ಚಿಂದಿ ಆಯುವ ಹುಡುಗರು ನಾವು

ಚಿಂದಿ ಆಯುವ ಹುಡುಗರು ನಾವು

ಊರು, ಬೀದಿಯ ಸುತ್ತುವೆವು

ನೀವು ಬೇಡವೆಂದಿಸೆದ ಕಸವ

ರಸವನಾಗಿಸೆ ಹೆಕ್ಕುವೆವು|1|

ಹರಕು ಬಟ್ಟೆಯೆ ನಮ್ಮಯ ವೇಷ

ನೋಣದ ಮೇಲೆಯೂ ಇಲ್ಲ ದ್ವೇಷ

ಕಾಣುವುದೇ ಬರಿ ನಮ್ಮಯ ಕೊಳಕು?

ಹೊಟ್ಟೆಗಾಗಿಯೆ ನಮ್ಮೀ ಬದುಕು|2|

ಅಪ್ಪನು ಇಲ್ಲ, ಅಮ್ಮನು ಇಲ್ಲ

ಇದ್ದವರಲೆಮಾರಿಗಳು, ಕುಡುಕರು

ನನ್ನ ತಮ್ಮ ತಂಗಿಯರನು ಬೆಳೆಸೆ

ನನ್ನ ಕನಸ ನಾ ಕೊಂದಿಹೆನು|3|

ನಿಮ್ಮ ಬದುಕು ನಿಮಗ್ಹೇಗೋ ಹಾಗೆ

ನಮ್ಮ ಕಸುಬು ನಮಗೆ

ಮೋಸ ಮಾಡದ, ಪರರ ಹಿಂಸಿಸದ

ಕೊಡುಗೆ ಸ್ವಚ್ಛತೆಯಡೆಗೆ|4|

ನಮಗೂ ನಿಮ್ಮಂತೆ ಶಾಲೆಯು ಬೇಕು

ಕಸ ತುಂಬಿ ತಿರುಗೋ ಚೀಲವು ಸಾಕು

ಮಳೆಯಲಿ ನೆನೆಯದ ನಿದ್ದೆಯ ನೆನಪು

ಎಂದು ಮೂಡುವುದೋ ಬಾಳಲಾ ಬೆಳಕು?|5|