ಕಿವಿಯಿಂದಿಳಿದ ಸಂಗೀತದ ಗುಂಗು!!

ಮನುಷ್ಯನ  ತಲೆಯ ಮೇಲೆ ದೇವರುಗಳೋ   ದೆವ್ವಗಳೋ  ಸವಾರಿ ಮಾಡುತ್ತ ಇರುತ್ತವಂತೆ .   ಮಸ್ತಕದಿಂದಿಳಿಸಿದ ಪುಸ್ತಕಗಳ   ಬಗ್ಗೆ   ಹಿಂದೆ ಬರೆದಿದ್ದೆ .   ಈಗ  ಇದನ್ನು ಓದಿ.

ವರುಷ ೧೯೭೬ ಇರಬಹುದು.   ಎಂಟನೇ   ಕ್ಲಾಸಿನಲ್ಲಿದ್ದೆ .   'ಮಾಮರವೆಲ್ಲೋ  ಕೋಗಿಲೆ ಎಲ್ಲೋ  ಏನೀ ಸ್ನೇಹ ಸಂಬಂಧ  ' ಹಾಡನ್ನು   ಕ್ಲಾಸಿನಲ್ಲಿ   ಗುನುಗುನಿಸಿ   ಬೈಸಿಕೊಂಡಿದ್ದು   ನೆನಪಿದೆ. ಆಗಲೇ  ವಿವಿಧಭಾರತಿಯಲ್ಲಿ      ಎಮ್.ಎಸ್,ಐ .ಎಲ್   ನವರು ವಾರಕ್ಕೊಮ್ಮೆ  ನಡೆಸಿಕೊಡುತ್ತಿದ್ದ  ಗೀತಲಹರಿ ( ಅಥವಾ ಬೇರೇನೋ ಹೆಸರು)  ಕಾರ್ಯಕ್ರಮದಿಂದ ಭಾವಗೀತೆಗಳ    ಬೇಂದ್ರೆ , ಕಂಬಾರ , ಮೈಸೂರು ಅನಂತಸ್ವಾಮಿ , ಪಿ.ಕಾಳಿಂಗರಾಯರು , ಅಶ್ವತ್ಥ  , ಸುಬ್ಬಣ್ಣ    ಮುಂತಾದ  ಗಾಯಕರು , ಕವಿಗಳ  ಬಗೆಗೆ  ಗೊತ್ತಾಗಿದ್ದು .  ೧೯೭೭-೭೮ ರ ಸುಮಾರಿಗೆ ಟೇಪ್  ರಿಕಾರ್ಡರ್  ಎಲ್ಲೆಲ್ಲೂ  .  ಆಗ  ಕುರ್ಬಾನಿ ಹಾಡು  ಎಲ್ಲೆಲ್ಲೂ ಮೊಳಗುತ್ತಿತ್ತು . ಆಗ  ಬಂದ ಕನ್ನಡದ ಮೊದಲ  ಭಾವಗೀತೆಗಳ  ಕ್ಯಾಸೆಟ್ಟೇ  ಕೆ. ಎಸ್.  ನಿಸ್ಸಾರ್ ಅಹ್ಮದ್ ರ   ನಿತ್ಯೋತ್ಸವ   ನಮ್ಮ ಮನೆಗೂ ಬಂದಿತು. ೧೯೮೦ರಲ್ಲಿರಬಹುದು .  ಧಾರವಾಡದಲ್ಲಿ   ಆಗ   ಜಾನಪದ  ಗಾಯಕ ಬಾಳಪ್ಪ ಹುಕ್ಕೇರಿ ಅವರ ಕ್ಯಾಸೆಟ್  ಮನೆಯಲ್ಲಿ  ಹಚ್ಚಿ  ಕೇಳುತ್ತಿದ್ದಾಗ  ಅದನ್ನು   ಬಾಗಿಲಲ್ಲಿ  ಬಂದವರು ಯಾರು ಗೊತ್ತೇ ? ಸ್ವತಹ  ಬಾಳಪ್ಪ ಹುಕ್ಕೇರಿ ಅವರೇ ! ಪಕ್ಕದ  ಮನೆಗೆ ಬಂದಿದ್ದರಂತೆ , ತಮ್ಮ ಹಾಡು   ಪಕ್ಕದ ಮನೆಯಿಂದ   ಕೇಳಿ ಸಂತೋಷ ಪಟ್ಟು ನಮ್ಮ ಮನೆಗೆ ಬಂದಿದ್ದರು!   
ಆಗ ಕಾಲೇಜು ದಿನಗಳು  ಧಾರವಾಡ  ಮುಖ್ಯ ಸ್ಟೇಶನ್ನು , ಮತ್ತೆ ವಿವಿಧಭಾರತಿ , ಅಷ್ಟೇ ಏಕೆ   ದುರದ ಭದ್ರಾವತಿ , ಬೆಂಗಳೂರು , ಗುಲ್ಬರ್ಗಾ,  ಮಂಗಳೂರು  ಆಕಾಶವಾಣಿ   ಕೇಂದ್ರಗಳಿಂದ   ಕೇಳದ  ಭಾವಗೀತೆ , ಭಕ್ತಿಗೀತೆ  , ಚಿತ್ರಗೀತೆ ಗಳಿಲ್ಲ .  ದೂರದ ಸಿಲೋನಿನಿಂದ  ಬರುತ್ತಿದ್ದ ಕನ್ನಡ , ಹಿಂದಿ , ಇಂಗ್ಲೀಷ್  ಹಾಡುಗಳನ್ನೂ ಕೇಳುತ್ತಿದ್ದೆ .  ಧಾರವಾಡ  ವಿವಿಧ ಭಾರತಿ  ೧೧  ಗಂಟೆಗೆ  ಬಂದ್ ಆದರೆ   ರಾತ್ರಿ  ಹನ್ನೊಂದೂವರೆ ವರೆಗೆ  ಮುಂಬೈ  ವಿವಿಧಭಾರತಿಯಲ್ಲಿ  ಹಾಡುಗಳು ಬರುತ್ತಿದ್ದವು . ಟ್ರಾನ್ಸಿಸ್ಟರ್  ಹcಚಿಕೊಂಡು ಕೇಳುತ್ತ   ಮಲಗಿ ಬಿಡುತ್ತಿದ್ದೆ . ಯಾವಾಗಲೋ  ಅವ್ವ   ಬಂದು ಬಂದ್ ಮಾಡಿ  ಎತ್ತಿಡುತ್ತಿದ್ದಳು .   ಅಮೇಲೆ  ‌ಟೀವೀ , ಕೇಬಲ್  ಬಂದು   ಕೆಲಸ  , ವರ್ಗಾವರ್ಗಿ    ಜಂಜಾಟದಲ್ಲಿ  ರೇಡಿಯೋ  ಕೇಳುವುದು  ಕಡಿಮೆ ಆಯಿತು . ಆದರೂ   ಕ್ಯಾಸೆಟ್  ಸಂಗ್ರಹ ಬೆಳೆಯುತ್ತಲೇ ಇತ್ತು  .    
ನಂತರ  ಮದುವೆ ಆಯಿತು .  ರೇಡಿಯೋ  ,  ಡಬಲ್ ಕ್ಯಾಸೆಟ್ ಡೆಕ್ , ಮೂರು ಸೀಡೀ  ಚೇಂಜರ್  ಇರುವ ೧೨೦೦ ವ್ಯಾಟ್ ನ    ೧೫೦೦೦  ಬೆಲೆಯ  ಫಿಲಿಪ್ಸ್     ಮ್ಯೂಸಿಕ್  ಸಿಸ್ಟಮ್   ೨೦೦೨ ರಲ್ಲಿ  ಮನೆಗೆ ಬಂದರೂ  , ಹೆಂಡತಿ   ಅಥವಾ  ನಾನು ಟೀವೀ   ನೊಡುತ್ತಿದ್ದಾಗಲಂತೂ  ಮೌನವಾಗೇ ಇರುತ್ತಿತ್ತು .

ಟೀವೀ  ನೋಡದಿದ್ದಾಗ  ಕ್ಯಾಸೆಟ್  ಹಚ್ಚುತ್ತಿದ್ದೆ .     ಜೋರಾಗಿ ಕೇಳಿದರೇ   ಮಾತ್ರ   ಕೇಳಿದ ಹಾಗೆ   ಅಂತ  ನನಗೆ    ಅನ್ನಿಸೋದು .  ವಾಲ್ಯೂಮ್  ಕಡಿಮೆ ಮಾಡಿ ಅಂತ  ನನ್ನ ಹೆಂಡತಿ ಅನ್ನೋಳು .  ಕೇಳಿದರೆ ಜೋರಾಗೇ ಕೇಳಬೇಕು . ಇಲ್ಲದಿದ್ದರೆ ಬೇಡವೇ ಬೇಡ  ಅನ್ನೋದು ನನ್ನ ಅಂಬೋಣ .  ಫಲಿತಾಂಶ ? ಅದು ಆಫ್! .   ಅದರಲ್ಲಿ  ಡಬಲ್ ಕ್ಯಾಸೆಟ್  ವ್ಯವಸ್ಥೆಯಿದ್ದು  ಒಂದು ಕ್ಯಾಸೆಟ್ಟಿನಿಂದ ಇನ್ನೊಂದಕ್ಕೆ ವರ್ಗಾಯಿಸಬಹುದಿತ್ತು . ಒಂದು ಕ್ಯಾಸೆಟ್ ನಲ್ಲಿರೋ ಎಲ್ಲ ಹಾಡು ನಮಗೆ ಸೇರಿರಲಿಕ್ಕಿಲ್ಲ  ಅಲ್ಲವೇ .  ನಮಗೆ ಬೇಕಾದ ಹಾಡುಗಳನ್ನಷ್ಟೇ  ಕೇಳೋದು  ಹೇಗೆ ?  ಅದಕ್ಕೆ ನನಗೆ  ಬೇಕಾದ ಹಾಡುಗಳನ್ನು  ಮಾತ್ರ  ಹೊಸ ಕ್ಯಾಸೆಟ್ಟುಗಳಿಗೆ ಡಬ್  ಮಾಡಿಕೊಂಡದ್ದಾಯಿತು .   ಎರಡು ಮೂರು ವರುಷದ ಹಿಂದೆ   ಆ   ಸಿಸ್ಟಮ್  ಕ್ಯಾಸೆಟ್ ಫಾರ್ವರ್ಡ್ / ರಿವರ್ಸ್  ಆಗದ  ಹಾಗೆ   ಆಯಿತು . ಒಂದು ಸಾವಿರ ಕೊಟ್ಟು  ರಿಪೇರಿ ಮಾಡಿಸಿದ್ದರೂ ಸರಿಯಾಗಲಿಲ್ಲ . ಹೇಗೂ  ಬಳಸುತ್ತ ಇರಲಿಲ್ಲವಲ್ಲ . ಅಷ್ಟಕ್ಕೇ  ಬಿಟ್ಟು ಬಿಟ್ಟಿದ್ದೆ .    ಆದರೂ ಕ್ಯಾಸೆಟ್  ಸಂಗ್ರಹ  ಇದ್ದೇ ಇತ್ತಲ್ಲ .   ಸಂಗ್ರಹ ಬುದ್ಧಿ ಒಳ್ಳೆಯದಲ್ಲ  ಅಂತ  ಯರೋ ಹೇಳಿದ್ದಾರೆ .   ಆದರೂ ಒಳ್ಳೆಯದನ್ನ  ಸಂಗ್ರಹಿಸುತ್ತಾ   ಹೋಗಬೇಕೆನ್ನುವ ಬುದ್ಧಿ  .  ಹೊಸದನ್ನ ಸೇರಿಸದಿದ್ದರೂ    ಇದ್ದ ಸಂಗ್ರಹ(ಅದೂ ಮೂರು ದಶಕ ಗಳದ್ದು   )ವನ್ನಾದರೂ ಉಳಿಸಿಕೊಳ್ಲಬೇಕಲ್ಲ ?     ಕ್ಯಾಸೆಟ್  ಬಳಸದೇ ಇದ್ದರೆ ಕೆಟ್ಟು ಹೋಗುವುವು ಏನೋ ?   ಇದ್ದ  ಹಾಡುಗಳೆಲ್ಲ   ಸೀಡೀ ಯಲ್ಲಿ ಸಿಗುವುದು ಅನುಮಾನ .

ಅಷ್ಟು ಹೊತ್ತಿಗೆ ಕಂಪ್ಯೂಟರ್ರು , ಇಂಟರ್ನೆಟ್ಟು   ಮನೆಗೆ ಬಂದಿತು .  ಕತೆಯನ್ನು  ಹೆಚ್ಚು   ಬೆಳೆಸದೇ   ಹೇಳಬೇಕೆಂದರೆ  ... ಕೆಲವನ್ನ   ಇಂಟರ್ನೆಟ್ಟಿಂದ   ಡೌನ್ಲೋಡ್  ಮಾದಿಕೊಂಡೆ .  ಅಲ್ಲಿ ಸಿಗದ್ದನ್ನ  ... ಇನ್ನೊಂದು   ( ಹೌದು !)  ಫಿಲಿಪ್ಸ್  ಸಿಸ್ಟಂ  - ಕ್ಯಾಸೆಟ್ / ಸೀಡೀ /ರೇಡಿಯೋ ದಿಂದ ಎಂಪಿ೩  ಗೆ ಬದಲಿಸಿ  ಯೂಎಸ್ ಬಿ  ಡ್ರೈವ್ ನಲ್ಲಿ   ಉಳಿಸುವ ರಿಪ್ಪರ್  ಸಿಸ್ಟಂ  -   ಖರೀದಿ ಮಾಡಿ   ಎಂ ಪಿ೩  ಗೆ  ಬದಲಿಸಿದ್ದೇನೆ . ಅದರಿಂದ ನನ್ನ  ಕ್ಯಾಸೆಟ್  ರಾಶಿ  ಕರಗಿತು.  ಇನ್ನೊಂದು ಹತ್ತು  ಉಳಿದಿವೆ .. ಹೊಸ ವರ್ಷ ಬರುವುದರ ಒಳಗಾಗಿ  ಅವನ್ನೂ  ಎಂಪಿ೩ ಗೆ ಬದಲಿಸುವ ಗುರಿ ಹೊಂದಿದ್ದೇನೆ .  ಆಗದಿದ್ದರೂ  ತೊಂದರೆ ಇಲ್ಲ . ಇದ್ದುಕೊಳ್ಳಲಿ! .

ಮುಖ್ಯ ವಿಷಯ ಅಂದರೆ  ಹೊಸ ಹಾಡುಗಳನ್ನು  ಕೇಳುತ್ತಿಲ್ಲ ;  ತೀರಾ  ಒಳ್ಳೆಯ    ಹಳೆಯವನ್ನು   ಇಟ್ಟುಕೊಂಡಿದ್ದೇನೆ   ಅಷ್ಟೇ.  ಬೇಕಾದಾಗ ಕೇಳಬಹುದು .  ಅವನ್ನೂ ಕೇಳುತ್ತಿಲ್ಲ ; ಹೀಗಾಗಿ   ಈಗೀಗ ಮೌನವನ್ನು   ಆಲಿಸುತ್ತಿದ್ದೇನೆ . ತಲೆಯಲ್ಲಿ ತುಂಬಿದ್ದ ಸಂಗೀತ / ಹಾಡುಗಳ  ಗುಂಗೂ ಮಾಯವಾಗಿದೆ !