' ಪ್ರಣಯ ಘಾತೆ '

  
   ಪ್ರಣಯ ಗಾಥೆ

ಶೃಂಗಾರ ಮತ್ತು ವೀರ
ಕಾವ್ಯದ ಮೂಲ ದ್ರವ್ಯಗಳು
ಮಾತ್ರವೆ ಅಲ್ಲ ಅವು ಕಾಮ
ಮತ್ತು ವೇದಾಂತ ಕೂಡ
ಜೊತೆಗೆ ಪ್ರವೃತ್ತಿ ಮತ್ತು
ನಿವೃತ್ತಿ ಕೂಡ ಹೌದು
ಅಂತೆಯೆ ಜೀವನ ಮತ್ತು
ಕಾವ್ಯದ ಮೂಲ ದ್ರವ್ಯ ಸಹ

ಇವೆರಡರ ಸಂಗಮ
ಕಾವ್ಯೋತ್ಪತ್ತಿ ಇದು ಕೆಲವೊಮ್ಮೆ
ಪರದೆಯ ಮುಂದೆ ಹಲವೊಮ್ಮೆ
ಪರದೆಯ ಹಿಂದೆ ಒಮ್ಮೊಮ್ಮೆ
ಎರಡೂ ಕಡೆಗೂ
ಈ ಎರಡರ ಸಮರಸವೆ 'ಸಂಗಮ'

ಅದು ಕಾಳಿದಾಸನ
'ಮೇಘದೂತ' ಇರಬಹುದು
ಜಯದೇವ ಕವಿಯ
'ಗೀತ ಗೋವಿಂದ' ವಿರಬಹುದು
ಉಮರ್ ಖಯ್ಯಾಮನ
'ರುಬಾಯಿಗಳು' ಆಗಿರಬಹುದು
ಅದೊಂದು ಕಾಮಯಾಪನೆ
ವಾತ್ಸಾಯನನಿಂದ
ಆಚಾರ್ಯ ರಜನೀಶನ ವರೆಗೆ
ಎಲ್ಲೆಡೆಗೆ ಕಾಮದ ವಿಜ್ರಂಭಣೆಯೆ
ವಿಜ್ರಂಭಣೆ

ವಿಶ್ವಾಮಿತ್ರ ತಪಕೆ ನಿಂತ
ತಪೋಭಂಗಕ್ಕೆ ಮೇನಕೆಯ ಆಗಮನ
ಅವನಿಗೆ ಕಾಮ ದಕ್ಕಿತು
ಅದರ ಫಲ ಶಕುಂತಲೆಯ ಜನನ
ಆಕೆಯ ಜವಾಬ್ದಾರಿ ಹೊರದ ಮುನಿ
'ಕಾಮಃ ಕರ್ತಾ ನಾಹಂ ಕರ್ತಾ'
ಎಂದು ಮುಖ ತಿರುವಿದ ಕಾರಣ
ಆತನಿಗೆ ವೇದಾಂತ ದಕ್ಕಿತು
ಆತ 'ಬ್ರಹ್ಮರ್ಷಿ'ಯಾದ !
ಹೆಣ್ಣನ್ನು ಅರಿಯದವ
ಬ್ರಹ್ಮರ್ಷಿ ಹೇಗಾದಾನು ?
ವಾತ್ಸಾಯನನಿಗೂ ಮೊದಲು
'ಕಾಮಸೂತ್ರ' ಬರೆದವ
ವೇದ ಕಾಲದ ಋಷಿ 'ಶ್ವೇತಕೇತು'
ಹೆಣ್ಣಿನಂತೆಯೆ ಬ್ರಹ್ಮವೂ
ಮೈಮರೆಸುವಂತಹುದು
ಎಂದವನು ಆತ ಹೆಣ್ಣು ಗಂಡುಗಳ
ಮಿಲನ 'ಸೃಷ್ಟಿಯ ಆರಾಧನೆ'

ಹೆಣ್ಣೊಂದು 'ಅಗ್ನಿಕುಂಡ'
ಗಂಡು ಆಜ್ಯಾಹುತಿ  ಇದೊಂದು
'ಸೃಷ್ಟಿಯಜ್ಞ' ದಾನ ಮತ್ತು ತಪಸ್ಸು
ಕೂಡ ಎಂದವರು ಉಪನಿಷತ್ಕಾಲದ
ಋಷಿಗಳು ಹೀಗಾಗಿ ಕಾಮ
ಅರ್ವಾಚೀನದಂತೆ ಪ್ರಾಚೀನ ಕೂಡ

ವಸಂತದಲಿ ಕಾಮನ ವಿಜ್ರಂಭಣೆ
ರತಿ ಕಾಮ ಸಲ್ಲಾಪ 'ಕಾಮದಹನ'
ಕಾಮ ದಹನ ಮರು ಸೃಷ್ಟಿಗೆ ಹೇತು
ಸೃಷ್ಟಿಯಿಂದ ಮತ್ತೆ ಕಾಮಾಂಕುರ
ಮತ್ತೆ ದಹನ ಮತ್ತೆ ಸೃಷ್ಟಿ
ಇದೊಂದು ನಿರಂತರ ಕ್ರಿಯೆ
ಹುಟ್ಟಿನಿಂದ ಸಾವು ಸಾವಿನಿಂದ ಹುಟ್ಟು
ಇದು ಪರಸ್ಪರಾವಲಂಬಿ 'ಸೃಷ್ಟಿಕಾವ್ಯ'

ವೇದೋಪನಿಷತ್ತುಗಳ ಯುಗ
ಅದೊಂದು 'ಮುಕ್ತಯುಗ'
ಮನುಷ್ಯ ನಾಗರಿಕನಾದ
ಮುಕ್ತತೆಗೆ ಕಡಿವಾಣ ಹಾಕಿದ
ಆಗ ಹುಟ್ಟಿ ವಿಜ್ರಂಭಿಸಿದ್ದೆ 'ಮಡಿವಂತಿಕೆ'
ಇದುವೆ ಮುಂದೆ ಕರ್ಮಠತನಕ್ಕೆ ನಾಂದಿ
ಇಲ್ಲಿ ಮುಕ್ತ ಕಾಮ ಮೈಲಿಗೆಯ ವಸ್ತು
ಇದು ಕತ್ತಲೆಯ ವ್ಯವಹಾರವಾಗಿ
ಸೀಮಿತ ಗೊಂಡಿತು

ಈ ಸೀಮಿತತೆ ಅಸೀಮತೆಯ ಹುಟ್ಟಿಗೆ
ಕಾರಣವಾಯಿತು ಹೀಗಾಗಿ
ಉತ್ಕಟ ಕಾಮ ಎಲ್ಲ ದಿಗ್ಭಂಧನಗಳ
ಮೀರಲು ಹಾತೊರೆಯಿತು ಅದುವೆ
ಅವ್ಯವಹಾರಕ್ಕೆ ನಾಂದಿ

ಪ್ರವೃತ್ತಿ ಇಲ್ಲದೆ ನಿವೃತ್ತಿ ಹೇಗೆ ಸಾಧ್ಯ ?
ಅನುರಕ್ತಿಯಿಲ್ಲದೆ ವಿರಕ್ತಿ ಎಲ್ಲಿ ?
ಈ ವಿವೇಕವೆಲ್ಲ ಅರ್ವಾಚೀನ
ಕಾಮ ವೇದಾಂತದಿಂದ
ವೇದಾಂತದಿಂದ ಕಾಮದ ಬೇರ್ಪಡೆ
ಪರಿಣಾಮ ಕಾವ್ಯ ವೇದಾಂತಗಳು
ಕಳೆಗಟ್ಟಿದವು ಸೃಜನಶೀಲತೆ ಕಂಗೆಟ್ಟು
ಕುಳಿತಿತು ಇವೆರಡೂ ಪ್ರಸ್ತುತ
ಸಮಾಜಕ್ಕೆ ಅನುಪಯುಕ್ತ
ಪ್ರವೃತ್ತವಾದ ಮರೆತ ನಿವೃತ್ತವಾದಿಗಳು
ನಿವೃತ್ತವಾದ ಮರೆತ ಪ್ರವೃತ್ತವಾದಿಗಳು
ಇವರು ಇಳಿಯುವಿಕೆ ತಿಳಿಯದೆ
ಏರಲು ಪ್ರಯತ್ನಿಸುವವರು

ಪ್ರಕೃತಿಯೆ ನಿವೃತ್ತಿಯ ಮೂಲ
ನಿವೃತ್ತಿಯಲ್ಲಿ ಪ್ರಕೃತಿಯ ಕೂವೆಗಳಿವೆ
ನಿವೃತ್ತಿಯೂ ಮತ್ತೊಂದು
ರೀತಿಯಲಿ ಪ್ರವೃತ್ತಿಯೆ ರತಿಯ
ಅಂಗಾಂಗದಲಿ ವೇದಾಂತದ ಪಲ್ಲವವಿದೆ
ವೇದಾಂತದ ಪುಟಗಳಲಿ
ರತಿಯ ಚೆಲುವಿದೆ ಇವುಗಳ
ಅರಿಯುವಿಕೆಗೆ ಒಳಗಣ್ಣು ಬೇಕು
ರತಿಯ ಅರಿವಿಲ್ಲದ ತತ್ವಜ್ಞಾನ ಅಪೂರ್ಣ
ತತ್ವಜ್ಞಾನವಿಲ್ಲದ ರತಿ ಕೂಡ ಅಪೂರ್ಣವೆ
ಅದುವೆ ಭರತೇಶ ವೈಭವದ
'ಪೂರ್ಣಮದಃ ಪೂರ್ಣಮಿದಂ'
ತ್ತವಜ್ಞಾನಿಯಾಗಿ ಹೆಣ್ಣನ್ನು ರಮಿಸಬೇಕು
ರಸಿಕನಾಗಿ ವೇದಾಂತವನ್ನೋದಬೇಕು
ಈ ಎರಡನ್ನೂ ಬಲ್ಲವ ಕವಿಯಾಗಬಲ್ಲ

ಈ ಪ್ರಣಯ ಕಾವ್ಯದ ಪಯಣ
ಸಾಗಿರುವುದೆತ್ತ ? ಈ ಕಾವ್ಯ ಪ್ರಾಕಾರ
ಸಾಗಿದೆ ದಿಕ್ಕು ದೆಸೆಯಿಲ್ಲದೆ
ಮತ್ತೊಮ್ಮೆ ಹುಟ್ಟಲಿ ಆ ಪ್ರಾಚೀನ ಕವಿ
ಸೃಷ್ಟಿಯಾಗಲಿ ಪ್ರಣಯದ
ಭಗವದ್ಗೀತೆ 'ಗಾಥಾ ಶಪ್ತಸತಿ'

ಕಾಮವೊಂದು 'ಪ್ರಣಯ ಕೊಳ'
ಈಜು ಬರದೆ ಕೊಳಕ್ಕೆ ಇಳಿಯುವಂತಿಲ್ಲ
ಕೊಳಕ್ಕಿಳಿಯದೆ ಈಜು ಬರುವಂತಿಲ್ಲ
ಪ್ರಣಯವೊಂದು 'ಕಲ್ಪನಾ ಕುದುರೆ'

ಇದು ನೆಲದ ಮೇಲೆ ಓಡುವಂತಹುದಲ್ಲ
ಅಸೀಮ ಅನಂತ ವ್ಯೋಮದಲಿ
ಓಡುವ ಕುದುರೆ ಅದರ ಓಟಕ್ಕೆ ಕಡಿವಾಣ
ಹಾಕಿದಿರೊ ನೆಲ ಕಚ್ಚಿ ಬಿಡುತ್ತದೆ ನಿಯಮಗಳ
ಚೌಕಟ್ಟು ಅದಕೆ ಸರಿ ಹೊಂದುವುದಿಲ್ಲ
ಚೌಕಟ್ಟು ಮೀರಿತೊ ಸಮಾಜ ಸಹಿಸುವುದಿಲ್ಲ
ಜೀವಂತಿಕೆ ಅಲ್ಲಿ ಹುಟ್ಟಿ ಬೆಳೆಯದು

ಶೃಂಗಾರ ಅಶ್ಲೀಲಗಳ ನಡುವಿನ ಗೆರೆ
ಬಲು ತೆಳು ಅದು ವ್ಯಕ್ತವಲ್ಲ ಆದರೆ ಅದೊಂದು
ವ್ಯಕ್ತವಲ್ಲದ ಅವ್ಯಕ್ತ 'ಲಕ್ಷ್ಮಣ ರೇಖೆ' ಅದು
ಅವರರವರ ಬುದ್ಧಿಗೆ ಹೊಳೆಯಬೇಕು ಅವರವರೆ
ಲಕ್ಷ್ಮಣ ಅವರವರು ಎಳೆದದ್ದೆ ರೇಖೆ ಇಲ್ಲಿ ಯಾರೂ
ಲಕ್ಷ್ಮಣ ರಾವಣ ಸೀತೆ ಮಾಯಾಸೀತೆ
ಯಾರೂ ಆಗಬಹುದು ಪ್ರೇಮ ಕಾಮದ ಅಂತರ
ತಿಳಿಯಬಹುದು ಇದೊಂದು ಎಂದೂ
ಮುಗಿಯದ ' ಪ್ರಣಯ ಗಾಥೆ '

                  ***