ನಡುಗಿಸಲಿರುವ "ಮಾಮು ಫೈನು"

ಟ್ರಾಫಿಕ್ ನಿಯಮಗಳನ್ನು ಮೀರಿದವರಿಗೆ ("ಟ್ರಾಫಿಕ್ ಪೋಲಿಸ್ ಹಿಡಿದರೆ ನಿಮಗೆ" ಎಂದು ಓದಿಕೊಳ್ಳಿ) ಹಾಕಲಾಗುತ್ತಿರುವ ಫೈನುಗಳನ್ನು ಆರು ಪಟ್ಟು ಹೆಚ್ಚಿಸುವ ಕಾಯ್ದೆಯೊಂದು ಈ ಸಲದ ಸಂಸತ್ ಅಧಿವೇಶನದಲ್ಲಿ ಮಂಡಿಸಲಾಗುವುದಂತೆ.

ವೇಗ ಮಿತಿಯನ್ನು ಮೀರಿದವರಿಗೆ ಈ ಹಿಂದಿನಂತೆ ಇದ್ದ ೫೦೦ ರೂ ಜುಲ್ಮಾನೆ ೩,೦೦೦ ರೂ ಗಳಿಗೆ ಏರಿಸಲಾಗುವುದಂತೆ. ಅಂದರೆ ನೀವು ವೇಗಮಿತಿಯನ್ನು ಮೀರಿದಿರಿ ಎಂದು ಟ್ರಾಫಿಕ್ ಮಾಮು (ಪೋಲಿಸರು) ಹಿಡಿದು ನಿಲ್ಲಿಸಿದರೆ ನೀವು ಇನ್ನು ಮೇಲೆ ಮೂರು ಸಾವಿರ ರೂಪಾಯಿ ತೆತ್ತಬೇಕು!
ತದನಂತರ ೫,೦೦೦ ರೂ ನಂತೆ ಪ್ರತಿ ಬಾರಿ ಹೀಗೆ ಹಿಡಿಯಲ್ಪಟ್ಟಾಗ ಕಟ್ಟಬೇಕು.

ನೋಂದಣಿಯಾಗದ ಗಾಡಿಗಳಿಗೆ ಜುಲ್ಮಾನೆ ಮೊದಲನೆಯ ಜುಲ್ಮಾನೆಗೆ ೧೦,೦೦೦ ರೂಗಳಿಗೆ ಏರಿಸಲ್ಪಟ್ಟಿದ್ದರೆ ತದನಂತರ ಜುಲ್ಮಾನೆಗಳಿಗೆ ೨೦,೦೦೦ ರೂ ಗಳಂತೆ ಎರಡು ಪಟ್ಟು ಕಟ್ಟಬೇಕಾಗುವುದಂತೆ! ಪರ್ಮಿಟ್ ಇಲ್ಲದ ಚಾಲಕರಿಗೂ ಇದೇ ರೀತಿಯ ಜುಲ್ಮಾನೆ.

ಇಷ್ಟೇ ಅಲ್ಲ, ಟ್ರಾಫಿಕ್ ಮಾಮುವಿಗೆ ಯಾರಾದರೂ ಯಾವ ಸಮಯದಲ್ಲಾದರೂ "ಅಪಾಯಕಾರಿಯಾಗಿ ಓಡಿಸುತ್ತಿದ್ದಾರೆ" ಎಂದನಿಸಿದರೆ ಮಾಮು ಎರಡು ಸಾವಿರ ರೂಪಾಯಿಗಳಷ್ಟು ಜುಲ್ಮಾನೆ ವಿಧಿಸಬಹುದಂತೆ.

ಇದು ಎಕನಾಮಿಕ್ ಟೈಮ್ಸ್ ಇಂದು ವರದಿ ಮಾಡಿರುವ ಸುದ್ದಿಯ ಸಾರಾಂಶ.

ಹೀಗೆ ಹೊರತಂದ ಕಾಯ್ದೆಯಿಂದ ಮುಂದೆ ಏನಾಗಬಹುದು? ಸ್ವಲ್ಪ ಅಲೋಚಿಸಿ ನೋಡುವುದು ಒಳಿತು.

ಮಾಮುಗಳಿಗೆ ಈಗಾಗಲೇ ಹೆಲ್ಮೆಟ್ಟು ಕೊಟ್ಟು ಹೊಟ್ಟೆ ತುಂಬಿಸಿಕೊಳ್ಳುವ ವಿಧಾನ ಹುಡುಕಿಕೊಟ್ಟಿರುವ ದಿನಗಳಲ್ಲಿ ಲಂಚ ಪ್ರವೃತ್ತಿ ಇನ್ನಷ್ಟು ಹೆಚ್ಚಾಗುವುದು. ಈಗಾಗಲೇ ಸಮೃದ್ಧವಾಗಿ ಆಚರಿಸಲ್ಪಡುವ ಮಾಮುಗಳನ್ನು "ಕೈತುಂಬಿಸಿ" ಚೀಟಿ ಹರಿಯದಂತೆ ಮಾಡುವ ಸನ್ನಿವೇಶಗಳು ಹೆಚ್ಚಾಗುವುದು. ಟ್ರಾಫಿಕ್ ಪೋಲಿಸರನ್ನು ಕಂಡರೆ ಹೆದರುವ ಜನ ಇನ್ನಷ್ಟು ಹೆದರಿ ನಡುಗುವಂತಾಗಬಹುದು. ಮಾಮುಗಳಿಗೆ ಮತ್ತೊಂದು ಅಸ್ತ್ರ ಸಿಕ್ಕಂತಾಗುವುದು.
ಜುಲ್ಮಾನೆ ವಿಫಲವಾಗಿ ಲಂಚ ಪ್ರವೃತ್ತಿ ಹೆಚ್ಚಾಗುವಂತಹ ಕಾಯ್ದೆ ಎಂತಹ ಕಾಯ್ದೆಯಾಗುವುದು?

ರಸ್ತೆಯ, ಟ್ರಾಫಿಕ್ ನ ನರಕಯಾತನೆಗಳೊಂದಿಗೆ ಈಗಾಗಲೆ ರಸ್ತೆಯಲ್ಲಿ ಚಿಕ್ಕಪುಟ್ಟ ತಾಪತ್ರಯಗಳಿಗೆ ಸಿಕ್ಕರೂ ಮಾಮುಗಳಿಂದ ನರಕಯಾತನೆಗೆ ಒಳಪಡುವ ವೆಹಿಕಲ್ ಬಳಸುವವರಿಗೆ ಇನ್ನಷ್ಟು ತೊಂದರೆಯಾಗುವುದು. ಇಂತಹ ಜುಲ್ಮಾನೆಗಳು ಬಡವರಿಗೆ ಹಾಗೂ ಮಧ್ಯಮವರ್ಗದವರಿಗೆ (ಅದರಲ್ಲೂ ವಿದ್ಯಾರ್ಥಿಗಳಿಗೆ) ಸಿಂಹಸ್ವಪ್ನವಾಗಿ ನಡುಗಿಸುವುದಂತೂ ಖರೆ!