ಹೊಗಳುವದಿಲ್ಲ ನಾ ನಿನ್ನ, ಕೇಳು ಒಮ್ಮೆ ಈ ಸಲಹೆಯನ್ನ.

ಹೊಗಳುವದಿಲ್ಲ ನಾ ನಿನ್ನ,

ಕೇಳು ಒಮ್ಮೆ ಈ ಸಲಹೆಯನ್ನ.

ಹೂದೋಟದಲಿ ಎಂದೂ

ಸುಳಿಯದಿರು ಹುಡುಗಿ,

ಮುತ್ತೀತು ದುಂಬಿ, ತುಟಿಯ,

ಹೂವೆಂದು ಬಗೆದು.

ಹೊಗಳುವದಿಲ್ಲ ನಾ ನಿನ್ನ,

ಕೇಳು ಒಮ್ಮೆ ಈ ಸಲಹೆಯನ್ನ.

ನೆಟ್ಟಿರುಳಲಿ ಎಂದೂ,

ಹೊರಗೆ ಬರದಿರು ಹುಡುಗಿ,

ಕೂಗೀತು ಕೋಳಿ, ಹೊಂಬಣ್ಣವ,

ಹೊಂಬೆಳಕೆಂದು ಬಗೆದು.

ಹೊಗಳುವದಿಲ್ಲ ನಾ ನಿನ್ನ,

ಕೇಳು ಒಮ್ಮೆ ಈ ಸಲಹೆಯನ್ನ.

ಮಾವಿನ ಮರದಡಿ ಎಂದೂ,

ನಿಲ್ಲದಿರು ಹುಡುಗಿ,

ಕಚ್ಚೀತು ಗಿಳಿ, ಗಲ್ಲವ,

ಮಾವೆಂದು ಬಗೆದು.

ಹೊಗಳುವದಿಲ್ಲ ನಾ ನಿನ್ನ,

ಕೇಳು ಒಮ್ಮೆ ಈ ಸಲಹೆಯನ್ನ.

ಕೊಳದೊಳು ಎಂದೂ

ಈಸಲಿಳಿಯದಿರು ಹುಡುಗಿ,

ನುಗ್ಗೀತು ಮೀನ್ಚುಳ್ಳಿ, ಕಂಗಳ,

ಮೀನ್ಗಳೆಂದು ಬಗೆದು.