ಬಾ..ಬಬಿಯಾ..ಬಾ........

ದೇವಸ್ಥಾನದ ಫೋಟೋ ಹಾಕಿ ಬಬಿಯಾನನ್ನ ಕರೆಯುತ್ತಾನಲ್ಲಾ-ಅಂತ ಯೋಚಿಸಿದಿರಾ? ಅದೇ ಇಲ್ಲಿನ ವಿಶೇಷತೆ. ಈ ಸ್ಥಳದ ಸ್ಟಾರ್ ಎಟ್ರಾಕ್ಷನ್-"ಬಬಿಯಾ" ಎಂಬ ಮೊಸಳೆ! ಇಲ್ಲಿಗೆ ಬಂದ ಜನರೆಲ್ಲಾ ದೇವರಿಗೆ ಕೈ ಮುಗಿದ ನಂತರ ಮೊದಲು ಹುಡುಕುವುದು "ಬಬಿಯಾ"ನನ್ನೇ! ಈ ಮೊಸಳೆ ಬಗ್ಗೆ ಮತ್ತೆ ಹೇಳುವೆ. ಮೊದಲು ಈ ದೇವಸ್ಥಾನದ ಇನ್ನಷ್ಟು ವಿಶೇಷತೆಗಳನ್ನು ಹೇಳಲಿಕ್ಕಿದೆ.

ಇದು ಕೇರಳದ "ಅನಂತ ಪದ್ಮನಾಭ" ದೇವಸ್ಥಾನ.. ತಡೀರಿ...ಆ..ಅತ್ಯಂತ ಶ್ರೀಮಂತ ಅನಂತ ಪದ್ಮನಾಭ-ತಿರುವನಂತಪುರದಲ್ಲಿರುವುದು.ಇದು ಕುಂಬ್ಲೆ ಸಮೀಪದಲ್ಲಿರುವ "ಅನಂತಪುರ"ದ ಪದ್ಮನಾಭ ದೇವಸ್ಥಾನ. ಈ ದೇವಸ್ಥಾನವೇ ಆ ಶ್ರೀಮಂತ ದೇವಾಲಯದ ಮೂಲ! ಇಲ್ಲಿಂದ ಗುಹೆಯ ಮೂಲಕ ನೇರ ಅಲ್ಲಿಗೆ ತಲುಪಬಹುದು. ಈ ಗುಹೆಯ ಮೂಲಕ ಹೋಗಿ ಅಲ್ಲಿನ ಧನಕನಕ ತಂದರೆ ಹೇಗೆ?-ನಿಮಗೆ ಬಂದ ಹಾಗೇ ನನಗೂ ಈ ಯೋಚನೆ ಬಂತು. ಆದರೆ ಈ ಗುಹೆಯ ಆ ಬದಿಯ ಬಾಗಿಲು ಧನಕನಕವಿರುವ ಗುಹೆಗೇ ತೆರೆಯುತ್ತದೆಯೋ ಎಂದು ಕನ್‌ಫರ್ಮ್ ಮಾಡಿ ನಂತರ ಹೋಗೋಣ.

ಸುತ್ತಲೂ ಕೊಳ ನಡುವೆ ದೇವಸ್ಥಾನವಿರುವ ಕೇರಳದ ಏಕೈಕ ದೇವಾಲಯವಿದು.

ಇಲ್ಲಿನ ದೇವರನ್ನು "ಕಡು ಶರ್ಕರ ಪಾಕ" ವಿಧಾನದಿಂದ ಮಾಡಿರುವುದು. ಇದರ ಬಗ್ಗೆ ಹಾಗೂ ದೇವಸ್ಥಾನದ ಬಗ್ಗೆಯೂ ವಿವರವಾಗಿ ಈ ಬ್ಲಾಗಲ್ಲಿ ಬರೆದಿರುವರು- http://mounakanive.blogspot.in/2011/07/blog-post_14.html

"ಬಬಿಯಾ" ಮೊಸಳೆಯ ಫೋಟೋ ತೆಗೆಯಬೇಕೆಂದು ಬಹಳ ಪ್ರಯತ್ನಿಸಿದೆ. ಆದರೆ ಈ ಧಡಿಯಾನನ್ನ ನೋಡಿದ ಬಬಿಯಾ ಗುಹೆಯಿಂದ ಹೊರಗೆ ಬರಲೇ ಇಲ್ಲ. ಬರಿಗಾಲಲ್ಲಿ ನಡೆದು ಅಭ್ಯಾಸವಿಲ್ಲದ ನನಗೆ ಅಲ್ಲಿನ ಬಿಸಿಲಿಗೆ ಮುರಕಲ್ಲಿನ ಮೇಲೆ ನಡೆಯಲು ಆಗಲೇ ಇಲ್ಲ. ಜತೆಗಿದ್ದ ಭಾವಂದಿರನ್ನ ಫೋಟೋ ತೆಗೆಯಲು ಕಳುಹಿಸಿದೆ. ಇಷ್ಟರವರೆಗೆ ಅದೆಷ್ಟೋ ಜನರ ಕ್ಯಾಮರಾಗಳಿಗೆ ಪೋಸ್ ಕೊಟ್ಟೂ ಕೊಟ್ಟೂ ಸಾಕಾಗಿದ್ದ ಬಬಿಯಾ ಅವರ ಕ್ಯಾಮರಾ ಕಂಡಕೂಡಲೇ ನೀರೊಳಗೆ ಮರೆಯಾದ."ಬಾ..ಬಬಿಯಾ..ಬಾ.." ಎಂದು ಕರೆದೂ ಕರೆದೂ ಸಾಕಾಯ್ತು..........

(ಬಬಿಯಾ ಬಗ್ಗೆ ಇನ್ನಷ್ಟು ವಿವರಗಳು ಮೇಲಿನ ಕೊಂಡಿಯಲ್ಲಿವೆ)

ಈ ಶಾಸನ ಓದಲಾದರೆ ಇನ್ನಷ್ಟು ವಿವರಗಳು ಲಭ್ಯವಾಗುವುದು-

(ಚಿತ್ರಗಳು ಕೆಲವು-ನನ್ನ ಭಾವನ ಕ್ಯಾಮರಾದಿಂದ)

-ಗಣೇಶ.