ರಾಗಿ ಮುದ್ದೆ ತಿಂದರೆ ಕಪ್ಪಗಾಗ್ತಾರೆ

"ನನ್ನ ಮಗ ಹೋಟೆಲ್‌ಗೆ ಹೋದ ತಕ್ಷಣ ನಂಗೆ ನೂಡಲ್ಸ್ ಬೇಕು ಫ್ರೈಡ್ ರೈಸ್ ಬೇಕು ಇಲ್ಲ ಗೋಬಿ ಮಂಚೂರೀನೆ ಕೇಳೋದು , ಮನೇಲೂ ಅಷ್ಟೇ ಬರೀ ಮಾಗಿ ಮಾಡಿಕೊಡು ಅಂತಾನೆ ಇಲ್ಲ ಅಂದ್ರೆ ಹೋಟೆಲ್‌ನಿಂದ ತರಿಸಿಕೊಡು ಅಂತಾನೆ" ಆಕೆ ಹೆಮ್ಮೆಯಿಂದ ಹೇಳುತ್ತಿದ್ದರು. ನಾನು ಸುಮ್ಮನೆ ಕೇಳುತ್ತಾ ಇದ್ದೆ. ಹೋಗಲಿ ಪಾಪ ಸಂತೋಷ ಆಗಲಿ ಅಂತ.
"ಅದಿರ್ಲಿ ನಿಮ್ಮಗಳು ಏನೂ ಕೇಳೋದಿಲ್ಲವಾ ? " ಕೊನೆಗೊಮ್ಮೆ ನನ್ನ ಪ್ರಶ್ನೆ ಮಾಡಿಯೇಬಿಟ್ಟರು
ಏನು ಹೇಳಲಿ
"ಹೌದು ಅವಳು ತುಂಬಾ ಹಠ ಮಾಡ್ತಾಳೆ" ಅಂದೆ
"ಏನು ಇಷ್ಟ ಅವಳಿಗೆ ?" ಅಂದರು
"ಅವಳಿಗೆ ರಾಗಿ ಮುದ್ದೆ ತುಂಬಾ ಇಷ್ಟ " ನಿಜವನ್ನೇ ಹೇಳಿದ್ದೆ ಅವಳು ಮುದ್ದೆ ಇಲ್ಲದಿದ್ದರೆ ರಾತ್ರಿ ಏನು ತಿನ್ನುವುದಿಲ್ಲ

" ಮುದ್ದೇನಾ ಅಯ್ಯೋ ನೀವ್ಯಾವ ಜಾತಿ "

ನಾನು ಹೇಳಿದೆ

" ಮೊದಲು ಈ ಹ್ಯಾಬಿಟ್ ಬಿಡಿಸಿ . ಒಳ್ಳೆ ಇತರೆಯವರ ಥರಾ ಅದೇನ್ರಿ " (ಇತರೆಯವರಂದರೆ ?)

"ಯಾಕೆ ಮುದ್ದೆ ತಿಂದರೆ ಏನಾಗುತ್ತೆ" ಅಂತ ಕೇಳಿದೆ ಮುಗ್ದಳಂತೆ

"ಮಕ್ಕಳು ಕಪ್ಪಗಾಗಿ ಬಿಡ್ತಾರಂತೆ"

"ನೀವು ಮುದ್ದೆ ತಿಂದಿದೀರಾ "ಅಂತ ಕೇಳಿದೆ ಆಕೆಯ ಮುಖವನ್ನೆ ನೋಡುತ್ತಾ

"ಇಲ್ಲಪ್ಪ ನಾನು ತಿಂದಿಲ್ಲ ಅದಕ್ಕೆ ----------" ಮುಂದೇನು ಹೇಳುತ್ತಿದ್ದರೋ ಅವರ ಬಣ್ಣ ನೆನಪಾಯಿತೇನೋ ಅಥವ ನನ್ನ ಪ್ರಶ್ನೆಯಲ್ಲಿದ್ದ ವ್ಯಂಗ್ಯ ತಿಳಿಯೇತೇನೋ

ಮುಂದೆ ಮಾತು ಮುಂದುವರಿಸದೆ ಹೊರಟೇ ಬಿಟ್ಟರು , ಹಾದಿಯಲ್ಲಿ ಸಿಕ್ಕು ಹಾದಿಯಲ್ಲೇ ಮಾಯವಾದರು.

ನಂಗೆ ಅರ್ಥವಾಗದ್ದು

ಯಾಕೆ ತಾಯಂದಿರಿಗೆ ಮಕ್ಕಳು ನಾರ್ಥ್ ಇಂಡಿಯನ್, ಚೈನೀಸ್ ಪ್ಫುಡ್ , ಪಿಜಾ ತಿಂದರೆ ಹೆಮ್ಮೆ ಅಂತ.

ನನ್ನ ಮಗಳಿಗೆ

ಪುಳಿಯೋಗರೆ, ಹೋಳಿಗೆ, ಮುದ್ದೆ, ಚಪಾತಿ ಅಂದ್ರೆ ಇಷ್ಟ

ಅದನ್ನ ಹೇಳ್ಕೊಳೋಕೆ ನಂಗೆ ಹೆಮ್ಮೆ ಯಾಕಂದ್ರೆ

ಇವೆಲ್ಲಾ ಆರೋಗ್ಯಕ್ಕೆ ಒಳ್ಳೆಯದು . ಜೊತೆಗೆ ನಮ್ಮ ಸೊಗಡಿನ ತಿಂಡಿಗಳು ಇವು

ಏನಂತೀರಾ