ಎದೆಯಲ್ಲೇ ಉಳಿದಿದ್ದ ಕೆಲ ಹನಿಗಳು.

ಎದೆಯಲ್ಲೇ ಉಳಿದಿದ್ದ ಕೆಲ ಹನಿಗಳು.

By ravi kumbar on Sun, 03/13/2011 - 10:30

 

 

ಬಾನಂಚಲಿ ಸೂರ್ಯನ 

ಹೆಣ ತೇಲುವಾಗ
ಚಂದ್ರನ ತೊಟ್ಟಿಲು 
ತೂಗುತ್ತಿತ್ತು. 
************
ನಿನ್ನ ಮರೆತು 
ಮಾಡುವುದೇನಿದೆ? 
ಒಂಟಿತನದ ಯಾತನೆ 
ನೀಗಲು ನೀನು ಕೊಟ್ಟ 
ನೋವುಗಳಾದರೂ ಇರಲಿ. 
****************
ನೀ ಕಟ್ಟಿಕೊಟ್ಟ 
ನೆನಪಿನ ಬುತ್ತಿಯೊಂದೆ 
ಸಾಕು ಜೀವನದ 
ಪಯಣ ಮುಗಿಸಲು.
****************
ಬಾನಲಿ ಹಾರುವ 
ಹಕ್ಕಿಗೆ ಗೊತ್ತಿತ್ತೆ? 
ತಾ ಬೀಳಿಸಿದ ಬೀಜ 
ಸೂಜಿಗಲ್ಲ ಪೊಟರೆಯೊಳಗೆ 
ಶ್ವಾಸ ಪಡೆದು 
ಹೆಮ್ಮರವಾಗುವುದೆಂದು?
*****************
ನೋವುಗಳಿಗೇನೂ ದುಃಖವಿಲ್ಲ 
ಕಳೆದುಕೊಂಡ ಸುಖಗಳಿಗೆ ಬೇಸರವಿದೆ. 
******************
ಕ್ಷಣಿಕ ಕಾಮನಬಿಲ್ಲು 
ಕವಿಯ ಕೇಳಿತ್ತು 
" ನಾನು ಹೀಗೆ ಶಾಶ್ವತವಾಗಿರಲೇ?' 
ಕವಿ ಉತ್ತರಿಸಿದ: 
" ಕವಿತೆಯಾಗಿ ನೀನು ನನ್ನ 
ಎದೆಯ ಹಾಳೆಯಲ್ಲಿ 
ಸದಾ ಬಂಧಿ".
**************
ಜೀವನವೇ ಇಷ್ಟೊಂದು ಕಾಡದಿರು 
ಸಾವು ಕೂಡ ಮುನಿಸಿಕೊಂಡೀತು.
****************
ಪ್ರೀತಿ ಕುಲುಮೆಯಲಿ 
ಬೆಂದ ಮೇಲೂ ಸುತ್ತಿಗೆಯೇಟು!
**************
ಬದುಕು ನುಡಿಸುವ 
ಎಲ್ಲ ರಾಗಗಳನ್ನು 
ಕೇಳಬೇಕೆಂದುಕೊಂಡವನಿಗೆ
ನನ್ನ- ನಿನ್ನೆದೆಯ 
ಪಿಸುಮಾತೇ ಕೇಳಲಿಲ್ಲ! 
*****************
ಬಿಸಿಲ ಬೆತ್ತೆಲೆಗೆ 
ನೆರಳ ಬಟ್ಟೆ 
ತೊಡಿಸುವವರಾರೂ ಇಲ್ಲ. 
****************
ಯಾರ ಹಾದಿ 
ಯಾರು ಕಾಯುವರು?
ಹೇಳುವುದು ಕಷ್ಟ. 
ಸತ್ತವರಿಗೂ ನೆಮ್ಮದಿಯಿಲ್ಲ 
ಹಾಳು ಬದುಕೆಂದರೆ 
ಸಾವಿಗೂ ಇಷ್ಟ!
************
ಯಾರು ಯಾರೋ 
ಬಿಡಿಸಿಟ್ಟ ಚಿತ್ತಾರ 
ಎದೆಯ ಪರದೆಯ ಮೇಲೆ 
ಬರಿ ನೋವುಗಳ ಸತ್ಕಾರ 
*****************
ಅನಾಥ 
ಕಣ್ಣುಗಳಲಿನ 
ಯಾಚನೆ 
ಬದುಕಿನ 
ತಿರುಳಿಗೊಂದು
ಸೂಚನೆ.
************
ಸಾವಿನೊಳಗೆ 
ನೆಟ್ಟ ಸಸಿಯೊಂದು 
ಮತ್ತೆ ಚಿಗುರಬಲ್ಲುದೆ?
***********
ಹಾಳೂರ ಎದೆಯಲ್ಲಿ 
ಮಾತುಗಳಿಗೂ ಬರ 
ಅರ್ಥಕ್ಕೆ ನಿಲುಕದ 
ಪದಗಳಿಗೂ ಬಡಿದಿದೆ ಗರ. 
 
Rating
No votes yet

Comments