ಕಟ್ಟಯ್ಯಾ ಮಂಗಳ ಸೂತ್ರವಾ

ಭತ್ತದ ಗದ್ದೇಲಿ ತೆನೆ ತುಂಬಿ ತೂಗ್ಯಾವೋ

ನನ್ನ ಎದೆಯೊಲದಾಗ ನೀ ತುಂಬಿ ॥ ನನ ಗೆಳೆಯಾ

ಒಲವು ಹಣ್ಣಾಗಿ ಮಾಗೈತೆ ॥

ಕೈ ಮೇಲಿನ ಹಚ್ಚೇಲಿ ಹೆಸರಾಗಿ ಉಳಿದೋನೆ

ಬೆಚ್ಚಗೆ ಮನದೊಳಗೆ ಉಳಿಬಾರೋ ॥ ನನ ಗೆಳೆಯಾ

ಇಚ್ಚೆಯ ಪೂರೈಸು ಬಾರಯ್ಯ ॥

ದೇವರ ಗುಡಿಯಲ್ಲಿ ಕರ್ಪೂರ ಘಮಲಂತೆ

ನನ್ನೊಡಲ ಗುಡಿಯಲ್ಲಿ ನೀ ಘಮಲು ॥ ನನ ಗೆಳೆಯಾ

ಗಂಧದ ಕೊರಡೇನೋ ನಿನ್ನ ಪ್ರೀತಿ ॥

ಬಳ್ಳಿಯ ಹೂವೆಲ್ಲ ವಾಲಾಡಿ ಬಿರಿದಾವೋ

ಚೆಲುವು ಮೈತುಂಬಿ ನಿಂತಾವೋ ॥ ನನ ಗೆಳೆಯಾ

ಮಲ್ಲಿಗೆ ಮಾಲೆಯ ಮುಡಿಸಯ್ಯ ॥

ಹಟ್ಟಿಯ ಮುಂದೆ ಹಸಿರು ಚಪ್ಪರ ಹಾಕಿ

ಬಾಳೆಯ ದಿಂಡು ಬಳುಕಾಡಿ ॥ ನನ ಗೆಳೆಯಾ

ಕರೆದಾವು ಹಸೆಮಣೆಗೆ ಬಾರಯ್ಯ ॥

ಜರಿಯ ಅಂಚಿನ ಸೀರೆ ಹಸಿರು ಗಾಜಿನ ಬಳೆ

ಉಟ್ಕೊಂಡು ತೊಟ್ಕೊಂಡು ನಾ ಕಾದೆ ॥ ನನ ಗೆಳೆಯಾ

ಕಟ್ಟಯ್ಯ ಮಂಗಳ ಸೂತ್ರವಾ ॥

-ರೂಪಾ ಹೊಸದುರ್ಗ

ಚಿತ್ರ ಕೃಪೆ: ಇಂಟರ್ನೆಟ್ ತಾಣ