಕ್ಕಿ ನಿನ್ನ ಹತ್ತಿರವೇ ನೇರವಾಗಿ ಬರುವಂತಾಗಿಬಿಟ್ಟಿತ್ತು..

ದೇವರು: ಗಣೇಶಾ, ಯೋಚನೆ ಮಾಡಬೇಡ. ನನ್ನ ಅಭಯಹಸ್ತ ಇರುವವರೆಗೂ ನೀನು ಕ್ಷೇಮವಾಗಿರುವೆ. ನೀನು ಡೌಟೇಶ ಆದರೇನೇ ರೈಟೇಶ ಆಗೋದು. ತಿಳಿದುಕೊಳ್ಳಬೇಕು ಅನ್ನೋ ಮನಸ್ಸು ನಿನಗೆ ಬಂದಿರೋದರಿಂದಲೇ ಹೀಗಾಗುತ್ತಿದೆ. ನಿನಗೆ ಎರಡು ಅವಕಾಶ ಕೊಡುತ್ತೇನೆ. ಒಂದು, ಇಲ್ಲಿಗೇ ನಿಲ್ಲಿಸಿಬಿಟ್ಟು ಎಲ್ಲವನ್ನೂ ಮರೆತು ಮೊದಲು ಹೇಗಿದ್ದೆಯೋ ಹಾಗೆಯೇ ಇರುವಂತೆ ಅವಕಾಶ ಮಾಡಿಕೊಡುತ್ತೇನೆ. ಇನ್ನೊಂದು, ಮುಂದುವರೆಸುವ ಇಚ್ಛೆ ಇದ್ದರೆ ಮುಂದುವರೆಸಿ ಮನಸ್ಸಿನಲ್ಲಿರುವುದನ್ನು ಕೇಳುತ್ತಾ ಹೋಗು. ಏನು ಮಾಡಬೇಕು ಅನ್ನುವುದು ನಿನಗೇ ಬಿಟ್ಟಿದ್ದು.

ಗಣೇಶ: ಇದ್ದಕ್ಕಿದ್ದಂತೆ ನಿಲ್ಲಿಸಲೂ ಮನಸ್ಸಾಗುತ್ತಿಲ್ಲ. ಹೇಗೂ ನೀರಿಗೆ ಬಿದ್ದಾಗಿದೆ. ಈಜುತ್ತಾ ಎಷ್ಟು ಸಾಧ್ಯವೋ ಅಷ್ಟು ಈಜುತ್ತೇನೆ. ಸಾಕು ಅನ್ನಿಸಿದಾಗ ನಿಲ್ಲಿಸಿಬಿಡುತ್ತೇನೆ. ಹೇಗೂ ನೀನು ಸಹಾಯಕ್ಕೆ ಇದ್ದೀಯಲ್ಲಾ! ಈ ಧ್ಯಾನದ ಬಗ್ಗೆಯೇ ತಲೆ ಕೆಡಿಸಿಕೊಂಡಿದ್ದೆ. ಇದಕ್ಕೂ ದೊಡ್ಡದು ಯಾವುದು?

ದೇವರು: ನಿನ್ನ ನಿರ್ಧಾರ ಸರಿಯಾಗಿದೆ. ತಿಳಿಯುವ ಮತ್ತು ತಿಳಿದಿದ್ದನ್ನು ಇತರರಿಗೆ ಹೇಳುವ ಪ್ರಯತ್ನ ಒಳ್ಳೆಯದು. ಈ ಧ್ಯಾನಕ್ಕಿಂತಲೂ ಮೇಲಿನದು 'ಶಕ್ತಿ' ಆಗಿದೆ. ದೈಹಿಕ ಮತ್ತು ಮಾನಸಿಕ ಶಕ್ತಿಗಳ ಸಮನ್ವಯ ಎಲ್ಲಕ್ಕಿಂತಲೂ ದೊಡ್ಡದಾಗಿದೆ.

ಗಣೇಶ: ಶಕ್ತಿ ಹೇಗೆ ದೊಡ್ಡದು?

ದೇವರು: ಒಬ್ಬ ರೋಗಿಷ್ಟ, ಬಲಹೀನ ವ್ಯಕ್ತಿ ಎಷ್ಟೇ ಬುದ್ಧಿವಂತ, ವಿದ್ಯಾವಂತ ಆಗಿದ್ದರೂ ತನ್ನ ಇಷ್ಟಾನಿಷ್ಟಗಳನ್ನು ಪೂರ್ಣಗೊಳಿಸಿಕೊಳ್ಳುವುದಕ್ಕೆ ಅವನ ಶಕ್ತಿಹೀನತೆ ಅಡ್ಡಿ ಬರುತ್ತದೆ. ತಮ್ಮ ಚಿಂತನೆಗಳನ್ನು ಅವರು ಕಾರ್ಯರೂಪಕ್ಕೆ ತರಲಾರರು. ಅದೇ ರೀತಿ ಒಬ್ಬ ಆರೋಗ್ಯವಂತ, ಧೃಡಕಾಯ ವ್ಯಕ್ತಿ ಸಹ ಮನೋಬಲ ಇಲ್ಲದಿದ್ದರೆ ಏನನ್ನೂ ಸಾಧಿಸಲಾರ.

ಗಣೇಶ: ಬಲಕ್ಕೇ ಬೆಲೆ ಅನ್ನುವುದಕ್ಕೆ ನಮ್ಮೂರಿನಲ್ಲೇ ಉದಾಹರಣೆಯಿದೆ. ನಮ್ಮೂರಿನ ಪುಡಾರಿ ಓದಿರೋದು ಬರೀ ಏಳನೇ ಕ್ಲಾಸು ಅಷ್ಟೆ. ಆದರೆ ಅವನಿಗೆ ಜಾತಿಬಲ ಇದೆ, ತೋಳ್ಬಲ ಇದೆ, ಜನಬಲ ಇದೆ, ಅಧಿಕಾರದ ಬಲ ಇದೆ. ಅವನ ಮಾತು, ನಡೆ-ನುಡಿ ಯಾರಿಗೆ ಇಷ್ಟವಾಗುತ್ತೋ, ಬಿಡುತ್ತೋ ಆದರೆ ಯಾರೂ ಅವನ ವಿರುದ್ಧ ಮಾತನಾಡುವುದೇ ಇಲ್ಲ. ರೌಡಿ ಸಹವಾಸ ನಮಗೇಕೆ ಅಂತ ಸುಮ್ಮನಿರುತ್ತಾರೆ. ದೊಡ್ಡ ದೊಡ್ಡ ಅಧಿಕಾರಿಗಳೂ ಅವನ ಮುಂದೆ ತಗ್ಗಿ ಬಗ್ಗಿ ನಡೆಯುತ್ತಾರೆ.

ದೇವರು: ಕೇವಲ ಪಾಂಡಿತ್ಯ, ವಿದ್ಯೆ, ಜ್ಞಾನ ಇರುವ ನೂರು ಜನರನ್ನು  ಬಲವಿರುವ, ಪಾಂಡಿತ್ಯ ಮತ್ತು ಶಕ್ತಿ ಎರಡೂ ಇರುವ ಒಬ್ಬ ವ್ಯಕ್ತಿ ಸೋಲಿಸಬಲ್ಲ.

ಗಣೇಶ: ನಿನ್ನ ಬಗ್ಗೆಯೇ ಒಂದು ಸುಭಾಷಿತ ಇದೆ: ಶ್ರೀಧರ್ ಹೇಳಿದ್ದುದನ್ನು ಬರೆದುಕೊಂಡು ಬಂದಿದ್ದೇನೆ. ನನಗೆ ಈ ಸಂಸ್ಕೃತ, ಗಿಂಸ್ಕೃತ ಅಂದರೆ ಅಲರ್ಜಿ. ಆದರೆ ಅದರಲ್ಲಿನ ವಿಷಯ ಚೆನ್ನಾಗಿತ್ತು. "ಅಶ್ವಂ ನೈವ ಗಜಂ ನೈವ ವ್ಯಾಘ್ರಂ ನೈವಚ ನೈವಚ; ಅಜಾಪುತ್ರಂ ಬಲಿಂ ದಧ್ಯಾತ್ ದೇವೋ ದುರ್ಬಲಘಾತಕಃ"! ಕುದುರೆಯನ್ನಾಗಲೀ, ಆನೆಯನ್ನಾಗಲೀ ಬಲಿ ಕೊಡಲ್ಲ. ಹುಲಿಯನ್ನಂತೂ ಕೊಡುವುದೇ ಇಲ್ಲ. ಆದರೆ ಬಡಪಾಯಿ ಮೇಕೆಯನ್ನು ಬಲಿಕೊಡುತ್ತಾರೆ. ದೇವರೂ ದುರ್ಬಲನನ್ನು ಘಾತಿಸುತ್ತಾನಂತೆ! ಏನು ಹೇಳ್ತೀಯಾ ದೇವರೇ?

ದೇವರು: ಇದು ನಿಸರ್ಗ ನಿಯಮವಾಗಿದೆ. ಬಲಶಾಲಿಯ ತಂಟೆಗೆ ಯಾರೂ ಹೋಗುವುದಿಲ್ಲ. ಪ್ರಪಂಚದಲ್ಲಿನ ನಿಮ್ಮ ಎಲ್ಲಾ ದುಃಖಗಳ, ಅಸಂತೋಷಗಳ ಮೂಲ ಕಾರಣ ದುರ್ಬಲತೆಯಾಗಿದೆ. ಅಸಹಾಯಕರಾಗುವುದು, ಸುಳ್ಳು ಹೇಳುವುದು, ಕೊಲೆಗಾರರಾಗುವುದು, ಇನ್ನಿತರ ಅಪರಾಧಗಳನ್ನು ಮಾಡುವುದು, ಇತ್ಯಾದಿಗಳ ಮೂಲ ಕಾರಣವೆಂದರೆ ದುರ್ಬಲರಾಗಿರುವುದು. ದುರ್ಬಲರಾಗಿರುವ ಭಯ ಕೀಳರಿಮೆಗೆ, ಪಾಪ ಮಾಡುವುದಕ್ಕೆ ನಿಶ್ಚಿತ ಮೂಲಕಾರಣವಾಗಿದೆ. ದುರ್ಬಲಗೊಳಿಸುವಂತಹದು ಏನೂ ಇಲ್ಲವೆಂದರೆ, ಅಲ್ಲಿ ಸಾವಿಲ್ಲ, ದುಃಖವಿಲ್ಲ.

ಗಣೇಶ: ನಿಜ ದೇವರೇ. ನಮ್ಮ ದೇಶ ಶತಮಾನಗಳ ಕಾಲ ಗುಲಾಮಗಿರಿಗೆ ಒಳಗಾಗಿತ್ತು ಎಂದರೆ -ನಮ್ಮಲ್ಲಿ ಜನಬಲ ಮತ್ತು ದೈಹಿಕ ಬಲ ಇದ್ದರೂ ಸಹ- ಅದಕ್ಕೆ ಕಾರಣ ನಮ್ಮವರ ಮಾನಸಿಕ ದೌರ್ಬಲ್ಯವೇ ಹೊರತು ಮತ್ತೇನೂ ಅಲ್ಲ. ದೈಹಿಕ ಬಲ, ಮಾನಸಿಕ ಬಲ ಎರಡೂ ಇದ್ದರೆ ಮಾತ್ರ ಏಳಿಗೆ ಸಾಧ್ಯವೆಂಬುದನ್ನು ಒಪ್ಪಲೇಬೇಕು. ಈ ಶಕ್ತಿಗಿಂತಲೂ ದೊಡ್ಡದು ಯಾವುದು ಎಂಬುದನ್ನು ನಾಳೆ ತಿಳಿದುಕೊಳ್ಳುತ್ತೇನೆ ದೇವರೇ. ಹೋಗಿಬರಲಾ?

ದೇವರು: ನಿನ್ನಿಷ್ಟ. ಶುಭವಾಗಲಿ. 

-ಕ.ವೆಂ.ನಾಗರಾಜ್.