ಇಂದು ಭಾರತೀಯ ಧೀರ ಯುವಕರ ದಿನ

ಇಂದು ಭಾರತೀಯ ಧೀರ ಯುವಕರ ದಿನ

 

ಎಂಥ ಸುದಿನ ಎಂಥ ಸುದಿನ

ಇಂದಿನೀ ಶುಭದ ಸುದಿನ

ಭಾರತೀಯ ವ್ಯಾಘ್ರ ಸಿಂಹರುದಯದಾ  ದಿನ  ||

ಇಂದು ಭಾರತೀಯ ಧೀರ ಯುವಕರ ಸುದಿನ ||ಪ||

ಆತ್ಮ ಸ್ಥೈರ್ಯ ಕಳೆದುಕೊಂಡ

ಭಾರತೀಯ ಭೀತಿಯಿಂದ

ಮೊಗಲಗಂಜಿ ಬದುಕುತಿದ್ದ ಆ ಕಾಲವು |

ಹೆಮ್ಮೆಗೊಂಡು ಬೆಳೆದ ಯುವಕ

ದಿಟ್ಟ ತನದಿ ತನ್ನನರಿತ

ಸಿಂಹವಾಗಿ ಮೆರೆದ ಗೋವಿಂದನುದಯವು  ||೧||

ಗುರುವು ತಾನು ಎಂಬುದರಿತು

ಹಗುರವಾದುದೆಲ್ಲ ತೊರೆದು

ಭಾರತೀಯ ಶೌರ್ಯ ಮೆರೆದನಪ್ರತಿಮನು

ಧೀರನಂತೆ ತೊಡುಗೆ ಉಡುಗೆ

ವೀರಖಡ್ಗವೊಂದು ಜೊತೆಗೆ

ಇರುಳು ಹಗಲು ಭೇದವಿರದೆ ದೇಶಕಾದನು ||೨||

ಸಿಕ್ಕರೆಂಬ ವೀರ ತಂಡ

ಕಟ್ಟಿ ನಾಡ ಪ್ರೀತಿಯಿಂದ

ಬಂದನಂದು ದೇಶದಲ್ಲಿ ಗುರುಗೋವಿಂದ |

ಸಿಂಗರಾಗಿ ಶೂರರಾಗಿ

ದುಡಿದು ನಾಡ ನೀತಿಗಾಗಿ

ಮಡಿದ ಧೀರಸೇನೆನೇತಗಿರಲಿ ಗೌರವ ||೩||

ಅಂಗ್ಲರಂದು  ಭಾರತೀಯ

ರನ್ನು ಗೆದ್ದೆವೆಂದ ಕಾಲ

ಒಬ್ಬ ಭಾರತೀಯ ಮಾತ್ರ ವಿಶ್ವ ಗೆದ್ದನು

ವಿಶ್ವಮಾನ್ಯವಾದ ವೇದ

ಯೋಗ ಬ್ರಹ್ಮಚರ್ಯವೆಂದು

ಭಾರತೀಯ ಸೂತ್ರವನ್ನು ಜಗಕೆ ತೋರ್ದನು ||೪||

ಏಳಿರೆದ್ದೇಳಿರೆಂದು

ನಿದ್ದೆಗಣ್ಣಿನವರ ಬಡಿದು

ಹೇಳಿದಂಥ ಮಾತು ದೇಶದಲ್ಲಿ ಮೊಳಗಿತು |

ಕುರಿನರಿಗಳ ಮರಿಗಳಲ್ಲ

ನೀವು ಹುಲಿಯ ಪುತ್ರರೆಂದು

ಹೇಳಿದಾಗ ಯುವಕರೆದೆಗೆ ಮಿಂಚು ಸುಳಿಯಿತು ||೫||

ಸ್ವಾಮಿ ವಿವೇಕಾನಂದ

ಗುರು ಗೋವಿಂದರಂಥ

ವ್ಯಾಘ್ರ ಸಿಂಹರುದಿಸಿ ಬಂದರೀ ಶುಭ ದಿವಸ |

ಭಾರತೀಯರಾತ್ಮ ಸ್ಥೈರ್ಯ

ವೃದ್ಧಿಮಾಡಿದಂಥ ಕಾರ್ಯ

ವನ್ನು ನಾವು ಸ್ಮರಿಸಿ ನಮಿಸಿ ಈಗ ಜೈಸುವಾ ||೬||

( ಇಂದು 12/01/2011 ಸ್ವಾಮಿ ವಿವೇಕಾನಂದರ ಹಾಗು ಗುರು ಗೋವಿಂದ ಸಿಂಹರ ಜನ್ಮದಿನ )

                                                                                                                                                                                 

                                                                                                     - ಸದಾನಂದ