ಚಲೋ...ಹಾಸನ

ಚಲೋ..ಮೊದಲ ಭಾಗ ( http://sampada.net/blog/%E0%B2%9A%E0%B2%B2%E0%B3%8B/21-1-2013/39620 )

ಕಾರಿನ ಬಾನೆಟ್ ಮುಚ್ಚಿದ ರಾಮೋಜಿ, "ಕಾರಲ್ಲೇನೂ ಪ್ರಾಬ್ಲೆಂ ಇಲ್ಲ. ಬಹುಷಃ ಕಾರಲ್ಲಿ ಜನ ಜಾಸ್ತಿಯಾಯಿತು. ಏನು ಮಾಡುವುದು?" ಅಂದರು. ಎಲ್ಲರ ದೃಷ್ಟಿ ತನ್ನ ಪಾಡಿಗೆ ಚಿತ್ರಾನ್ನ ತಿನ್ನುತ್ತಿದ್ದ ಗಣೇಶರ ಕಡೆ ಹೊರಳಿತು. "ಗಣೇಶರೆ, ತೂಕ ಜಾಸ್ತಿಯಾದುದರಿಂದ ಕಾರು ಏರು ರಸ್ತೆ ಹತ್ತುತ್ತಿಲ್ಲ. ಆಗಲೇ ತುಂಬಾ ತಡವಾಗಿದೆ. ಇಲ್ಲಿಂದ ೧೫ ನಿಮಿಷಕ್ಕೊಂದು ಬಸ್ ಸಿಗುವುದು. ನೀವು ಇಳಿದು ಬಸ್ಸಲ್ಲಿ ಬಂದರೆ ತುಂಬಾ ಉಪಕಾರವಾಗುವುದು. ಬೇಕಿದ್ದರೆ ಪುಳಿಯೊಗರೆ,ಮೊಸರನ್ನ.. ಎಲ್ಲಾ ನೀವೇ ಇಟ್ಟುಕೊಳ್ಳಿ."ಎಂದರು ಪಾರ್ಥರು. ಪಾರ್ಥರ ಎರಡನೇ ಬಾಣಕ್ಕೂ ಬಗ್ಗಿದ ಗಣೇಶರು, ಕೆಳಗಿಳಿದು ರಸ್ತೆ ಪಕ್ಕದ ಕಟ್ಟೆಯಲ್ಲಿ ತಿನಿಸುಗಳನ್ನು ತಿನ್ನುತ್ತಾ ಬಸ್ಸಿಗಾಗಿ ಕಾಯುತ್ತಿದ್ದರು.

ಎಲ್ಲಾ ತಿಂದು ಮುಗಿಸಿ ಎದುರು ನೋಡುತ್ತಾರೆ..ಕಾರು ಇನ್ನೂ ಅಲ್ಲೇ ಇದೆ. ಎಲ್ಲರೂ ಪ್ರಯತ್ನಿಸಿ ಸುಸ್ತಾಗಿ, ಮೆಕಾನಿಕ್ ಅನ್ನು ಕರೆಸುವ ಮಾತನಾಡುತ್ತಿದ್ದರು. ನಿದಾನಕ್ಕೆ ಕಾರ ಬಳಿ ಹೋದ ಗಣೇಶರು, ಕಾರಲ್ಲಿ ಕುಳಿತು "*‍%% @#$% &%$#@" ಮಂತ್ರ ಪಠಣ ಮಾಡುತ್ತಿದ್ದ ಜನದ ಬಾಯಿ ಮಾತನಾಡದಂತೆ ಮುಚ್ಚಿ ಹಿಡಿದು, ಈಗ ಕಾರು ಸ್ಟಾರ್ಟ್ ಮಾಡಿ ಅಂದರು. ಕಾರು ಏರು ರಸ್ತೆಯಲ್ಲಿ ಆರಾಮ ಸಾಗಿತು! ಎಲ್ಲರಿಗೂ ಆಶ್ಚರ್ಯ! " ತೂಕ ಮಾತಿನಲ್ಲಿರುವುದು ಅಂತ ನಮ್ಮ ಗುಣಶೇಕರ್ ಅವರು ಹೇಳಿದ್ದರಲ್ಲ. ಅದು ನೆನಪಾಗಿ ಪ್ರಯತ್ನಿಸಿದೆ" ಅಂದರು ಗಣೇಶರು.

ಅಲ್ಲಿಂದ ಹೊರಟ ಕಾರು ನೇರ ಹರಿಹರಪುರ ಶ್ರೀಧರ್ ಅವರ ಮನೆ ಬಾಗಿಲಲ್ಲಿ ನಿಂತಿತು. "ಬಹಳ ದಣಿದಿದ್ದೀರಿ. ಮೊದಲು ಊಟ ಮಾಡೋಣ" ಎಂದು ಎಲ್ಲರನ್ನೂ ಊಟಕ್ಕೆ ಕರಕೊಂಡು ಹೋದರು.

ಊಟ ಮುಗಿಯುತ್ತಿದ್ದಂತೆ ಶ್ರೀಧರ್ ಅವರು "ನೀವೆಲ್ಲಾ ಗೋಪೀನಾಥರೊಂದಿಗೆ ಒಂದು ರೌಂಡು ನೋಡಿ ಬನ್ನಿ. ನನಗೆ ಮತ್ತು ನಾಗರಾಜರಿಗೆ ಬಹಳಷ್ಟು ಕೆಲಸ ಬಾಕಿ ಇದೆ. ಮತ್ತೆ ಸಿಗೋಣ" ಎಂದು ಪಂಚೆ ಎತ್ತಿ ಕಟ್ಟಿ ಹೊರಟರು.

"ಶ್ರೀಧರ್ ಓಡಾಟ ಕಂಡರೆ ಮೀಟಿಂಗ್ ಭರ್ಜರಿ ನಡೆಯಬಹುದು ಅಂತ ಕಾಣುತ್ತದೆ" ಅಂದರು ಸತೀಶ್.

"ನೀವೇ ನೋಡುವಿರಂತೆ" ಅಂದು ಗೋಪೀನಾಥರು ಎಲ್ಲರನ್ನು ಕರಕೊಂಡು ಹೊರಟರು.

ಅಲ್ಲಿಂದ ಸ್ವಲ್ಪ ದೂರದಲ್ಲಿ ವಿದ್ಯುತ್ ದೀಪಗಳಿಂದ ಅಲಂಕೃತವಾದ ಬಿಲ್ಡಿಂಗ್ ಒಂದು ಕಾಣಿಸಿತು. ಮದುವೆ ಸಮಾರಂಭ ಇರಬಹುದೆಂದು ನೋಡಿದರೆ, "ಸಂಪದ ಸಮ್ಮಿಲನ" ಎಂಬ ದೊಡ್ಡ ಬೋರ್ಡ್ ಕಾಣಿಸಿತು!

"ಇದಕ್ಕೆಲ್ಲಾ ಹಣದ ವ್ಯವಸ್ಥೆಗೆ ಏನು ಮಾಡಿದರು?" ಎಂದು ಜಯಂತ್ ವಿಚಾರಿಸಿದಾಗ, ಗೋಪೀನಾಥರು "ನಮ್ಮ ಶ್ರೀಧರ್,ನಾಗರಾಜರಿಗೆ ಇಂತಹ ಸಮಾರಂಭಗಳನ್ನು ನಡೆಸಿ ಅಭ್ಯಾಸವಿದೆ. ಕನ್ನಡದ ಕೆಲಸ ಎಂದರೆ ಕನ್ನಡಿಗರು ಧಾರಾಳಿಗಳು" ಅಂದರು.

ಕಟ್ಟಡದ ಒಳಹೋಗುತ್ತಿದ್ದಂತೆ, ಸ್ವಾಗತ ಹಾಲ್‌ನಲ್ಲಿ ೨-೩ ಕಂಪ್ಯೂಟರ್ ತಜ್ಞರು ಫೈನಲ್ ಟಚ್ ಕೊಡುವುದರಲ್ಲಿ ಮಗ್ನರಾಗಿದ್ದರು. ಅಲ್ಲಿಂದ ಒಳಗೆ ಒಂದೊಂದು ಕೋಣೆಗೆ ಒಂದೊಂದು ಹೆಸರು!

"ಟೆಕ್ ಸಂಪದ" "ಆರೋಗ್ಯ ಸಂಪದ" "ರುಚಿ ಸಂಪದ" "ಸ್ತ್ರೀ ಸಂಪದ" "ಹರಿದಾಸ ಸಂಪದ" "ಹಾಸ್ಯ ಸಂಪದ" "ವೇದ ಸಂಪದ" "ಸಿನೆಮಾ ಸಂಪದ" "ಸಂಗೀತ ಸಂಪದ" "ಕವನ ಸಂಪದ" ......ಅನೇಕ! ಅದಾಗಲೇ ಅನೇಕ ಸಂಪದಿಗರು ಬಂದು ಮಾತುಕತೆ, ಚರ್ಚೆ ನಡೆಸಿದ್ದರು.

ಅದುವರೆಗೆ ಒಟ್ಟಿಗಿದ್ದ ರಾಮೋಜಿ ತಂಡದವರು,ಒಬ್ಬೊಬ್ಬರಾಗಿ ಅವರವರ ಇಷ್ಟದ ಸಂಪದ/ಪರಿಚಿತರ ಬಳಿ ಓಡಿ ಮಾತನಾಡಲು ಶುರುಮಾಡಿದರು.

ಯಾವುದೇ ಮೀಟಿಂಗ್‌ಗೆ ಹೋಗದ, ಯಾರ ಪರಿಚಯವೂ ಇಲ್ಲದ ಗಣೇಶರು ಮಾತ್ರ ಗೋಪೀನಾಥರೊಂದಿಗೆ ಇದ್ದರು. "ಮೇಲೆ ಹಾಲ್‌ನಲ್ಲಿ ನಾಳೆ ಮೀಟಿಂಗ್ ನಡೆಯುವುದು. ನಾಡಿಗ್ ಮತ್ತು ಸಂಪದ ನಿರ್ವಾಹಕ ತಂಡದವರು ನಿನ್ನೆ ಎಲ್ಲಾ ಕೆಲಸ ಮುಗಿಸಿ ಹೋದವರು, ನಾಳೆ ಬೆಳಗ್ಗೆ ಬರುವರು. ಯಾರೊಂದಿಗೂ ಸೇರದ ನಿಮಗೂ ಒಂದು ವಿಭಾಗವಿದೆ" ಎಂದು ಕೊನೆಯಲ್ಲಿದ್ದ ಕೋಣೆ ತೋರಿಸಿದರು ಗೋಪೀನಾಥರು.

ತನಗಾಗಿ ವಿಶೇಷ ವಿಭಾಗ ಎಂದು ಖುಷಿಯಲ್ಲಿ ಹೋಗಿ, ಬೋರ್ಡ್ ನೋಡಿದರೆ....."ಜೊಳ್ಳು ವಿಭಾಗ" ಎಂದಿತ್ತು :(

(ಹೀಗೊಂದು ಕನಸು ಮುಗಿಯಿತು)