ಮಿಸ್ಸಿಂಗ್ ಯೂ...

ನೀನಿಲ್ಲದೆಯೂ ಖುಷಿಯಾಗಿರಲು ಸಾಧ್ಯ
ಎಂಬ ಪಾಠವನು ಕಲಿಯಲಾಗದೇ
ಸುಮ್ಮನೆ ಹಟ ಮಾಡುತಿಹುದು
ಪುಂಡ ಹುಡುಗನಂತಹ ಸಂಜೆ…

ಯಾವಾಗಲೂ ತನ್ನನ್ನು
ನಿನ್ನ ಮುದ್ದು ಮೊಗಕೆ ಹೋಲಿಸಿ
ನಿರ್ಲಕ್ಷ್ಯ ಮಾಡುತ್ತೇನೆಂದು ನೊಂದು
ಮುನಿಸಿಕೊಂಡಿಹನು ಚಂದಿರ…

ನೀನೆಲ್ಲೋ ದೂರದಲ್ಲಿ
ನಾನೆಲ್ಲೋ ಈ ಮೂಲೆಯಲ್ಲಿ
ನಡುವಿನ ದೂರದಂತಷ್ಟಿರುವ
ಪ್ರೀತಿಯನು ಕಂಡು
ಏನೂ ಮಾಡಲಾಗದೇ ಇಬ್ಬರನೂ
ಪಿಳಿ ಪಿಳಿ ನೋಡುತಿಹುದು ನಕ್ಷತ್ರ…

ನಿನ್ನನ್ನು ಮಿಸ್ ಮಾಡಿಕೊಳ್ಳುತ್ತಿಲ್ಲ
ಎಂದು ಹೇಳಬಯಸುವ ಬಾಯನ್ನು
ಮೌನದಲೆ ಅಪಹಾಸ್ಯ ಮಾಡಿ
ಕಟ್ಟಿಹಾಕುತಿದೆ ಆತ್ಮಸಾಕ್ಷಿ..

ನೀನಿಲ್ಲದಿದ್ದರೂ ನಾ ಜೀವಂತವಾಗಿದ್ದೇನೆ
ಅನ್ನುತಲಿಹರು ಇಲ್ಲಿನ ಜನರು,
ಉಸಿರಾಡುತ್ತಿದ್ದರೆ ಸಾಕು ಬದುಕಿದ್ದಾನೆ
ಅಂದುಕೊಳ್ಳುವ ಮೂಢರು..